ڪراچي/لاهور/ڪوئيٽا/پشاور (اي پي پي)سڄي ملڪ ۾ بجلي چورن خلاف آپريشن جاري، فيسڪو فيصل آباد ريجن ۾ گذريل 24 ڪلاڪن دوران 126 جڏهن ته 6 ڏينهن ۾ 364 بجلي چورن کي گرفتار ڪيو ويو آهي جن کان 9 لک 64 هزار يونٽس بجلي چوري ڪرڻ تي 3 ڪروڙ 65 لک رپيا ڏنڊ وڌو ويو. ڪوئيٽه اليڪٽرڪ سپلاءِ ڪمپني (ڪيسڪو) بلوچستان ۾ ڪارروائيءَ دوران 38 بجلي چور گرفتار ڪيا ويا ۽ 470 ڄڻن خلاف درخواستون داخل ويون آهن. بجلي چوري جي روڪٿام لاءِ مهم دوران هاڻ تائين سڄي صوبي ۾ 569 ڪنيڪشنز مان 470 بجلي چوري ۾ ملوث ڏٺا ويا. ساهيوال ڊويزن ۾ بجلي چوري روڪڻ ۽ ڊفالٽرن خلاف جاري مهم ۾ 5 ڏينهن دوران 19 لک 69 هزار رپين جي ريڪوري ۽ 198 ڪيس داخل ڪري 17 ماڻهن کي گرفتار ڪيو ويو آهي، جڏهن ته باقيدارن ۽ بجلي چورن جي 2 ڪروڙ 55 لک رپين جي ريڪوري وڌي وئي. ٺل ۾ سيپڪو انتظاميه طرفان غير قانوني بجلي ڪينڪشن ۽ بقايائن خلاف آپريشن جاري رکندي وڌيڪ ٽرانسفارمر سِيل ڪيا جڏهن ته 3 ماڻهن تي ڪيس داخل ڪيو ويو. ايس ڊي او ميڊيا سان ڳالهائيندي چيو ته وفاقي حڪومت جي اعلان موجب بجلي چورن سان رعايت نه ڪئي ويندي.
