گلگت(م ڊ)برطانيا پنهنجي شهرين لاءِ سفري وارننگ جاري ڪري ڇڏي آهي ته هو پاڪستان جي انتظام هيٺ گلگت بلتستان جو سفر ڪرڻ کان پاسو ڪن، جڏهن ته آمريڪا اترين علائقن جي سفر لاءِ ”انتهائي احتياط“ جو مشورو ڏنو آهي.گلگت بلتستان جي مختلف شهرن ۾ مذهبي جماعتن پاران احتجاجي مظاهرا ڪيا ويا ۽ ڪجهه مذهبي اڳواڻن تي فرقيواريت کي هٿي وٺرائڻ جا الزام لڳايا ويا. ديامير جي علائقي چلاس ۾ اسڪردو سان تعلق رکندڙ مذهبي فرقي جي اڳواڻ جي گرفتاري خلاف احتجاجي ڌرڻو هنيو ويو، ڪيس داخل ڪرڻ ۽ پوءِ سندس گرفتاري خلاف مرڪزي شاهراهه به بلاڪ ڪئي وئي، اسڪردو جي احتجاج ڪندڙن مطالبو ڪيو ته جيڪڏهن چلاس روڊ اسڪردو جي عوام لاءِ محفوظ ناهي ته اسان لاءِ ڪارگل روڊ کوليو وڃي.انهن احتجاجن کانپوءِ گلگت بلتستان حڪومت ڪنهن به اڻوڻندڙ واقعي کان بچڻ لاءِ صوبي ۾ قلم 144 لاڳو ڪري ڇڏيو آهي.گلگت بلتستان جي اطلاعات کاتي پاران جاري ڪيل پڌرائي ۾ چيو ويو آهي ته گلگت بلتستان ۾ ڪربلا جي شهيدن جي چاليهي جي سلسلي ۾ پاڪ فوج ۽ سول آرمڊ فورسز جون خدمتون حاصل ڪيون ويون آهن.گلگت بلتستان جي حڪومت ۽ انتظاميه فرقيواريت کي روڪڻ لاءِ قدم کڻي رهي آهي ۽ ان حوالي سان گلگت ۾ مولانا قاضي نثار احمد ۽ اسڪردو ۾ علامه آغا باقر حسيني تي ڪيس داخل ڪيا ويا آهن.گلگت جي مقامي صحافي فهيم اختر موجب، گذريل جمعي تي گهٽ ۾ گهٽ ٻن مختلف مذهبي فرقن الڳ الڳ احتجاج ڪيو ۽ هڪ ٻئي تي الزام هڻڻ کان علاوه پوليس کي هڪ ٻئي خلاف ڪيس داخل ڪرڻ لاءِ درخواستون ڏنيون.ديامير ۽ چلاس ۾ احتجاج جي اڳواڻي ڪندڙ مفتي محفوظ جي وڊيو سوشل ميڊيا تي وائرل ٿي رهي آهي جنهن ۾ هو پنهنجا مطالبا پيش ڪندي اهو چئي رهيو آهي ته اسان قراقرم هاءِ وي تي امن جي ضمانت نٿا ڏئي سگهون.گلگت بلتستان جي گهرو وزير شمس الحق لون چيو آهي ته گلگت بلتستان جي موجوده صورتحال افسوسناڪ آهي، ان جو پهريون ۽ سڌو سنئون اثر سياحت تي پيو آهي،هزارين سياح واپس هليا ويا آهن،هن چيو ته گلگت ۾ گذريل ڏينهن ڇڪتاڻ واري صورتحال سبب هن وقت پيرا ملٽري فورسز کي طلب ڪيو ويو آهي. چلاس ۽ گلگت ۾ پيرا ملٽري فورسز جو وڏو انگ ڪنهن به اڻوڻندڙ صورتحال کي منهن ڏيڻ لاءِ تيار آهي.
