لاهور(سجاد انور+ عمران شفقت)جولاءِ مهينو اچڻ سان ئي ڪرپشن جا وڏا اسڪينڊل سامهون اچڻ شروع ٿي ويا آهن. هن وقت جيڪي ٻه نالا سامهون اچي رهيا آهن، تن ۾ هڪ احد چيما ۽ ٻيو توقير شاهه جو نالو سامهون آيو آهي، چيو پيو وڃي ته وزيراعظم شهباز شريف جو پٽ، سلمان شهباز به هن ڪرپشن ۾ ملوث آهي. احد چيما وٽ اقتصادي معاملن واري وفاقي وزارت آهي ۽ توقير شاهه وزيراعظم جو صلاحڪار آهي. اسلام آباد جا رپورٽرز ۽ ڪجهه يوٽيوبرز اهو ذڪر ڪري رهيا آهن ته اهي ٻئي (احد چيما ۽ توقير شاهه) اصل ۾ پنجاب حڪومت جا سينيئر آفيسر هئا شهباز شريف انهن جي ڪم مان ايترو خوش هو جو جڏهن هو وزيراعظم ٿيو ته کين پنهنجي ساڄي ۽ کاٻي پاسي اهم عهدن تي رکڻ چاهيائين. احد چيما کي سينيٽر بڻائي اقتصادي معاملن جو وزير بڻايو ويو، جڏهن ته توقير شاهه بيوروڪريسي، ڪابينا ڊويزن ۽ اسٽيبلشمينٽ ڊويزن جي معاملن تي وزيراعظم کي مشورا ڏيندو آهي. ٻئي تمام اهم پوزيشنز تي آهن ۽ سندن چيل ڳالهه کي وزيراعظم جو حڪم ئي سمجهيو ويندو آهي.هاڻي اهي خبرون آهن ته وزيراعظم هائوس ۾ سلمان شهباز پنهنجا سمورا معاملا (چاهي اهي قانوني هجن يا قانون کان هٽي ڪري) انهن ئي ٻنهي شخصيتن ذريعي ڪرائيندو آهي. هي هڪ قسم جي گهريلو ڪچن ڪابينا آهي. فيصل واوڊا اڳ ۾ جنهن آٽوموبائل اسڪينڊل جو ذڪر ڪيو هو، اهو به هنن ڏانهن اشارو هو. هاڻي چيو پيو وڃي ته ايندڙ ڏينهن ۾ ڪابينا جي تبديلين ۾ شايد انهن ٻنهي کي هٽايو وڃي. اسلام آباد يا پنڊي جا پريشر گروپ اڪثر اهڙيون ڪهاڻيون سامهون آڻيندا آهن ته جيئن سياسي حڪومت پاڻ ئي پنهنجي اصلاح ڪري وٺي. پاڪستان ۾ لکين ڊالرن جا ٺيڪا ۽ منصوبا وزيراعظم جي هڪ صحيح سان طئي ٿيندا آهن، تنهنڪري انهن عهدن تي تمام محتاط رهڻ جي ضرورت هوندي آهي. نون ليگ ميڊيا فرينڊلي پارٽي آهي، ان ڪري ميڊيا مٿن تائين زبان ناهي کوليندو جيستائين مٿان کان اشارو نه ملي. ٻئي پاسي پائيدار ترقياتي پروگرام (تحت، جيڪو 2025-26 لاءِ ڪابينا ڊويزن ذريعي غربت جي خاتمي لاءِ شروع ڪيو ويو هو، ان ۾ 75 ارب روپين جو اسڪينڊل ٿيو آهي. هاڻي ڪابينا ڊويزن کي مانيٽرنگ پلان بڻائڻ لاءِ چيو پيو وڃي، پر ڪو به اهو نٿو ٻڌائي ته اهي 75 ارب رپيا ڪيڏانهن ويا؟ ڪنهن خرچ ڪيا ۽ ڪنهن کي الاٽ ٿيا؟ هي وزارت احسن اقبال جي هٿ ۾ آهي، جيڪو پلاننگ اينڊ ڊيولپمينٽ جو وزير آهي. سڀاڻي اهو سوال احسن اقبال تي اٿندو ته هي رقم ڪيڏانهن وئي؟ . ٻئي پاسي اطلاعات واري وفاقي وزير عطا تارڙ جي وزارت خطري ۾ آهي،هي مسلم ليگ نون جو اندروني معاملو آهي. پنجاب لابي عطا تارڙ مان خوش ناهي. مريم نواز ۽ ميواز شريف جي خواهش هئي ته طلال چوڌري کي اطلاعات جو وزير بڻايو وڃي، ڇاڪاڻ ته سندن خيال ۾ طلال چوڌري وڌيڪ جارحاڻي نموني پارٽي جو بيانيو وفاقي سطح تي پيش ڪري سگهي ٿو، جڏهن ته عطا تارڙ ان ۾ ناڪام ويو آهي. ان کان سواءِ، اطلاعات واري وزارت تمام وڏي وزارت آهي جنهن ۾ اشتهارن، ميڊيا لاڳاپن ۽ هڪ مخصوص "خفيه فنڊ” جو معاملو هوندو آهي، جتي ڪرپشن ۽ گهپلن جون شڪايتون آهن. پي ٽي وي ۾ پڻ پگهارن جا مسئلا هلي رهيا آهن. پر عطا تارڙ حمزه شهباز ۽ شهباز شريف جو تمام ويجهو ساٿي آهي. پارٽي جي اندر شهباز شريف ۽ نواز شريف جي پسند ناپسند ۾ فرق هوندو آهي. ان ڪري پنجاب ۾ حمزه ۽ سلمان شهباز کي ڪم ڪرڻ ۾ ڏکيائي ٿيندي آهي ۽ وفاق ۾ پنجاب حڪومت کي مسئلا ايندا آهن. هيءَ هڪ زير زمين سرد جنگ آهي جيڪا ڪڏهن به کليل نموني سامهون نه ايندي، پر خاندان ۽ پارٽي ۾ اهڙا اختلاف موجود آهن.
