ڪراچي(رپورٽر)وڏي وزير مراد علي شاهه چيو ته سنڌ حڪومت ڪيٽي بندر کي عالمي سامونڊي، لاجسٽڪس، صنعتي ۽ توانائي مرڪز بڻائڻ لاءِ پرعزم آهي.هن چيو ته  شهيد ذوالفقار علي ڀٽو پورٽ قاسم جو بنياد رکيو هو، جڏهن ته شهيد بينظير ڀٽو جي ويزن تحت هاڻي بلاول ڀٽو زرداري ڪيٽي بندر جي ذريعي نئين معاشي دور جي شروعات ڪرڻ چاهي ٿو.سندس چوڻ هو ته پورٽ قاسم کان پوءِ ڪيٽي بندر سنڌ جي معاشي ترقي جو ايندڙ وڏو سنگ ميل ثابت ٿيندو.وڏي وزير اميد ظاهر ڪئي ته ڪيٽي بندر جي تعمير سان پاڪستان عالمي واپاري رستن سان وڌيڪ مضبوط نموني ڳنڍجي ويندو.هن ٻڌايو ته ڪيٽي بندر منصوبو ڌابيجي اسپيشل اڪنامڪ زون ۽ ٿر جي ڪوئلي جي وسيلن سان ڳنڍيو ويندو، جنهن سان صنعت، واپار ۽ توانائي جي شعبن ۾ نيون موقعا پيدا ٿيندا.مراد علي شاهه چيو ته حڪومت جو مقصد ڪيٽي بندر کي پاڪستان جو نئون معاشي ۽ سامونڊي گيٽ وي بڻائڻ آهي، جيڪو ملڪ جي برآمدات، سيڙپڪاري ۽ روزگار جي موقعن ۾ نمايان اضافو آڻڻ ۾ مددگار ثابت ٿيندو.

ڪراچي(رپورٽ:ذوالفقار راڄپر) سنڌ جي وڏي وزير سيد مراد علي شاهه مالي سال 2026-27ع جي بجيٽ پيش ڪري ڇڏي،سنڌ جي سرڪاري ملازمن جي پگهارن ۽ پينشن ۾ 7 سيڪڙو واڌ جو اعلان ڪيو ويو آهي، جڏهن ته سرڪاري ملازمن جا ايڊهاڪ رليف الائونس 2022ع ۽ 2025ع بنيادي پگهار ۾ ضم ڪرڻ جو به اعلان ڪيو ويو آهي. سنڌ ۾ گهٽ ۾ گهٽ ماهوار اجرت 40 هزار رپين مان وڌائي 43 هزار رپيا مقرر ڪئي وئي آهي.سنڌ حڪومت نئين مالي سال جي ترقياتي بجيٽ ۾ ڪا به نئين رٿا شامل نه ڪرڻ جو فيصلو ڪيو آهي، بجيٽ دستاويزن موجب صوبي جي آمدني جو سڀ کان وڏو ذريعو وفاق کان ملندڙ فنڊ هوندا، جن جو حجم 2 هزار 263 ارب رپين کان وڌيڪ آهي، جيڪو مجموعي آمدني جو لڳ ڀڳ ٻه ٽهائي حصو بڻجي ٿو.صوبائي ٽيڪس آمدني جو هدف 690 ارب رپيا مقرر ڪيو ويو آهي، جڏهن ته غير ٽيڪس آمدني 85 ارب رپيا، سيڙپڪاري مان وصوليون 68 ارب 34 ڪروڙ رپيا ۽ وفاقي گرانٽس 64 ارب 33 ڪروڙ رپيا متوقع آهن.پرڏيهي قرضن ۽ گرانٽن جي مد ۾ 8 ارب 14 ڪروڙ رپيا شامل ڪيا ويا آهن، جڏهن ته 90 ارب رپين جو ڪيش بيلنس به دستياب هوندو.حڪومت ايندڙ مالي سال لاءِ 720 ارب 38 ڪروڙ رپين جي ترقياتي بجيٽ تجويز ڪئي آهي، جيڪا گذريل مالي سال جي 1018 ارب رپين جي مقابلي ۾ تقريباً 29 سيڪڙو گهٽ آهي.جڏهن ته پرڏيهي سهڪار سان هلندڙ منصوبن ۽ پروگرامن لاءِ 256 ارب 5 ڪروڙ رپيا مختص ڪيا ويا آهن.تعليم جي شعبي لاءِ 620 ارب رپيا رکيا ويا آهن، جڏهن ته اسڪولن جي مخصوص بجيٽ وڌائي 22 ارب 64 ڪروڙ رپيا ڪئي وئي آهي. يونيورسٽين جي گرانٽن ۾ 10 سيڪڙو واڌ پڻ ڪئي وئي آهي.صحت جي شعبي لاءِ 393 ارب 16 ڪروڙ رپيا مختص ڪيا ويا آهن، جن مان 148 ارب 17 ڪروڙ رپيا وڏين اسپتالن ۽ صحت مرڪزن کي گرانٽن جي صورت ۾ ڏنا ويندا.بلدياتي خدمتون: 306 ارب رپيا امن امان ۽ عوامي تحفظ: 222 ارب 30 ڪروڙ رپيا زراعت، مالداري ۽ خوراڪ: 61 ارب 90 ڪروڙ رپيا سماجي خدمتون: 57 ارب 90 ڪروڙ رپين کان وڌيڪ بلدياتي ادارن کي 155 ارب رپيا منتقل ڪيا ويندا، جڏهن ته مڪاني حڪومت کاتي جو بجيٽ 151 ارب رپيا رکيو ويو آهي.بجيٽ ۾ غريب ۽ ڪمزور طبقن لاءِ ڪيترائي نوان فلاحي پروگرام پڻ شامل ڪيا ويا آهن.بينظير هاري ڪارڊ لاءِ 3 ارب رپيا غريب آبادگارن لاءِ ڪچن گارڊننگ ڪِٽس بينظير هائوسنگ سيل پيپلز آءِ ٽي پروگرام ننڍن ۽ وچولي درجي جي ڪاروبارن جي سهائتا لاءِ 2، 2 ارب رپيا رکيا ويا،خصوصي ماڻهن لاءِ معاون اوزارن، اکين جي لينس سهائتا ۽ گوگل گلاسز جي فراهمي لاءِ 1.1 ارب رپيا رکيا ويا آهن، جڏهن ته يتيم ٻارن ۽ بيوه عورتن جي مدد لاءِ به خاص پروگرام متعارف ڪرايو ويو آهي.جڏهن ته غير ترقياتي خرچن لاءِ 2 هزار 560 ارب رپيا مختص ڪرڻ جي تجويز ڏني وئي آهي.تعليم جي شعبي لاءِ 25.9 ارب رپيا رکيا ويا آهن، جڏهن ته تعليمي سهائتا خدمتن تي سيلز ٽيڪس گهٽائي 5 سيڪڙو ڪيو ويو آهي.وڏي وزير سيد مراد علي شاهه مالي سال 27-2026 لاءِ اٽڪل 3.41 ٽريلين رپين جي ڪاٿي اوڳاڙي جي ڀيٽ ۾ 3.652 ٽريلين رپين جي بجيٽ پيش ڪئي آهي جنهن جي نتيجي ۾ نوان ٽيڪس لڳائڻ کان سواءِ اٽڪل 242 ارب رپين جي خساري لڳائڻ ھجڻ جو امڪان آهي. ان بجيٽ ۾ پگهارن ۽ پينشن ۾ ست سيڪڙو واڌ، 400 ارب رپين جو ترقياتي پروگرام، 13.2 ارب رپين جو سوشل پروٽيڪشن پيڪيج، ۽ سنڌ کي واپار، مالي معاملن، ٽيڪنالاجي ۽ تجديد جوڳي توانائي جو علائقائي مرڪز بڻائڻ لاءِ ڊگهي مدي وارن اقدامات جو سلسلو شامل آهي. سنڌ اسيمبليءَ ۾ بجيٽ پيش ڪندي، مسٽر شاهه چيو ته صوبي هي مالي منصوبو هڪ اهڙي مشڪل عالمي ۽ ملڪي ماحول ۾ تيار ڪيو آهي جيڪو جيو پوليٽيڪل ڇڪتاڻ، مهانگائي جي دٻاءُ، موسمياتي خطرن ۽ معاشي غير يقيني جي لپيٽ ۾ آهي. هن چيو ته جيتوڻيڪ گذريل مالي سال دوران پاڪستان جي معيشت ۾ سڌاري جا آثار نظر آيا آهن، پر عام شهرين کي زندگي گذارڻ جي وڌندڙ خرچن، توانائي جي قيمتن ۽ مهانگائي سبب اڃا تائين مشڪلاتن جو منهن ڏسڻو پئجي رهيو آهي، وڏي وزير پهرين جولاءِ کان پگهارن ۽ پينشن ۾ ست سيڪڙو واڌ جو اعلان ڪيو. پگهارن ۾ 2022 ۽ 2025 جي ايڊهاڪ ريليف الائونسز (ARA) کي ضم ڪري ست سيڪڙو واڌ ڪئي وئي آهي. گهٽ ۾ گهٽ اجرت به 40,000 رپين مان وڌائي 43,000 رپيا في مهينو ڪئي وئي آهي. وڏي وزير چيو ته حڪومت ڪمزور طبقن کي معاشي مشڪلاتن کان بچائڻ لاءِ پرعزم آهي ۽ هن 13.2 ارب رپين جي سوشل پروٽيڪشن پيڪيج جو اعلان ڪيو جنهن ۾ ڪچن گارڊن انيشيٽو، بينظير هاري ڪارڊ پروگرام، بينظير وومين ايگريڪلچر ورڪرز پروگرام ۽ بيواهن ۽ يتيم ٻارن لاءِ امدادي اسڪيمون شامل آهن. ترقياتي پاسي مالي سال 27 لاءِ سالياني ترقياتي پروگرام (ADP) ۾ تعليم لاءِ 25.9 ارب رپيا، صحت لاءِ 17.4 ارب رپيا، لوڪل گورنمينٽ ۽ ميونسپل انفراسٽرڪچر لاءِ 121.6 ارب رپيا، پبلڪ هيلٿ انجنيئرنگ لاءِ 40.9 ارب رپيا، آبپاشي لاءِ 30.9 ارب رپيا، ٽرانسپورٽ ۽ ڪميونيڪيشن لاءِ 39.5 ارب رپيا ۽ زراعت ۽ لائيو اسٽاڪ لاءِ 6.3 ارب رپيا مختص ڪيا ويا آهن. مصنوعي ذهانت، ڪلائوڊ ڪمپيوٽنگ ۽ ڊجيٽل انفراسٽرڪچر جي وڌندڙ عالمي گهرج کي نظر ۾ رکندي، حڪومت "سنڌ گرين ڊيٽا انفراسٽرڪچر انيشيٽو” جو اعلان ڪيو. هي منصوبو تجديد جوڳي توانائي تي هلندڙ ٽيڪنالاجي زون ۽ صوبي ۾ موجود سولر ۽ ونڊ انرجي جي وسيلن جي مدد سان وڏي پيماني تي ڊيٽا سينٽر پارڪ قائم ڪرڻ جو خواهان آهي. اهم الائونسمينٽ ۾ لوڪل گورنمينٽ جي منصوبن لاءِ 121.6 ارب رپيا، پبلڪ هيلٿ انجنيئرنگ لاءِ 40.9 ارب رپيا، ٽرانسپورٽ ۽ ڪميونيڪيشن لاءِ 39.5 ارب رپيا، آبپاشي لاءِ 30.9 ارب رپيا، تعليم لاءِ 25.9 ارب رپيا ۽ صحت لاءِ 17.4 ارب رپيا شامل آهن. ڪراچي جي مخصوص منصوبن ۾ گريٽر ڪراچي سيوريج پلان (S-III)، لياري ٽرانسفارميشن پيڪيج، ٽريفڪ ڪوريڊور جي بهتري، روڊن جي بحالي جون اسڪيمون ۽ فائر برگيڊ سروسز کي جديد بڻائڻ شامل آهن.

سنڌ اسيمبلي ۾ ” 30 هزار ارب رپين جو حساب ڏيو، ڪرپشن نه تعليم گهرجي“ جا نعرا

ڪراچي(رپورٽر) سنڌ اسيمبلي اجلاس دوران وڏي وزير جي بجيٽ تقرير جي شروعات تي مخالف ڌر ۽ ايم ڪيو ايم پاڪستان جي ميمبرن سخت نعريبازي ۽ گوڙ ڪيو. جماعت اسلامي ۽ پاڪستان تحريڪ  انصاف جا ميمبر پڻ احتجاج طور پنهنجي سيٽن تان اٿي بيٺا. اپوزيشن ليڊر علي خورشيدي چيو ته هڪ طرفو نظام هلي رهيو آهي، بجيٽ کان اڳ شهري سنڌ جي نمائندن سان ڪو به صلاح مشورو نه ڪيو ويو، تنهن ڪري احتجاج سندن جمهوري حق آهي.اسپيڪر اويس قادر شاهه اپوزيشن کي پرامن رهڻ جي اپيل ڪئي، پر ايم ڪيو ايم پاڪستان بجيٽ تقرير جو بائيڪاٽ ڪندي ايوان مان نڪري وئي. مخالف ڌر جي ميمبرن ايوان کان ٻاهر به احتجاج جاري رکيو ۽ بينر کنيا، جن تي "18 سالن جو حساب ڏيو”، "30 هزار ارب رپين جو حساب ڏيو”، "ڪرپشن نه، تعليم گهرجي” ۽ "سرڪاري بابو بجيٽ نامنظور” جهڙا نعرا لکيل هئا. سنڌ اسيمبلي ۾ موجود سڀني مخالف ڌر جي جماعتن گڏيل طور تي نئين مالي سال جي بجيٽ کي لفظن جي هير ڦير تي ٻڌل قرار ڏيندي ان کي عوام دشمن بجيٽ چئي رد ڪري ڇڏيو آهي ۽ اعلان ڪيو آهي ته بجيٽ بحث دوران به احتجاج جاري رکيو ويندو.اهڙن خيالن جو اظهار علي خورشيدي، شبير قريشي ۽ محمد فاروق بجيٽ اجلاس جي بائيڪاٽ کان پوءِ گڏيل پريس ڪانفرنس دوران ڪيو.علي خورشيدي چيو ته بجيٽ ۾ شهري سنڌ جي نمائندگي نظر نٿي اچي. سندن جماعت ان بجيٽ کي رد ڪري ٿي. افتخار عالم چيو ته سنڌ ۾ تعليم ۽ صحت جون سهولتون ناڪافي آهن، جڏهن ته ڪراچي کي بجيٽ ۾ مڪمل طور نظرانداز ڪيو ويو آهيجماعت اسلامي جي پارلياماني ليڊر محمد فاروق چيو ته مخالف ڌر ڪراچي ۽ سڄي صوبي جي حقن لاءِ آواز اٿاري رهي آهي. هن دعويٰ ڪئي ته ڪراچي صوبي جي آمدني ۾ وڏو حصو ڏئي ٿو، پر ان جي باوجود شهر کي مناسب وسيلا نٿا ڏنا وڃن. سندس چوڻ هو ته هي اشرافيه ۽ ڪرپشن کي هٿي ڏيندڙ بجيٽ آهي. پي ٽي آءِ جي پارلياماني ليڊر شبير قريشي چيو ته هي بجيٽ ڪراچي ۽ حيدرآباد دشمن بجيٽ آهي.

انشورنس ايجنٽن ۽ زرعي سپر ٽيڪس ۾ رعايتن جو اعلان

ڪراچي(رپورٽر) وڏي وزير مراد علي شاهه بجيٽ تقرير دوران چيو ته پوائنٽ آف سيل (پي او ايس) سان ڳنڍيل بيوٽي سيلونن ۽ اوورسيز روزگار ڀرتي ڪندڙ ايجنسين لاءِ رعايتي ٽيڪس پاليسي برقرار رکي وئي آهي.هن اعلان ڪيو ته انشورنس ايجنٽن ۽ بروڪرن تي لاڳو ڪجهه ٽيڪسن ۾ گهٽتائي ڪئي پئي وڃي ته جيئن انشورنس شعبي کي هٿي ملي ۽ ڪاروباري سرگرمين ۾ آساني پيدا ٿئي.وڏي وزير موجب زرعي شعبي کي رليف ڏيڻ لاءِ زرعي سپر ٽيڪس ۾ پڻ اهم رعايتون ڏنيون ويون آهن.زرعي سپر ٽيڪس کان استثنا جي حد 15 ڪروڙ رپين (150 ملين) مان وڌائي 50 ڪروڙ رپين (500 ملين) تائين ڪئي وئي آهي. زرعي سپر ٽيڪس جي شرح 10 سيڪڙو مان گهٽائي 8 سيڪڙو ڪئي وئي آهي. مراد علي شاهه چيو ته انهن قدمن  جو مقصد آبادگارن، زرعي ڪاروبار ۽ لاڳاپيل شعبن تي مالي بار گهٽائڻ ۽ معاشي سرگرمين کي هٿي ڏيڻ آهي.

سنڌ بجيٽ ۾ بلوچستان ۽ گلگت لاءِ اربين رپيا رکڻ تي حڪومت مٿان تنقيد

ڪراچي (عوامي آواز نيوز) سنڌ جي بجيٽ ۾ بلوچستان ۽ گلگت بلتستان لاءِ به اربين رپيا رکيا ويا، بٽ خيله ۽ مالاڪنڊ ۾ وومن ٽيڪنيڪل ووڪيشنل ايجوڪيشنل اينڊ ٽريننگ انسٽيٽيوٽ، صحبت پور ۽ جعفرآباد ضلعن ۾ ٻوڏ متاثرن لاءِ 4500 گهرن جي اڏاوت لاءِ 2 ارب رپيا مختص ڪيا ويا، جنهن تي سوشل ميڊيا تي باهه ٻري وئي، سوشل ميڊيا واهپيدارن طرفان سنڌ حڪومت تي تنقيد ڪندي چيو ويو آهي ته پنهنجو صوبو نٿا سڀنالي سگهن وري هليا آهن ٻين صوبن لاءِ پئسا رکڻ، ڪراچي سوڌو سڄي سنڌ تباهه لڳي وئي آهي، روڊ ٽٽا پيا آهن، صحت جون سهولتون ناهن، اسپتالن ۾ ڪُتي چڪ ۽ ٻيون ويڪسين نٿيون ملن، پنهنجا مسئلا ڇڏي حڪومت کي گلگت ۽ بلوچستان جي عوام جي ڳڻتي آهي، واهپيدارن مطالبو ڪيو ته حڪومت کي پنهنجي صوبي تي ڌيان ڏيڻ گهرجي، سنڌ جو عوام بک مري رهيو آهي، پاڻي ناهي، صحت جون سهولتون ناهن انهن تي ڌيان ڏنو وڃي.

سنڌ بجيٽ ۾ ڪراچي لاءِ 100 ارب 19 ڪروڙ رپيا مختص

ڪراچي(رپورٽر)ڪراچي کي صوبي جو معاشي انجڻ قرار ڏيندي، وڏي وزير سيد مراد علي شاهه چيو ته سنڌ حڪومت مالي سال 27-2026 جي بجيٽ ۾ شهر جي ترقي کي خاص ترجيح ڏني آهي. هن ايوان کي آگاهه ڪيو ته ڪراچي جو ترقياتي پورٽ فوليو 816 اسڪيمن تي مشتمل آهي جنهن جي ڪل ڪاٿي لاڳت 644.3 ارب رپيا آهي. ايندڙ مالي سال لاءِ ڪراچي جي منصوبن لاءِ 100.19 ارب رپيا رکيا ويا آهن جڏهن ته شهر جي سطح جي اقدامات سميت 822 اسڪيمن لاءِ ڪل الائونسمينٽ 108.1 ارب رپيا آهي. وڏي وزير چيو ته سڄي شهر ۾ هن وقت 500 ملين رپين کان وڌيڪ لاڳت جا 167 جاري منصوبا ۽ 1 ارب رپين کان وڌيڪ ماليت جا 110 ميگا پروجيڪٽس هلي رهيا آهن. فنڊن جو هڪ وڏو حصو ڪراچي جي ٽرانسپورٽ انفراسٽرڪچر ۽ ٽريفڪ مينيجمينٽ کي بهتر بڻائڻ لاءِ رکيو ويو آهي. بجيٽ ۾ ائيرپورٽ روڊ کان اسٽار گيٽ تائين 1.2 ارب رپين جو فلائي اوور، ملير ھالٽ کان شاهراهه فيصل تائين 1.5 ارب رپين جو رائٽ ٽرن انڊر پاس، ۽ گجر نالي جي مٿان سر شاهه سليمان روڊ ڪراسنگ تي 1.65 ارب رپين جو فلائي اوور شامل آهن. شاهراهه ڀٽو-ڪورنگي ڪازوي جنڪشن، عظيم پوره انٽرسيڪشن فلائي اوور پروجيڪٽ، ملير ايڪسپريس وي سان جڙيل نوان انٽرچينجز، ۽ خيابانِ اتحاد ۽ خيابانِ شهباز تي انڊر پاسز لاءِ پڻ فنڊ رکيا ويا آهن. شهري نيڪال ۽ ٻوڏ جي لچڪ کي بهتر بڻائڻ لاءِ، حڪومت وڏن برساتي نالن جي بحالي جي ٽئين فيز، گجر نالي ۽ ان جي سروس روڊن جي بحالي، ۽ ايم-9 کان ٿڌو نالي تائين برساتي پاڻي جي نيڪال واري منصوبي لاءِ فنڊ رکيا آهن. ڪراچي واٽر اينڊ سيوريج سروسز امپروومينٽ پروجيڪٽ فيز-II ۽ گريٽر ڪراچي سيوريج پلان) لاءِ پڻ فنڊنگ رکي وئي آهي. ٽرانسپورٽ سيڪٽر ۾، حڪومت ريڊ لائين بس ريپڊ ٽرانزٽ (BRT) منصوبي لاءِ 13.2 ارب رپيا ۽ يلو لائين BRT ڪوريڊور لاءِ 3.5 ارب رپين کان وڌيڪ مختص ڪيا آهن،

سنڌ حڪومت پاران 2 لک 75 هزار سولر سسٽم ورهائڻ جو اعلان

ڪراچي(رپورٽر)سنڌ حڪومت مالي سال 2026-27ع جي بجيٽ ۾ صوبي جي وچولي طبقي لاءِ رعايتي سولر مالياتي پروگرام متعارف ڪرائڻ جو اعلان ڪيو آهي.سنڌ اسيمبلي ۾ بجيٽ تقرير دوران مراد علي شاهه چيو ته هن پروگرام تحت 18 ارب رپين جي لاڳت سان 2 لک 75 هزار سولر هوم سسٽم فراهم ڪيا ويندا.وڏي وزير موجب ان رٿا جو مقصد بجلي جي وڌندڙ خرچن کان عوام کي رليف فراهم ڪرڻ ۽ متبادل توانائي جي استعمال کي هٿي ڏيڻ آهي.هن چيو ته سنڌ حڪومت اڳ ۾ به غريب خاندانن کي مفت سولر سسٽم فراهم ڪري چڪي آهي، جڏهن ته هاڻي وچولي آمدني وارن خاندانن کي به سولر توانائي جون سهولتون مهيا ڪرڻ لاءِ نئون پروگرام شروع ڪيو پيو وڃي.سندس چوڻ هو ته هي قدم نه رڳو گهريلو بجلي جي خرچن ۾ گهٽتائي آڻيندو، پر صاف ۽ ماحول دوست توانائي جي فروغ ۾ پڻ مددگار ثابت ٿيندو.

ڪيٽي بندر رٿا سنڌ جي معاشي ترقي جو نئون باب ثابت ٿيندي:شرجيل ميمڻ

ڪراچي(رپورٽر)سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ سنڌ حڪومت جي مالي سال 2026-27 جي بجيٽ کي عوام، متوازن ۽ ترقياتي اوليتن جو آئينو قرار ڏيندي چيو آھي تھ پاڪستان پيپلز پارٽي جي سنڌ حڪومت سدائين عوامي فلاح، روزگار، تعليم، صحت، بنيادي ڍانچي ۽ معاشي ترقي کي پنھنجي اوليتن ۾ رکيو آھي. ھي بجيٽ سنڌ جي روشن مستقبل، معاشي استحڪام ۽ عوامي خوشحالي جي مضبوط بنياد ثابت ٿيندي. ھڪ بيان ۾ هن چيو تھ ٽيڪس فري بجيٽ سنڌ جي عوام جي لاءِ يليف، ترقي ۽ خوشحالي جو پيغام آھي، ھن چيو تھ سنڌ حڪومت جو ترقياتي ويزن رڳو اعلانن تائين محدود ناھي، پر  عملي قدمن تي بھ ٻڌل آھي، هن چيو تھ سنڌ پيپلز ھائوسنگ پروگرام پاڪستان جي تاريخ جو ھڪ منفرد عوامي فلاحي منصوبو آھي، جنھن جي ذريعي لکين خاندانن کي پنھنجا گھر ڏنا پيا وڃن. اسڪولن جي تعمير، استادن جي ڀرتين، جديد طبي سھولتن جي فراھمي ۽ صحت جي ادارن کي توسيع تي بھ خاص ڌيان ڏنو ويو آھي. هن چيو تھ بينظير ھاري ڪارڊ، زرعي مشينري، زرعي انشورنس ۽ مالي سھولتن جي فراھمي جي ذريعي زرعي شعبي کي مضبوط بڻايو ويندو، ھن چيو تھ ڪراچي سميت سمورن ضلعن ۾ ترقياتي رٿائن تي خاص ڌيان ڏنو ويو آھي ۽ ڪراچي جي ميگا پروجيڪٽس جي لاءِ اربين رُپيا رکيا ويا آھن. ھن چيو تھ ڪيٽي بندر منصوبو سنڌ جي معاشي ترقي جو نئون باب ثابت ٿيندو جيڪو پاڪستان کي عالمي واپارن رستن سان وڌيڪ اثرائتي نموني ڳنڍيندو،

پبلڪ پرائيوٽ پارنٽرشپ تحت ڪچري مان ڪارائتيون شيون ٺاهڻ جي رٿا

ڪراچي(رپورٽر)سنڌ حڪومت پي پي پي فريم ورڪ تحت هڪ مربوط ويسٽ-ٽو-ويلو ۽ سرڪيولر اڪنامي پروگرام شروع ڪرڻ جي منصوبن جو پڻ اعلان ڪيو.  هي اقدام ريسائڪلنگ، ريفيووز مان تيار ڪيل فيول جي پيداوار، ميٿين ڪيپچر ۽ ڪاربان ڪريڊٽ جي پيداوار ذريعي ميونسپل ويسٽ (شهري ڪچري) کي اقتصادي وسيلن ۾ تبديل ڪرڻ تي ڌيان ڏيندو. عنواڻن کي اُميد آهي ته هي پروگرام شهري ماحولياتي انتظام کي بهتر بڻائيندو ۽ گڏوگڏ آمدني جا نوان ذريعا ۽ گرين روزگار جا موقعا پيدا ڪندو.

سنڌ انٽرنيشنل فنانشل سينٽر قائم ڪرڻ جو اعلان

ڪراچي(رپورٽر)وڏي وزير ڪراچي ۾ "سنڌ انٽرنيشنل فنانشل سينٽر” قائم ڪرڻ جو اعلان ڪيو آهي، جيڪو انفراسٽرڪچر ماليات، اسلامي ماليات ۽ موسمياتي  ماليات لاءِ هڪ اهم پليٽفارم طور ڪم ڪندو.وڏي وزير چيو ته هي مرڪز عالمي سيڙپڪاري کي هٿي ڏيڻ، مالي خدمتن کي جديد بڻائڻ ۽ سنڌ کي علائقائي مالي مرڪز طور اڀارڻ ۾ اهم ڪردار ادا ڪندو.

نعريبازي سبب وڏي وزير کي تقرير روڪڻي پئي،اپوزيشن جو واڪ آئوٽ

ڪراچي : سنڌ اسيمبلي جي بجيٽ اجلاس ۾ مخالف ڌر پاران سخت احتجاج ۽ نعريبازي  ڪئي وئي، جنهن سبب وڏي وزير مراد علي شاهه کي پنهنجي بجيٽ تقرير روڪڻي پئجي وئي. ايم ڪيو ايم پاران بجيٽ تقرير جو بائيڪاٽ ڪندي ايوان مان واڪ آئوٽ ڪيو ويو، اپوزيشن ليڊر علي خورشيدي چيو ته اسان کي اعتماد ۾ ناهي ورتو ويو، ان ڪري اسان بجيٽ تقرير جو بائيڪاٽ ڪريون ٿا.

ڪراچي لاءِ نه ماسٽر پلان جو اعلان ٿيو نه ئي ميگا پروجيڪٽ ڏنو ويو:فوزيا صديقي

ڪراچي (رپورٽر) پاڪستان تحريڪ انصاف ڪراچي جي سيڪريٽري اطلاعات ۽  ترجمان فوزيه صديقي سنڌ حڪومت جي بجيٽ کي ڪراچي دشمن، عوام دشمن ۽ مايوس ڪندڙ قرار ڏيندي چيو آهي ته صوبي جي سڀ کان وڏي شهر ۽ ملڪ جي معاشي شهه رڳ ڪراچي کي هڪ ڀيرو ٻيهر بجيٽ ۾ مڪمل طور نظرانداز ڪيو ويو آهي.هن چيو ته سنڌ حڪومت ڪراچي لاءِ نه ڪنهن نئين ماسٽر پلان جو اعلان ڪيو آهي ۽ نه ئي ڪنهن وڏي ميگا پراجيڪٽ جي منظوري ڏني آهي. ڪراچي جا لکين شهري بنيادي سهولتن کان محروم آهن، پر سنڌ حڪومت جي بجيٽ ۾ انهن جي مسئلن جي حل لاءِ ڪا به سنجيده حڪمت عملي نظر نٿي اچي.ڪراچي اڄ به سخت پاڻي بحران جو شڪار آهي. گذريل 18 سالن کان پيپلز پارٽي جي حڪومت ڪراچي جي عوام سان مسلسل ڪوڙا واعدا ۽ دعوائون ڪندي رهي آهي، پر شهري اڄ به پاڻي، نيڪال، صحت، تعليم ۽ ٽرانسپورٽ جهڙين بنيادي سهولتن کان محروم آهن. هن چيو ته ڪراچي جا روڊ رستا تباهه حال آهن، ڊرينيج سسٽم ناڪاره ٿي چڪو آهي، برساتي نالا گندگي سان ڀرجي چڪا آهن،