اسلام آباد(عوامي آواز نيوز) انساني حقن واري ڪميشن پاڪستان (ايڇ آر سي پي) پاڪستان جي انتظام هيٺ ڪشمير ۾ حڪومت طرفان جوائنٽ عوامي ايڪشن ڪميٽي تي دهشتگردي ٽوڙ قانونن تحت پابندي لاڳو ڪرڻ واري فيصلي تي گهري ڳڻتي جو اظهار ڪيو آهي.ايڇ آر سي پي پنهنجي بيان ۾ چيو آهي ته اها پابندي اهڙي وقت لاڳو ڪئي وئي آهي، جڏهن مذڪوره ڪميٽي 9 جون تي عوامي احتجاج جي سڏ ڏئي چڪي هئي.ڪميشن موجب اهڙي گروهه خلاف دهشتگردي ٽوڙ قانونن جو استعمال، جيڪو سياسي، سماجي ۽ معاشي مطالبن لاءِ سرگرم رهيو آهي، ڪيترن ئي سنجيده سوالن کي جنم ڏئي ٿو.بيان ۾ چيو ويو آهي ته هن قدم سبب علائقي ۾ پرامن گڏجاڻين ۽ اختلافِ راءِ جي اظهار لاءِ موجود گنجائش گهٽجڻ بابت خدشا پيدا ٿي رهيا آهن.ايڇ آر سي پي خبردار ڪيو آهي ته اهڙي قسم جا قدم شهري آزادين تي ممڪن پابندين جي نشاندهي ڪن ٿا.ڪميشن وڌيڪ چيو ته جولاءِ ۾ ڪشمير ۾ ٿيندڙ چونڊن جي ويجهو اچڻ جي پسمنظر ۾ بنيادي حقن جي مڪمل تحفظ کي يقيني بڻائڻ انتهائي ضروري آهي. انهن حقن ۾ اظهارِ راءِ جي آزادي، تنظيم سازي جو حق ۽ پرامن اجتماع جو حق شامل آهن.ايڇ آر سي پي جو چوڻ آهي ته جمهوري عمل جي ساک برقرار رکڻ لاءِ لازمي آهي ته شهرين کي بنا ڪنهن خوف ۽ دٻاءَ جي پنهنجن خيالن جي اظهار ۽ پرامن احتجاج ڪرڻ جي اجازت ڏني وڃي.
