اسلام آباد (ويب ڊيسڪ) جمعيت علماءَ اسلام (جي يو آءِ) ”چائلڊ ميريج ريسٽرينٽ ايڪٽ 2025“ خلاف وفاقي شرعي عدالت سان رابطو ڪري ورتو آهي.
جي يو آءِ پنهنجي درخواست ۾ موقف اختيار ڪيو آهي ته قانون ۾ 18 سالن کان گهٽ عمر جي هر فرد کي ٻار قرار ڏيڻ اسلامي فقهي اصولن سان ٽڪراءُ آهي.
درخواست ۾ ڄاڻايو ويو آهي ته شادي لاءِ 18 سالن جي لازمي عمر اسلامي تعليم سان هڪجهڙائي نٿي رکي، جڏهن ته قانون ۾ تجويز ڪيل لازمي سزائون عدالتي اختيار کي محدود ڪن ٿيون.
جي يو آءِ جو چوڻ آهي ته کين ٻارن جي تحفظ تي ڪو به اعتراض ناهي، پر قانون کي قرآن ۽ سنت جي روشني ۾ هم آهنگ بڻايو وڃي.
درخواست ۾ استدعا ڪئي وئي آهي ته تڪراري شقن جو ٻيهر جائزو ورتو وڃي ۽ غير معمولي حالتن ۾ عدالتي ڇوٽ جو طريقو متعارف ڪرايو وڃي.
واضح رهي ته اپريل ۾ پنجاب جي لوڪل گورنمينٽ بابت اسٽينڊنگ ڪميٽي ”پنجاب چائلڊ ميريج آرڊيننس 2026“ جي منظوري ڏني هئي، جنهن تحت صوبي ۾ 18 سالن کان گهٽ عمر جي ٻارن جي شادي تي مڪمل پابندي لاڳو ڪئي وئي آهي.
ڪميٽي جو اجلاس چيئرمين پيرا اشرف رسول جي صدارت ۾ ٿيو، جنهن ۾ آرڊيننس جي متن جي منظور ڏني وئي هئي.
نئين آرڊيننس موجب نڪاح وقت گهوٽ ۽ ڪنوار ٻنهي جي عمر 18 سال هجڻ لازمي قرار ڏنو ويو آهي.
