ڪراچي(ويب ڊيسڪ) پاڪستان پيپلز پارٽيءَ جي سينئر اڳواڻ شازيا مري گلگت بلتستان جي اليڪشن ۾ وفاقي حڪومت تي اثر رسوخ ۽ سرڪاري وسيلن جي استعمال جو الزام لڳائي ڇڏيو آهي.
ڪراچيءَ مان جاري ڪيل بيان ۾ شازيا مري چيو ته گلگت بلتستان ۾ وفاقي وزيرن جي چونڊ مهم ۾ موجودگي ۽ سرڪاري مشينريءَ جو استعمال ڳڻتي جوڳو آهي.
هن چيو ته چونڊ عمل ۾ مداخلت شفافيت ۽ منصفاڻن چونڊن تي سواليه نشان آهي، اليڪشن لاءِ ”ليول پلينگ فيلڊ“ اڻٽر آهي.
پ پ اڳواڻ وڌيڪ چيو ته بلاول ڀٽو جي فارم 45 ۽ فارم 47 بابت بيان کي ٽوڙي مروڙي پيش ڪيو پيو وڃي.
هن چيو ته بلاول ڀٽو عوام کي ياد ڏياريو ته گذريل چونڊن ۾ پيپلز پارٽيءَ جون 9 سيٽون کسيون ويون هيون، پ پ چيئرمين عوام کي چيو هو ته توهان جو مينڊيٽ چوري ٿي رهيو آهي، پنهنجي ووٽ ۽ فارم 45 جي حفاظت ڪن.
شازيا مري اهو به چيو ته درست فارم 45 جي موجودگيءَ ۾ ڪنهن کي به عوامي مينڊيٽ چوري ڪرڻ جو موقعو نه ملي سگهندو، فارم 45 چونڊ نتيجن جي بنياد آهي، ان کانپوءِ ئي فارم 47 جاري ڪيو ويندو آهي.
