اسلام آباد(بيورو رپورٽ) مخالف ڌر اتحاد ۽ پي ٽي آءِ اڳواڻن مطالبو ڪيو ته حڪومت فوري طور تي امن بورڊ کان دستبردار ٿئي، ايران جنگ ۾ ڌر نه بڻجي ۽ پيٽروليم شين جي قيمتن ۾ واڌ کي فوري طور تي واپس وٺي. پي ٽي آءِ اڳواڻن سلمان اڪرم راجا، بابر اعواڻ ۽ علامه راجا ناصر عباس سومر ڏينهن اسلام آباد ۾ پريس ڪانفرنس ڪئي.پي ٽي آءِ جي سيڪريٽري جنرل سلمان اڪرم راجا چيو ته هن وقت نار جا ملڪ هڪ غير معمولي صورتحال کي منهن ڏئي رهيا آهن، خطي تي بربريت مسلط ڪئي وئي آهي. هن چيو ته عمان ۾ ٿيندڙ ڳالهيون ڪنهن نتيجي تي پهچڻ واريون هيون، پر صيهوني قوتن سڀ ڪجهه تباهه ڪري ڇڏيو، وقت اچي ويو آهي ته پاڪستان پنهنجو ڪردار ادا ڪري ڇو ته اسان هڪ ايٽمي طاقت آهيون. سلمان اڪرم راجا چيو ته بدقسمتي سان پاڪستان ۾ ادارن ۽ ماڻهن کي هڪ ٻئي جي خلاف بيهاريو پيو وڃي، ملڪ ۾ ڪوڙ ذريعي انتشار پيدا ڪيو ويو آهي ۽ ماڻهن تي هڪ جعلي، ڪوڙي حڪومت مسلط ڪئي وئي آهي. سلمان اڪرم راجا چيو ته عرب ملڪن يا ٻين ملڪن ۾ ملڪيتن کي نقصان نه پهچڻ گهرجي، هاڻي سڀني کي گڏجي ويهڻو پوندو ۽ مسئلن جو حل ڳولڻو پوندو، سڀني کي ڳالهين جي ميز تي ويهڻو پوندو. هن چيو ته ماضي ۾ ڪيل غلطيون نه ورجائڻ گهرجن، هڪ ڏينهن اڳ ماڻهن کي غير حاضري ۾ سزا ڏني وئي، ڪل سزائون 50 سالن تائين پهچي ويون.پي ٽي آءِ اڳواڻ چيو ته پيٽرول جي قيمت ۾ 55 رپيا في ليٽر واڌ ان ڳالهه جو اشارو آهي ته مستقبل ۾ اسان سان ڇا ٿيڻ وارو آهي، خطي جي ڪنهن ٻئي ملڪ پنهنجي قيمت ۾ ايترو اضافو نه ڪيو آهي، جڏهن ته اسان جي ملڪ ۾، اشرافيه هن موقعي جو فائدو ورتو آهي ۽ پنهنجي عيش عشرت کي گهٽائڻ بدران ماڻهن تي بار وڌو آهي.
