نيويارڪ(ع آ نيوز) هڪ آمريڪي ٿنڪ ٽينڪ موجب، آمريڪا ايران خلاف جاري جنگ ۾ روزانو لکين ڊالر خرچ ڪري رهيو آهي، جنهن ۾ هٿيار، دفاعي نظام ۽ آپريشنل خرچ شامل آهن. رپورٽ موجب، هڪ ڊگهي مدي واري جنگ آمريڪي معيشت تي هڪ وڏو بار بڻجي سگهي ٿي. سينٽر فار اسٽريٽجڪ اينڊ انٽرنيشنل اسٽڊيز (سي ايس آءِ ايس) پنهنجي رپورٽ ۾ انڪشاف ڪيو آهي ته صرف ايران تي جاري حملن جي پهرين 100 ڪلاڪن ۾ آمريڪا کي تمام گهڻو نقصان پهتو ۽ ان جو خرچ تقريباً 3.7 ارب ڊالر ٿيو. هي رقم تقريباً 1028 بلين رپيا آهي، جيڪا پاڪستان جي سالياني دفاعي بجيٽ (تقريباً 21 ٽريلين) جو لڳ ڀڳ اڌ آهي، جيڪا آمريڪا صرف 100 ڪلاڪن ۾ جنگ لاءِ وقف ڪئي آهي، يعني چار ڏينهن. رپورٽ موجب، آمريڪا هن جنگ ۾ سراسري طور تي روزانو 891.4 ملين ڊالر خرچ ڪري رهيو آهي، جيڪو پاڪستاني ڪرنسي ۾ لڳ ڀڳ 247 ارب 800 ملين رپيا آهي.رپورٽ ۾ چيو ويو آهي ته ايران تي آمريڪي جنگ جي شروعاتي هوائي ۽ زميني ڪارروائين ۾ تمام گهڻو خرچ آيو، جنهن ۾ جديد ۽ سادا هٿيار شامل هئا. رپورٽ موجب، ايران تي شروعاتي هوائي حملي ۾ تمام گهڻو خرچ آيو ڇاڪاڻ ته ان لاءِ جديد هٿيارن جي استعمال جي ضرورت هئي، پر وقت سان گڏ، آمريڪي فوج گهٽ قيمت وارن هٿيارن ڏانهن منتقل ٿي ويندي، جنهن جي ڪري خرچ گهٽجي ويندا. رپورٽ ۾ وڌيڪ چيو ويو آهي ته جيڪڏهن جنگ ڪيترن ئي هفتن تائين جاري رهي ته آمريڪي دفاع کاتي کي اضافي فنڊ جي ضرورت پوندي ڇاڪاڻ ته موجوده بجيٽ ۾ جنگ جي مڪمل خرچن کي شامل نه ڪيو ويو آهي. . ماهرن جو خيال آهي ته جيڪڏهن جنگ هن شدت سان جاري رهي ته آمريڪا جو ڪل فوجي خرچ 40 ارب ڊالر کان وڌي 95 ارب ڊالر ٿي سگهي ٿو.
