اسلام آباد (ويب ڊيسڪ) پرڏيهي کاتي جو چوڻ آهي ته 26 فيبروري جي رات افغانستان مان ٿيل دهشتگرد حملن ۽ طالبان حڪومت جي چڙ ڏياريندڙ ڪارروائين جي جواب ۾ پاڪستان جي هٿياربند فوجن جوڳا ۽ اثرائتا آپريشنز ڪيا آهن.
پرڏيهي کاتي جي ترجمان طرفان جاري پڌرائيءَ موجب، انهن ڪارروائين ۾ دهشت گرد تنظيمون ۽ سندن لاجسٽڪ مرڪزن کي نشانو بڻايو ويو ، جنهن جي نتيجي ۾ وڏو نقصان ٿيو آهي.
ترجمان موجب، اِهي قدم پاڪستان جي شهري ۽ علائقائي تحفظ لاءِ کنيا ويا آهن، جڏهن ته ڪارروائيون عالمي قانون ۽ گڏيل قومن جي چارٽر موجب آهن.
بيان ۾ چيو ويو آهي ته جيڪڏهن طالبان حڪومت يا ڪنهن دهشتگرد گروهه وڌيڪ چڙڏياريندڙ ڪارروائي ڪئي ته پاڪستان ڀرپور ۽ فيصلائتو جواب ڏيندو.
پاڪستان واضع ڪيو آهي ته هو علائقي ۾ امن ۽ استحڪام چاهي ٿو ۽ ڪيترائي ڀيرا سياسي ۽ سفارتي ذريعن سان مسئلو حل ڪرڻ جي ڪوشش ڪئي آهي، پر طالبان حڪومت ۽ ڀارت جي پٺڀرائي سبب دهشتگرد حملا وڌڻ لڳا.
پاڪستان عالمي برادري کان مطالبو ڪيو آهي ته طالبان حڪومت تي دٻاءُ وجهن ته جيئن اها دهشتگرد گروپن جي حمايت بند ڪري ۽ عملي قدم کڻي.
پاڪستان دهشتگردي جي مڪمل خاتمي جو عزم ورجائيندي چيو آهي ته ملڪ پنهنجي شهرين جي تحفظ لاءِ هر ممڪن قدم کڻڻ جو حق محفوظ رکندو آهي.
