اسلام آباد (م ڊ) وفاقي آئيني عدالت فيصلو ڏنو آهي ته 27 هين آئيني ترميم جي منظوري سان سپريم ڪورٽ جو آئين ۽ قانون جي تشريح جو اختيار ختم ٿي ويو آهي. جسٽس عامر فاروق، آئيني عدالت جي اختيارن بابت هڪ اهم فيصلي ۾ چيو ته 27 هين ترميم کان اڳ، قانون ۽ آئين جي تشريح جو اختيار سپريم ڪورٽ جو هو، نئين آئيني اسڪيم تحت، آئين ۽ قانون جي تشريح جو اختيار آئيني عدالت جو آهي. وفاقي آئيني عدالت جي فيصلي ۾ اهو به چيو ويو آهي ته آئيني عدالت قانون سازي جي آئيني حيثيت جو جائزو وٺي سگهي ٿي، ۽ وفاقي آئيني عدالت کي تشريح جي ڪنهن به ڪيس جو رڪارڊ طلب ڪرڻ جو اختيار پڻ حاصل آهي. جسٽس عامر فاروق سيلز ٽيڪس ڪيس ۾ عدالتي اختيارن جو فيصلو لکيو، جنهن ۾ واضح ڪيو ويو ته 27 هين ترميم سپريم ڪورٽ جي تشريح ۽ قانون سازي جي جائزي جي اختيار کي ختم ڪري ڇڏيو.
