ڪراچي (رپورٽر ) سنڌ جي اطلاعات، ٽرانسپورٽ ۽ ماس ٽرانزٽ جي سينئر وزير شرجيل انعام ميمڻ چيو آهي ته اخبارن کي مالي مدد جو ڪو به طريقو ناهي، تنهن هوندي به حڪومت اخبارن جي سرڪيوليشنکي چيڪ ڪري ٿي ۽ انهن کي اشتهار ڏئي ٿي،خانگي رسالا به مارڪيٽ ۾ موجود آهن،سنڌ اسيمبلي ۾ ڳالهائيندي هن چيو ته اسان هفتيوار اخبارن کي گهٽ اشتهار ڏيون ٿا جڏهن ته حڪومت روزاني اخبارن کي وڌيڪ اهميت ڏئي ٿي. هن چيو ته سنڌ حڪومت صحافين جي مدد لاءِ مختلف پريس ڪلبن ۽ صحافتي تنظيمن کي گرانٽ ڏيندي آهي هن چيو ته سنڌ حڪومت ضرورت مند صحافين کي بنا ڪنهن فرق جي طبي امداد پڻ فراهم ڪري ٿي،اسان صحافين کي چئون ٿا ته خط و ڪتابت ۽ تقريرون بعد ۾ جاري رهنديون، پهرين توهان جو علاج ڪرايون، اسان صحافين لاءِ 24 ڪلاڪ موجود آهيون. پي ٽي آءِ ميمبر سجاد سومرو پڇيو ته ڪيتريون اخبارون شايع ٿين ٿيون ۽ ڪاغذن جي لحاظ کان ڪيتريون آهن. شرجيل ميمڻ چيو ته ڪجهه اخبارن جي سرڪيوليشن سٺي آهي. وفاقي حڪومت اخبارن لاءِ اي بي سي هجڻ لازمي قرار ڏنو آهي. هن چيو ته وفاقي حڪومت اخبارن جي اشتهارن جي شرح پڻ مقرر ڪري ٿي،مون اي پي اين ايس کي اشتهار ورهائڻ لاءِ چيو آهي. انهن اڳ ۾ پنهنجي حمايت جو اظهار ڪيو هو پر پوءِ ڪو جواب نه آيو. جڏهن مون لکت ۾ خط لکيو ته ڪو به جواب نه آيو. هن چيو ته مان اي پي اين ايس کي اشتهار ورهائڻ لاءِ تيار آهيان. سجاد سومرو پڇيو ته ڪيترين اخبارن خلاف غلط خبرون شايع ڪرڻ تي ڪارروائي ڪئي وئي. شرجيل انعام ميمڻ چيو ته جعلي خبرن بابت قانون آهن. اسان قانون ٺاهينداسين ته جيئن اسان غلط خبرن خلاف ڪارروائي ڪري سگهون. اهي قانون سياستدانن تي به لاڳو ٿيڻ گهرجن. جعلي خبرن جي معاملي تي ھڪ پارلياماني ڪميٽي جوڙي قانون سازي ڪئي وڃي تھ اسان اظھار راءِ جي آزادي جي خلاف ناھيون، پر جعلي خبرن جي خلاف آھيون. شرجيل انعام ميمڻ چيو تھ صوبي وٽ بھ اھڙو اختيار ھجڻ گھرجي تھ جيئن ڪو چينل يا فرد غلط خبر ڦھلائي تھ حڪومت سڌي ريت ڪارروائي ڪري سگھي،پارلياماني ڪميٽي اُن معاملي تي غور ڪري هڪ ٻئي سوال جي جواب ۾ هن چيو ته اسان ڊجيٽل ميڊيا کي به اشتهار ڏيڻ شروع ڪيا آهن.
