اسلام آباد(طلعت حسين)هاڻي پاڪستان جي پارليامينٽرين کي اهو خطرو ٻڌايو پيو وڃي ته جيڪڏهن انهن جا اثاثا عوام سامهون ظاهر ٿي ويا ته سندن جان کي خطرو ٿي سگهي ٿو،اهي اثاثا، جيڪي اهي گڏ ڪن ٿا، جيڪي ظاهر ڪيل اثاثا آهن، ۽ جيڪي چونڊ وڙهڻ لاءِ اليڪشن ڪميشن جي ويب سائيٽ تي موجود هجڻ گهرجن، هن قانون سازي کان پوءِ هاڻي ڪنهن ميمبر لاءِ اهو چوڻ ممڪن ٿي ويو آهي ته جيڪڏهن توهان انهن اثاثن جو اظهار ڪيو، ته پوءِ اسان جي جان کي خطرو ٿي سگهي ٿو۔ان معاملي تي پاڪستان جي موجوده حڪومت جو قانون وارو وزير ۽ پاڪستان پيپلز پارٽي جي نمائندن، جن هن بل کي پيش ڪيو، سڀ گڏ ٿي هڪ آواز ۾ چون ٿا ته ها، اهو بلڪل صحيح آهي، اهڙو ٿيڻ نه گهرجي۔پاڪستان تحريڪِ انصاف ان جي مخالفت ڪئي،ڪجهه وقت اڳ هي بل پيش ٿيو هو ته پاڪستان مسلم ليگ (ن) ۽ پاڪستان تحريڪِ انصاف ٻنهي گڏجي ان جي مخالفت ڪئي هئي۔ پر هاڻي حالتون بدلجي ويون آهن۔ هاڻي پيپلز پارٽي بل پيش ڪري ٿي، اسيمبلي ۾ موجود ماڻهو ان جي حمايت ڪن ٿا، ۽ اها ئي حڪومت، جيڪا اڳ پي ٽي آءِ سان گڏ ان بل جي مخالفت ڪندي هئي، هاڻي ان کي پاس ڪرائي قانون بڻائي رهي آهي۔هن قانون ۾ چار يا پنج اهڙا بنيادي مسئلا آهن، جن جي بنياد تي هي قانون سياستدانن لاءِ تحفظ ڏيڻ بدران رڳو شرمندگي جو سبب بڻجي ٿو۔ تحفظ آخر ڪهڙو ملي رهيو آهي؟ پهرين ڳالهه ته ڪيترن ئي سالن کان اثاثا ڊيڪليئر ٿيندا پيا اچن، ڪيترن ئي سالن کان چونڊون وڙهيون پيون وڃن،سوال اهو آهي ته اهي ڪهڙا خطرا آهن، جيڪي هاڻي ٻن سالن اندر سامهون اچي ويا آهن؟ 2024ع ۾ ته اهي خطرا موجود نه هئا، پوءِ ٻن سالن اندر اهڙو ڇا بدلجي ويو؟ٻي ڳالهه، جيڪڏهن خطرو آهي ته ان جو ذريعو ڇا آهي؟ دهشتگرد اوهان جي پويان پيا آهن؟ ڀتاخور اوهان کي نشانو بڻائي رهيا آهن؟ يا اوهان جي پاڙي وارن کي هاڻي خبر پئجي وئي آهي ته اوهان وٽ ڪيتري دولت آهي، ۽ انهن بندوقون ڪڍي چئي ڇڏيو آهي ته اليڪشن ڪميشن جي ويب سائيٽ تان معلومات وٺي هاڻي اوهان جي گهر ۾ ڦر ڪنداسين؟ اهي ڪير آهن؟ خطري جو ذريعو ڪهڙو آهي؟ ڇا ان ۾ را، موساد يا سي آءِ اي شامل آهن؟ خطري جو ذريعو آخر آهي ڪهڙو؟ٽين ڳالهه اها آهي ته جيڪڏهن هن ملڪ ۾ دولت، اثاثا، گاڏيون، زمينون، بئنڪ بيلنس، زيور وغيره ڪنهن جي جان لاءِ خطرو بڻجي سگهن ٿا، ته پوءِ هن ملڪ جو هر امير ماڻهو اهو چئي سگهي ٿو ته هاڻي ايف بي آر کي به اسان جا اثاثا نه ٻڌايا وڃن، ڇاڪاڻته ڊيٽا ليڪ ٿي سگهي ٿي،چوٿين ڳالهه اها آهي ته جيڪڏهن رڳو اميرن جي جان کي خطرو آهي ته پوءِ اپر مڊل ڪلاس، مڊل ڪلاس ۽ لوئر مڊل ڪلاس کي به شامل ڪيو وڃي، ڇوته انهن کي به لڳي ٿو ته سندن دولت سبب هيٺين طبقي مان خطرو ٿي سگهي ٿو۔ لوئر مڊل ڪلاس وٽ شايد رڳو ننڍو گهر يا ننڍي گاڏي هجي، پر جنهن وٽ ڪجهه به ناهي، ان کان به انهن کي خطرو محسوس ٿئي ٿو۔ پوءِ سڀني کي اثاثا ڊيڪليئر نه ڪرڻ گهرجن۔پنجين ۽ اهم ڳالهه اها آهي ته جيڪڏهن هن ملڪ جا نمائندا پنهنجا اثاثا عوام کان لڪائڻ شروع ڪري ڏين، ته پوءِ انهن کي ڪهڙو حق ٿو پهچي ته هو عوام کان انهن جا اثاثا پڇن؟ انهن کي ڪهڙو حق ٿو پهچي ته بيوروڪريٽن جا اثاثا ظاهر ڪن؟ انهن کي ڪهڙو حق ٿو پهچي ته ايف بي آر ذريعي ماڻهن جي گهرن تي ڇاپا هڻائن؟حقيقت اها آهي ته هي قانون ان ڪري آندو ويو آهي، ڇاڪاڻته لڳ ڀڳ 18 کان 20 اهڙا ماڻهو آهن، جن جا اثاثا حد کان وڌيڪ وڏا آهن، ۽ انهن ماڻهن لابنگ ڪري هي قانون پاس ڪرايو آهي، سڄي دنيا ۾ ان جو بلڪل ابتڙ قانون آهي، جتي اثاثا مڪمل طور تي ظاهر ڪرڻا پوندا آهن، ۽ جيڪڏهن ڏهه ڊالر جو به فرق نڪري اچي ته ماڻهو پنهنجي سيٽ ۽ چونڊ وڙهڻ جي اهل هجڻ جو حق وڃائي ويهي ٿو۔اوهان ڪجهه ماڻهن جا اثاثا لڪائڻ لاءِ قانون سازي ڪريو ٿا، ۽ پوءِ عوام کان چون ٿا ته اسان تي ڀروسو ڪريو، هي انتهائي خراب ۽ شرمناڪ قانون سازي آهي۔ ان کي واپس وٺڻ گهرجي،
