لاهور(بيورو) جماعت اسلامي پاڪستان جي امير حافظ نعيم الرحمان چيو آهي ته پنجاب حڪومت کي 15 فيبروري تائين جمهوريت مخالف مڪاني حڪومت جو قانون واپس وٺڻ گهرجي، ٻي صورت ۾ صوبائي اسيمبلي جو گهيرو ڪيو ويندو.منصوره ۾ پريس ڪانفرنس کي خطاب ڪندي هن چيو ته مسلم ليگ (ن) ۽ پيپلز پارٽي وڏيون سياسي پارٽيون هجڻ جو دعويٰ ڪن ٿيون، پر اهي پارٽيون ٻن خاندانن ۽ ڪجهه چوڌرين ۽ وڏيرن تي مشتمل آهن. ٻنهي کي قومي چونڊن ۾ سخت شڪست ملي پر انهن کي طاقت سان مسلط ڪيو ويو. حڪمران پارٽين عدليه، زراعت، تعليم، صحت سميت سڀني شعبن کي تباهه ڪري ڇڏيو آهي، هن چيو ته ڪراچي ۾ سنگين مسئلن ۽ سنڌ ۾ بگڙجندڙ صورتحال جي باوجود، بلاول ڀٽو کي هڪ ونڊر بواءِ طور پيش ڪيو پيو وڃي.هن چيو ته جماعت اسلامي شفاف چونڊ نظام ۽ متناسب نمائندگي تحت چونڊون چاهي ٿي. جماعت اسلامي مقامي حڪومتن جو هڪ بااختيار نظام چاهي ٿي. پاڪستان کي ڪنهن به حالت ۾ غزه تي امن بورڊ ۽ آءِ ايس ايف ۾ شامل نه ٿيڻ گهرجي.
