اسلام آباد (امتياز گل) اسلام آباد هاءِ ڪورٽ جي جسٽس طارق جهانگيري کي سندس عهدي تان هٽايو ويو آهي. عدالت اهو فيصلو سندس قانوني ڊگري بابت هڪ درخواست جي ٻڌڻي دوران ڏنو، جنهن ۾ چيو ويو هو ته طارق جهانگيري جي جج طور مقرري غير قانوني هئي ڇاڪاڻ ته هن وٽ صحيح قانوني ڊگري نه هئي. عدالت قانون واري وزارت کي هدايت ڪئي ته کيس فوري طور تي ڊي نوٽيفائي ڪيو وڃي. اهو فيصلو جسٽس طارق جهانگيري جي چيف جسٽس ڊوگر تي ڪرپشن جا الزام هڻڻ ۽ اسلام آباد هاءِ ڪورٽ کي سندس قانوني ڊگري کي چئلينج ڪندڙ درخواست ۾ فيصلي کي رد ڪرڻ جي درخواست ڪرڻ کان پوءِ آيو. ان کان سواءِ، هن سپريم جوڊيشل ڪائونسل ۾ ادارن جي مداخلت بابت شڪايت پڻ داخل ڪئي هئي. ان خط تي اڄ تائين ڪا ڪارروائي ناهي ٿي. جسٽس طارق جهانگيري خلاف تڪرار تڏهن شروع ٿيو جڏهن ڪراچي يونيورسٽي جي رجسٽرار سندس ڊگري رڪارڊ عدالت ۾ پيش ڪيو، جنهن ۾ چيو ويو ته هن غير قانوني طريقن سان ڊگري حاصل ڪئي هئي ۽ 1992 تائين امتحان ۾ شرڪت ڪرڻ کان به روڪيو ويو هو. ان کان پوءِ، جسٽس جهانگيري 1989 ۾ پنهنجي تبديل ٿيل نالي سان امتحان ۾ شرڪت ڪئي.ڪيس گذريل سال سوشل ميڊيا تي شروع ٿيو ۽ بعد ۾ قانوني پيچيدگين ۾ تبديل ٿي ويو. جسٽس طارق جهانگيري خلاف قانوني ڪارروائي عدليا ۾ مداخلت ۽ عدالتي آزادي تي وڌندڙ تنقيد جي الزامن جي وچ ۾ آئي. جسٽس محسن اختر ڪياني هڪ ڪيس جي ٻڌڻي دوران دليل ڏنو هو ته ملڪ ۾ روايت پئجي وئي آهي ته ڪو حق لاءِ عدالت وڃي ته ان کي بعد ۾ سبق سيکاريو وڃي ٿو، عدالت ڪنهن خلاف حڪم ڪري ته گروپ ان کي سبق سيکارين ٿا. فيصلو پاڪستاني عدليا اندر طاقتورن جي وڌندڙ تڪرارن ۽ اثر کي ظاهر ڪري ٿو، ججن جي آزادي ۽ عدليا جي قانون جي حڪمراني بابت سنگين سوال اٿاريا پيا وڃن. ٻئي پاسي بئريسٽر سلمان اڪرم راجا هڪ انڪشاف ڪيو آهي ته هڪ نوٽيفڪيشن ڪيو ويو آهي جنهن موجب، جيل ٽرائل ۽ عدالت ۾ عمران خان کي پيش نه ڪيو ويندو پر سندس ڪمري ۾ ئي موبائيل فون کڻي وڃي جج کي وڊيو ڪال تي ڏيکاريو ويندو ته عمران خان ڪوٺڙي ۾ موجود آهي. جيل ٽرائل دوران به عمران خان سان سندس ملاقات نه ٿيندي.
