اسلام آباد (عوامي آواز نيوز) حڪومت جي واپاري ڊيٽا ۾ 11 ارب ڊالر جو فرق ظاهر ٿيو آهي، جنهن جي ڪري عالمي مالياتي فنڊ (آءِ ايم ايف) گذريل ٻن مالي سالن دوران سرڪاري ادارن پاران رپورٽ ڪيل واپاري ڊيٽا ۾ 11 ارب ڊالر جي فرق کي عوامي طور تي ظاهر ڪرڻ جو مطالبو ڪيو آهي جنهن سان ملڪ جي ٻاهرين شعبي جي انگن اکرن تي سوال اٿاريا ويا آهن. سرڪاري ذريعن چيو ته پاڪستان روينيو آٽوميشن لميٽيڊ (پي آر اي ايل) پاران رپورٽ ڪيل درآمد مالي سال 2023/24 دوران پاڪستان سنگل ونڊو (پي ايس ڊبليو) ڊيٽا کان 5.1 ارب ڊالر گهٽ هئي. ايندڙ مالي سال ۾ هي فرق وڌي 5.7 ارب ڊالر ٿي ويو. پي ايس ڊبليو ڊيٽا کي وڌيڪ جامع سمجهيو ويندو آهي ۽ ان ۾ سڀئي درآمدي داخلائون شامل هونديون آهن. ذريعن انڪشاف ڪيو آهي ته پاڪستاني عملدارن آءِ ايم ايف کي ٻڌايو ته پاڪستان بيورو آف اسٽيٽسٽڪس (پي بي ايس) پاران جنيوا ۾ قائم انٽرنيشنل ٽريڊ سينٽر (آءِ ٽي سي) کي جمع ڪرايل واپاري ڊيٽا جامع نه هئي ۽ ڪجهه درآمدي ڊيٽا ان جي رپورٽنگ مان گم غائب هئي، جڏهن ته، گهٽتائي ڪنهن غلط ارادي جي بدران پاڪستان روينيو آٽوميشن لميٽيڊ کان پاڪستان سنگل ونڊو ڏانهن واپاري ڊيٽا جي ذريعن کي منتقل ڪرڻ جي عمل جي ڪري هئي. ذريعن چيو ته گهٽتائي تڏهن سامهون آئي جڏهن پاڪستاني درآمد ڪندڙن ۽ کنڊ برآمد ڪندڙن جي ڊيٽا ۾ وڏي فرق جي سببن جي جاچ ڪئي پئي وئي. هڪ گڏيل ٽيم پاران ڪيل تجزيي مان ظاهر ٿيو ته پي بي ايس واپاري ڊيٽا هڪ پراڻي پروگرام ٿيل ڪيوري ذريعي حاصل ڪئي پئي وڃي جيڪا 2017 کان پوءِ اپڊيٽ نه ڪئي وئي هئي، جنهن جي ڪري درآمد جي مسلسل گهٽ رپورٽنگ ٿي رهي هئي. ذريعن انڪشاف ڪيو آهي ته پي ايس ڊبليو ڊيٽابيس 15 قسمن جي سامان جي گڊز ڊڪليريشن تي ٻڌل هو، جيڪو پاڪستان روينيو آٽوميشن لميٽيڊ جي رڳو ست قسمن جي ڊيٽا کان وڌيڪ جامع هو. هن فرق جي نتيجي ۾، مالي سال 2023/24 ۾ درآمد 5.1 بلين ڊالر ۽ گذريل مالي سال ۾ 5.7 بلين ڊالر گهٽ رپورٽ ٿي. سڀ کان وڏو فرق ٽيڪسٽائل شعبي ۾ ڏٺو ويو، جتي درآمد تقريبن 3 بلين ڊالر گهٽ رپورٽ ٿي. ڌاتو گروپ جي درآمد پڻ مالي سال 2023/24 ۾ تقريبن 1 بلين ڊالر گهٽ رپورٽ ٿي. ذريعن چيو ته آءِ ايم ايف شفافيت جي هدايت ڪئي آهي ۽ پاڪستاني اختيارين کي چيو آهي ته اهي ماضي جي واپاري انگن اکرن کي درست ۽ اپڊيٽ ڪن ۽ انهن کي آءِ ايم ايف ۽ سڀني مقامي اسٽيڪ هولڊرن سان شيئر ڪن. ذريعن جو چوڻ آهي ته پي بي ايس گذريل سالن جي انگن اکرن ۾ نظرثانين کي عوامي طور تي ظاهر ڪرڻ کان لنوائي رهيو آهي، ناڻي واري وزارت جي عملدارن کي ڊپ آهي ته نظرثاني ٿيل انگن اکرن کي عوامي طور ظاهر ڪرڻ سان خالص برآمد اڪائونٽنگ متاثر ٿي سگهي ٿي، جنهن جي نتيجي ۾ معاشي ترقي جي ڪاٿي تي اثر پئجي سگهي ٿو. رپورٽ ۾ چيو ويو آهي ته هي واقعو پاڪستان جي ڊيٽا جمع ڪرائڻ واري نظام ۾ بنيادي خامين کي ظاهر ڪري ٿو ۽ ملڪ جي معاشي انگن اکرن جي شفافيت بابت ڳنڀير سوال اٿاري ٿو، خاص طور تي ان وقت ۾ جڏهن پاڪستان آءِ ايم ايف پروگرام هيٺ آهي ۽ معاشي سڌارن جي نازڪ دور مان گذري رهيو آهي. ٻئي پاسي پاڪستان ۽ آءِ ايم ايف وچ ۾ ڳالهيون ٻئي هفتي تائين جاري رهنديون، آءِ ايم ايف مختلف شعبن ۾ ٽيڪس ڇوٽ جي تفصيلن تي بريفنگ گهري آهي. ذريعن جو چوڻ آهي ته ناڻي واري وزارت جا عملدار آءِ ايم ايف کي کنڊ جي برآمد ۽ پوءِ درآمد تي بريفنگ ڏيندا، آءِ ايم ايف کي ريڪوڊڪ منصوبي تي ٽيڪس ڇوٽ تي به بريفنگ ڏني ويندي.ٽيڪس وصولي تي ٽيڪس ڇوٽ جي اثر جو جائزو ورتو ويندو. ذريعن موجب، آءِ ايم ايف ريڪوڊڪ منصوبي تي ٽيڪس ڇوٽ جي اثر جو جائزو وٺڻ جو فيصلو ڪيو آهي. آءِ ايم ايف وفد کي ريڪوڊڪ منصوبي جي ميڪرو اثر، فنانسنگ تي بريفنگ ڏني ويندي. وفد کي ريڪوڊڪ منصوبي ۾ مقامي ۽ عالمي سيڙپڪاري تي به بريفنگ ڏني ويندي. آءِ ايم ايف وفد کي ريڪوڊڪ منصوبي جي ٽيڪسن ۽ رائلٽيز تي بريفنگ ڏني ويندي، جڏهن ته ريڪوڊڪ منصوبي جي ضمانتن سان لاڳاپيل مالي خطرن جي اثر جو پڻ جائزو ورتو ويندو.
