اسلام آباد(م ڊ) سپريم ڪورٽ جي آئيني بينچ پنهنجي پهرين سڌي ريت نشر ڪيل ٻڌڻي دوران مخصوص سيٽن بابت فيصلي تي نظرثاني واري درخواستن کي ٻڌندي ريمارڪس ڏنا ته سني اتحاد ڪائونسل کي مخصوص سيٽون ڪيئن ملي سگهن ٿيون؟ جيڪا سياسي پارٽي پارليامينٽ ۾ ئي موجود نه هجي، ان ۾ آزاد اميدوار ڪيئن شامل ٿي سگهن ٿا؟ سني اتحاد ڪائونسل مخصوص سيٽن جي حقدار نه آهي، سپريم ڪورٽ جي جسٽس امين الدين خان جي سربراهي ۾ 11 رڪني آئيني بينچ، مخصوص نشستن بابت فيصلي تي نظرثاني واريون درخواستون ٻڌيون، درخواست گذار وڪيل مخدوم علي خان دليلن جي شروعات ڪئي ته جسٽس مسرت هلالي سوال ڪيو ته سني اتحاد ڪائونسل مخصوص سيٽن تي دعويٰ ڪيئن ڪئي؟ سني اتحاد ڪائونسل کي مخصوص سيٽون ڪيئن ملي سگهن ٿيون؟، هن وڌيڪ چيو ته جيڪا پارليامينٽ ۾ آيل سياسي جماعت هجي، ان ۾ آزاد اميدوار شامل ٿي سگهن ٿا، پر جيڪا پارٽي پارليامينٽ ۾ ئي موجود نه هجي، ان ۾ آزاد ماڻهو ڪيئن شامل ٿي سگهن ٿا؟ آزاد اميدوارن کي اها پارٽي چونڊڻي هئي جيڪا چونڊون کٽي پارليامينٽ ۾ پهتي هجي، جسٽس جمال خان مندوخيل ريمارڪس ڏيندي چيو ته سني اتحاد ڪائونسل مخصوص سيٽن جي حقدار ناهي، سني اتحاد ڪائونسل پارلياماني جماعت ته بڻجي سگهي پئي، پر مخصوص سيٽون ان جو حق نٿيون بڻجن، جسٽس محمد علي مظهر ريمارڪس ڏيندي چيو ته عدالت اليڪشن ڪميشن جي نوٽيفڪيشن کي ڪالعدم قرار ڏنو هو ۽ عدالت اڳيان صرف اليڪشن ڪميشن جو نوٽيفڪيشن پيش ڪيو ويو هو، جسٽس شاهد بلال سوال ڪيو ته ڇا پي ٽي آءِ مخصوص سيٽن واري ڪيس ۾ ڌر هئي؟ ڇا اها جماعت جيڪا ڪيس ۾ ڌر نه هجي، ان کي سيٽون ڏئي سگهجن ٿيون؟، وڪيل مخدوم علي خان جواب ڏنو ته، جيڪا سياسي جماعت ڪيس ۾ ڌر نه هجي، ان کي مخصوص نشستون نه ٿي ڏئي سگهجن. ان تي جسٽس يحيٰ آفريدي پڻ ريمارڪس ڏنا هئا ته پي ٽي آءِ مخصوص نشستن واري ڪيس ۾ ڌر نه هئي، جسٽس حسن اظهر رضوي سوال ڪيو ته ڇا پي ٽي آءِ پشاور هاءِ ڪورٽ يا اليڪشن ڪميشن ۾ نوٽيفڪيشن چئلينج ڪيا هئا؟، وڪيل مخدوم علي خان جواب ڏنو ته پي ٽي آءِ انهن نوٽيفڪيشنن کي چئلينج نه ڪيو هو. مخصوص نشستن جي اڪثريتي فيصلي ۾ آئين کي ٻيهر لکيو ويو، تنهن ڪري نظرثاني واريون درخواستون منظور ڪيون وڃن، هن زور ڏنو ته نظرثاني ڪيس ۾ عدالت پنهنجو پهريون موقف يا راءِ تبديل ڪري سگهي ٿي، مسلم ليگ (ن) جي وڪيل چيو ته اسان پڻ لکت ۾ دليل جمع ڪرايا آهن، جڏهن ته پيپلزپارٽي جي وڪيل چيو ته پيپلزپارٽي سڀاڻي لکت ۾ دليل جمع ڪرائيندي، سني اتحاد ڪائونسل جي وڪيل چيو ته تحريري جواب جمع ڪرائي اهي جواب جواب جو حق ختم ڪري چڪا آهن، جنهن تي اليڪشن ڪميشن جي وڪيل چيو ته جيڪڏهن ضرورت پئي ته اسان جواب جواب ڏينداسين، جسٽس امين الدين خان ريمارڪس ڏيندي چيو ته عدالت کي فيصلو ڪرڻو آهي ته جواب جواب جو حق ڏيڻ گهرجي يا نه. سڀاڻي سني اتحاد ڪائونسل جي وڪيل فيصل صديقي دليل ڏيندو. عدالت ٻڌڻي سڀاڻي تائين ملتوي ڪئي.
