ڪراچي (رپورٽر ) سنڌ جي وڏي وزير سيد مراد علي شاهه جي صدارت هيٺ بورڊ آف روينيو جي اجلاس ۾ ٻن ديهن، هڪ ڳوٺ ۽ ٻن شهري ملڪيت جي حقن جي رڪارڊ کي ڊجيٽلائيز ڪرڻ جو فيصلو ڪيو ويو. منصوبو ڇهن هفتن اندر پائلٽ پروجيڪٽ طور مڪمل ڪيو ويندو جنهن کانپوءِ دستي رڪارڊ کي ڊجيٽل ڪرڻ لاءِ مختلف سافٽ ويئر تيار ڪيا ويندا. ملاقات خميس ڏينهن وزيراعليٰ هائوس ۾ ٿي جنهن ۾ چيف سيڪريٽري آصف حيدر شاهه، سينئر ميمبر بورڊ آف روينيو بقاءُ الله انڙ، وڏي وزير جو سيڪريٽري رحيم شيخ، اسپيشل سيڪريٽري ايس اينڊ جي اي ڊي زمان ناريجو، ميمبر آر اينڊ ايس احمد علي شاهه، ميمبر آر ايس اينڊ اي پي غلام عباس نائچ، پي ڊي ايل اي آر ايم آءِ ايس سيف الله ابڙو ۽ ٻين شرڪت ڪئي. وڏي وزير کي ٻڌايو ويو ته موجوده نظام تحت درخواست ڏيندڙن کي سيلز سرٽيفڪيٽ حاصل ڪرڻ لاءِ ڪيترن ئي مرحلن مان گذرڻو پوندو آهي. درخواست ڏيندڙن کي وڌيڪ پروسيسنگ لاءِ سب رجسٽرار جي آفيس وڃڻو پوندو جتي جاچ، بايوميٽرڪ تصديق، ۽ سرٽيفڪيٽ جي منظوري يا جاري ڪرڻ جي ضرورت پوندي. انهن مرحلن کانپوءِ درخواست ڏيندڙن کي منتقلي لاءِ رجسٽرار سان رابطو ڪرڻو پوندو. آخر ۾ انهن کي لاڳاپيل آفيسن ۾ درخواست جي اسڪيننگ، انڊيڪسنگ ۽ صحيح ڪاپي حاصل ڪرڻ جي عمل مان گذرڻو پوندو. مراد علي شاهه ان تي عدم اطمينان جو اظهار ڪندي چيو ته سيلز سرٽيفڪيٽ، ٽرانسفر ۽ ٻين گهرجن جو عمل موجوده اٺ کان نو مرحلن بدران فقط ٻن مرحلن تي هجڻ گهرجي. وڏي وزير بورڊ آف روينيو (بي او آر) کي هدايت ڪندي بايوميٽرڪ ۽ خودڪار ملڪيت جي منتقلي لاءِ هڪ عوامي خدمت مرڪز قائم ڪرڻ جي ضرورت تي زور ڏنو. هن تجويز ڏني ته درخواستون ۽ ٽيڪس/فيس جي ادائيگي اي-پيمنٽ سسٽم ذريعي آن لائن ڪئي وڃي ۽ ملڪيت جي منتقلي جو هڪ آٽو سسٽم لاڳو ڪيو وڃي. وڏي وزير مٽياري تعلقي ۽ ضلعي جي ديهه ڀورڪو ۽ ديهه پليجاڻي ۾ ڊجيٽل زمين جي ملڪيت جي منتقلي لاءِ هڪ پائلٽ پروجيڪٽ جي منظوري ڏني. . وڏي وزير سنڌ ڊجيٽلائيزيشن آف ريڪارڊ آف رائيٽس (اسپيشل ريويزن) رولز 2025 جي پڻ منظوري ڏني. وڏي وزير چيو ته زمين جي مالڪي جي حقن جي ڊجيٽل منتقلي هڪ ٽيڪنالاجي تي ٻڌل ۽ خودڪار عمل هوندو جنهن ۾ روبرو ملاقاتون گهٽ ۾ گهٽ ڪيون وينديون. مرڪزي ڊيٽابيس جي انضمام سان نادرا جي بايوميٽرڪس ذريعي ملڪيت جي حقن جي خودڪار تصديق ٿيندي. وڌيڪ ته ٽيڪس سسٽم سان انضمام ٽيڪسن جي موثر حساب ۽ ادائيگي کي يقيني بڻائيندو ۽ محفوظ ٽرانزيڪشن لاءِ اسڪرو اڪائونٽس قائم ڪيا ويندا. انهن جي سالياني ڪارڪردگي جو جائزو اسٽيڪ هولڊرن جي ڪميٽي طرفان ورتو ويندو. هڪ عوامي پورٽل قائم ڪيو ويندو جيڪو ملڪيت جي حقن جي دستاويز طور جاري ڪيل پراپرٽي ڪارڊ ذريعي زمين جي رڪارڊ تائين رسائي ۽ درخواستن جي ٽريڪنگ کي نظر ۾ رکندو.
