ڪراچي ( رپورٽر ) ايڊيشنل آءِ جي ڪراچي جاويد عالم اوڍو جي صدارت هيٺ ڪراچي پوليس آفيس ۾ اجلاس ٿيو، جنهن ۾ گم ۽ اغوا ٿيل ٻارن جي بازيابي، امن امان ۽ ٽريفڪ جي انتظامن تي غور ويچار ڪيو ويو. اجلاس ۾ زونل ڊي آءِ جيز، ڊي آءِ جي انويسٽيگيشن، ڊي آءِ جي سي آءِ اي، ضلعي جي ايس ايس پيز، ايس پيز انويسٽيگيشن، ايس پي اي وي سي سي ۽ ٻين اعليٰ پوليس آفيسرن شرڪت ڪئي. ايڊيشنل آءِ جي هدايت ڪئي ته ٻارن جي بازيابي لاءِ موثر قدم کنيا وڃن، پوليس گشت وڌايو وڃي ۽ ڏوهاري عنصرن خلاف قانوني ڪارروائي تيز ڪئي وڃي. اهم هنڌن، پوليس ادارن ۽ پرڏيهي شهرين جي سيڪيورٽي کي يقيني بڻائڻ، ٽريفڪ ضابطن تي عملدرآمد ۽ غير قانوني بس اسٽينڊن ۽ حددخلين جي خاتمي لاءِ تڪڙي قدمن تي زور ڏنو ويو .
-
ڀينس ڪالوني ۾ ڦر مزاحمت تي هالا واسي قتل، هڪ جوابدار گرفتار
ڪراچي (رپورٽ: شاهد ڪورائي) ملير سکن ٿاڻي جي حد ڀينس ڪالوني ۾ موٽر سائيڪل سوار ڦورن ڦر مزاحمت تي قائم الدين خاصخيلي کي ڇرين جا وار ڪري قتل ڪري ڇڏيو. مقتول جي ڀاءُ مير دوست جي فرياد تي نبيل ۽ دانش حمايتي سميت ٽن ڄڻن خلاف قتل جو ڪيس داخل ڪيو ويو. سکن ٿاڻي جي پوليس هڪ جوابدار دانش حمايتي کي گرفتار ڪري ورتو، جيڪو ٻه ڏينهن اڳ ملير جيل مان آزاد ٿيو هو. مقتول جو لاش اباڻي ڳوٺ هالا روانو ڪيو ويو. پوليس موجب ٻين جوابدارن جي ڳولا جاري آهي.
