اسلام آباد(م ڊ) منصوبابندي واري وفاقي وزير احسن اقبال جو چوڻ آهي ته پاڪستان کي 2035 تائين هڪ هزار ارب
ڊالرن جي معيشت ٺاهڻي آهي. اسلام آباد ۾ پريس ڪانفرنس ڪندي وفاقي وزير چيو ته اڏام پاڪستان جو 5 سالا منصوبو شروع ڪيو ويو آهي، ماضي ۾ اڏام جا موقعا ضايع ڪيا ويا، هاڻي اڏام پاڪستان جو موقعو وڃڻ نه ڏينداسين. پاڪستان کي ايشين ٽائيگر بڻائي ڇڏيندو. هن پي ٽي آءِ تي تنقيد ڪندي چيو ته هڪ سياسي پارٽي قوم کي ڊپريشن ۾ وجهي ڇڏيو آهي، هن سياسي پارٽي قوم جي خود تصوير کي تباهه ڪيو پر هاڻي اسان کي ملڪ جي ترقي لاءِ گڏجي اڳتي وڌڻو پوندو. منصوبابندي واري وفاقي وزير احسن اقبال چيو آهي.
ته 2018ع کان 2022ع تائين اسان معاشي ۽ قرضن جي دلدل ۾ ڦاٿل رهياسين، هاڻي اسان کي متحد ٿي معاشي طور تي ٻاهر نڪرڻو پوندو، 2029ع تائين مضبوط معيشت جو بنياد وجهنداسين، 2029ع تائين سالياني برآمدات 60 ارب ڊالر ٿي وينديون. جنهن کانپوءِ ايندڙ 8 کان 10 سالن ۾ سالياني ايڪسپورٽ 100 ارب ڊالرن تائين پهچي ويندي.
