ڪراچي(رپورٽر ) سنڌ جي سڌ سماءُ ۽ سينئر وزير شرجيل انعام ميمڻ ھڪ ڀيرو ٻيھر ريڊ لائن بي آر ٽي منصوبي ۾ پيش ايندڙ رنڊڪن جي جلد خاتمي ۽ ڪم ۾ تيزي آڻڻ جون هدايتون جاري ڪري ڇڏيون آهن، ڪالھ سنڌ جي سينئر وزير صوبائي وزير شرجيل انعام ميمڻ جي صدارت ھيٺ اعليٰ سطح جو اھم اجلاس ڪراچي ۾ ٿيو. اجلاس ۾ سيڪريٽري ٽرانسپورٽ اسد ضامن، رٿابندي ۽ ترقي واري چيئرمن نجم شاھ، ڪمشنر ڪراچي حسن نقوي، سي اي او ٽرانس ڪراچي طارق منظور چانڊيو، ڊي آءِ جي ٽريفڪ احمد نواز چيما ۽ ٻين لاڳاپيل اختيارين جي آفيسرن شرڪت ڪئي. اجلاس ۾ ايشين ڊولپمينٽ بينڪ جو لائڊ رائيٽ ۽ بين الاقوامي ڪنسلٽنٽس آن لائن شريڪ ٿيا. اجلاس ۾ ريڊ لائن بي آر ٽي ۾ پيش ايندڙ رڪاوٽن ۽ مسئلن جي فوري حل لاءِ تفصيلي گفتگو ۽ خيالن جي ڏي وٺ ڪئي وئي. اجلاس ۾ پاڻي جي سپلاءِ لائنن، ڪي اليڪٽرڪ، نيشنل ٽيلي ڪميونيڪشن ڪارپوريشن ۽ پاڪستان ٽيلي ڪميونيڪيشن ڪمپني لميٽڊ جي تنصيبات سميت يوٽيلٽيز جي منتقلي سبب منصوبي ۾ ٿيندڙ دير تي خيالن جي ڏي وٺ ڪئي وئي. اجلاس ۾ لاٽ ون ۽ لاٽ ٽو ۾ جاري تعميراتي ڪمن جو بھ جائزو ورتو ويو ۽ منصوبي جي ڪانٽريڪٽرز ڪم ۾ اڳڀرائي بابت آگاھي ڏني. اجلاس جي موقعي تي ڳالھائيندي سنڌ جي سينئر وزير شرجيل انعام ميمڻ چيو تھ ريڊ لائن بي آر ٽي رٿا ۾ وڌيڪ دير قبولڻ جوڳي ناھي، اسان کي ٽائيم لائن کان اڳ ڪم مڪمل ڪرڻو پوندو، تعميراتي ڪم ۾ تيزي آڻڻ لاءِ ٽن شفٽن صبح، شام ۽ رات ۾ ڪم ڪيو وڃي، ان ڳالھه کي يقيني بڻايو وڃي تھ منصوبي تي ڪم 24 ڪلاڪ جاري رھي. هن چيو تھ ريڊ لائن بي آر ٽي ڪراچي جي لاءِ ھڪ فليگ شپ منصوبو آھي، ريڊ لائن بي آر ٽي جو مقصد، جديد، اثرائتو ۽ ماحول دوست ماس ٽرانزٽ سسٽم فراھم ڪري ڪراچي جي ٽرانسپورٽ نظام ۾ انقلاب آڻڻ آھي. سندس وڌيڪ چوڻ ھو تھ رٿا جي مڪمل ٿيڻ تي ريڊ لائن بي آر ٽي ذريعي روزانو ھزارين مسافرن کي سھولت ملي سگھندي.
