ڪشمور ۾ ڌاڙيل ماڻهن جي هجوم ۾ رائيس مل مالڪ کي اغوا ڪري ويا!

ڪشمور(رپورٽ: دليپ ڪيسواڻي)ڪشمور ويجهو گڊو ٿاڻي جي حد ڊيراموڙ ۾ ڳچ آبادي واري هنڌ قائم جي ڪي رائيس مل تي ھٿياربند چڙهائي ڪري ھندو پنچائت جي نالي واري شخصيت ملرز ايسوسيئيشن جي صدر چوڌري نريش جي سئوٽ راجا ڪيسواڻي کي ھٿيارن جي زور تي اغوا ڪري کڻي ويا، پوليس روايت برقرار رکندي ڌاڙيلن جي رستا روڪ به نه ڪري سگهي، جنهن ڪري اهي آساني سان فرار ٿيڻ ۾ ڪامياب ٿي ويا، اکين ڏٺن شاهدن موجب ھٿياربند ماڻهن جي هجوم ۾ راجا ڪيسواڻي جا  ھٿ ٻڌي ۽ منھن تي ڪپڙو ڏئي سرعام اغوا ڪري ويا، ٻي پاسي مغوي نوجوان جي سئوٽ چوڌري نريش ڪمار ميڊيا سان ڳالهائيندي چيو ته لاقانونيت جي انتها آهي، ڳچ آبادي واري علائقي ۾ سوين ماڻهن جي هجوم ۾ ھٿياربند موٽرسائيڪلن تي چڙهي مل اندر داخل ٿيا ۽  منهنجي سئوٽ راجا ڪمار کي اغوا ڪري ويا، هن چيو ته آءِ جي سنڌ، ڊي آءِ جي لاڙڪاڻو ۽ ايس ايس پي ڪشمور نوٽس وٺي راجا ڪيسواڻي کي بازياب ڪرائين، ٻي صورت ۾ احتجاج جو سڏ ڏنو ويندو، هندو پنچائت جي هنگامي گڏجاڻي ۾ اڄ هڙتال ۽ ريلي جو اعلان ڪيو ويو

1. تنگواڻي ڀرسان لوڊر رڪشا ڊرائيور اغوا

تنگواڻي (رپورٽ: مھتاب ملڪ) جمال پوليس ٿاڻي جي حد ۾ ڊريبيلو پل وٽان لوڊر رڪشا ڊرائيور محمد عارف ملڪ اغوا ٿي ويو آهي، حد پوليس ۽ سندس وارثن پيرا کنيا پر اغوا ڪندڙن جو ڪوبه پتو نه پئجي سگهيو، ڏوھارين جي ڪاررواين سبب علائقي واسين خوف ۽ حراس ڇائنجي ويو، نوجوان جي اغوا بعد تعلقي ۾ مغوين جو انگ وڌي 3 ٿي ويو آهي.