واشنگٽن(م ڊ/ع آ نيوز) آمريڪي صدارتي چونڊن لاءِ سمورين 50 رياستن ۾ ٿيل پولنگ جي نتيجن موجب ڊونلڊ ٽرمپ هڪ ڀيرو ٻيهر ميدان ماري ورتو آهي. آمريڪا ۾ 47 هين صدارتي چونڊن ۾ ڊونلڊ ٽرمپ ڪملا هيرس کي شڪست ڏئي ٻيو ڀيرو صدر چونڊجي ويو. صدارتي چونڊن ۾ 538 ووٽن مان ڪاميابي لاءِ 270 ووٽ گهربل هئا، ڊونلڊ ٽرمپ 277 ووٽ حاصل ڪري صدارتي چونڊون کٽي ورتيون، جڏهن ته مخالف اميدوار ڪملا هيرس 226 اليڪٽورل ووٽ حاصل ڪري سگهي. پرڏيهي ميڊيا موجب، رياست انڊيانا، فلوريڊا، اوهائيو، ڪينٽڪي، رياست اوڪلوهاما، الباما، ڏکڻ ڪيرولينا، رياست مسي سپي، آرڪنساس ۾ ريپبلڪن صدارتي اميدوار ڊونلڊ ٽرمپ ڪامياب ٿي ويو، ويسٽ ورجينا ۾ به ريپبلڪن اميدوار ڊونلڊ ٽرمپ ڪامياب ٿيو. ڊيموڪريٽ اميدوار ڪملا هيرس نيوميڪسيڪو ۾ 5، اوري گن ۾ 8، ڪولوراڊو ۾ 10، مين 1، هوائي 4، واشنگٽن ۾ 12، ڊسٽرڪٽ آف ڪولمبيا ۾ 3 ۽ ڪيليفورنيا ۾ 54 اليڪٽورل ووٽ کڻي ڪاميابي ماڻي، ڪملا سڀ کان وڌيڪ ووٽ کڻي ڪيليفورنيا ۾ ڪاميابي حاصل ڪئي. رياست هوائي ۾ ڏهون ڀيرو ڊيموڪريٽ پارٽي ڪاميابي حاصل ڪئي، اهڙي طرح ايلي نوائي، نيوجرسي، ميري لينڊ ۽ ورمونٽ ۾ ڪملا هيرس ڪامياب ٿي وئي، ورمونٽ ۾ ڪملا هيرس 3 هزار 77 ووٽ حاصل ڪيا، ڊونلڊ ٽرمپ کي ورمونٽ ۾ 25 سئو 61 ووٽ مليا. ايري زونا، جارجيا، مشي گن، نيواڊا، اتر ڪيرولينا، پينسلوينيا ۽ وسڪونسن اهي ست رياستون آهن جن کي “سوئنگ اسٽيٽس” چيو ويندو آهي ۽ انهن وٽ وائيٽ هائوس جون چاٻيون آهن. ستن ئي رياستن ۾ گڏيل طور تي 93 اليڪٽورل ووٽ گهربل هوندا آهن. سوئنگ رياستن ۾ جارجيا ۾ 16، ڪيرولينا 16، پنسلوينيا 19 اليڪٽورل ووٽ کڻي ڪاميابي حاصل ڪئي. ڪملا هيرس مشي گن ۾ 15 ووٽ کنيا. سينيٽ ۾ به ڊونلڊ ٽرمپ کي ڪملا هيرس جي پارٽي تي اڪثريت حاصل آهي. آمريڪي صدارتي چونڊن ۾ ڪاميابي کانپوءِ فلوريڊا ۾ وڪٽري اسپيچ ڪندي ڊونلڊ ٽرمپ چيو ته اڄ اسان تاريخ جوڙي ورتي آهي، آمريڪا هاڻ نين بُلندين کي ڇُهندو. ڊونلڊ ٽرمپ چيو ته آمريڪا ٻيهر عظيم بڻائينداسين، سپورٽرن جو ٿورائتو آهيان، اوهان جي ووٽ کانسواءِ ڪاميابي ممڪن نه هئي هن وڌيڪ چيو ته هو ڪا به نئين جنگ شروع نه ڪندو پر جنگون ختم ڪندو. رياست فلوريڊا ۾ پنهنجي اليڪشن هيڊ ڪوارٽر ۾ ڳالهائيندي ڊونلڊ ٽرمپ چيو ته هي ملڪي تاريخ جي سڀ کان وڏي سياسي تحريڪ هئي، آمريڪا کي بهتر ڪرڻ جي ضرورت آهي، ان کي بهتر ڪنداسين، آمريڪا جا زخم ڀرجي ويندا. ٻيو ڀيرو چونڊيل صدر چيو ته عوام منهنجو ڀرپور ساٿ ڏنو، اها ملڪي تاريخ جي سڀ کان وڏي سياسي تحريڪ هئي. ڊونلڊ ٽرمپ جو چوڻ هو ته منهنجي حمايت ڪندڙن شاندار مهم هلائي، اسان سينيٽ لاءِ وڏي مهم هلائي، اسان سينيٽ جو ڪنٽرول واپس ورتو، هي آمريڪا جي سياسي فتح آهي، منهنجي فتح جمهوريت جي به فتح آهي، جن عوام منهنجو ساٿ ڏنو. مان انهن جو تمام گهڻو شڪر گذار آهيان، دنيا جي مختلف قومن جي آمريڪن اسان جي حمايت ڪئي، هڪ ڀيرو ٻيهر آمريڪي عوام جو انهن جي اعتماد تي شڪريو ادا ڪريان ٿو. هن چيو ته سرحدن کي سيل ڪرڻو پوندو، اسان چاهيون ٿا ته ماڻهو قانوني طريقي سان آمريڪا اچن، آمريڪا کي محفوظ بڻائينداسين. ڊونلڊ ٽرمپ جو چوڻ هو ته اسان هڪ مضبوط ۽ طاقتور فوج چاهيون ٿا ۽ مثالي صورتحال اها آهي ته اسان کي ان کي استعمال ڪرڻ جي ضرورت ناهي، توهان کي خبر آهي ته اسان جي گذريل 4 سالن ۾ ڪا به جنگ ناهي ٿي، اسان داعش کي شڪست ڏني، اسان شڪست ڏني ISIS رڪارڊ وقت ۾، پر اسان وٽ جنگ نه هئي. نئين چونڊيل صدر چيو ته مخالفن چيو ته توهان جنگ شروع ڪندا، مون چيو ته جنگ شروع نه ڪندس پر جنگ بند ڪندس. هن چيو ته مون کي ڪيترن ئي ماڻهن چيو ته خدا منهنجي جان هڪ مقصد لاءِ بچائي هئي ۽ اهو مقصد اسان جي ملڪ کي بچائڻ ۽ آمريڪا جي وقار کي بحال ڪرڻ هو ۽ هاڻي اسان گڏجي ان مقصد کي پورو ڪرڻ وارا آهيون، اسان جو اڳتي جو مقصد آسان ناهي پر مان. دنيا ۾ سڀ کان اهم ڪم ڪرڻ لاءِ پنهنجي سموري طاقت استعمال ڪندس ۽ وڙهندس.
