اسلام آباد (بيورو+م ڊ ) ڪراچي جي واهپيدارن لاءِ بجلي وڌيڪ مهانگي ٿيڻ جو امڪان آهي.ڪي اليڪٽرڪ طرفان بجلي واهپيدارن تي واڌو بار وجهڻ جون تياريون ڪيون پيون وڃن، ڪمپني بجلي جي قيمت ۾ 51 پئسا في يونٽ واڌ لاءِ نيپرا ۾ درخواست جمع ڪرائي ڇڏي، جنهن تي نيپرا 3 آڪٽوبر تي ٻڌڻي ڪندي.ڪي اليڪٽرڪ طرفان بجلي اگهن ۾ واڌ آگسٽ جي ماهوار فيول چارجز ايڊجسٽمينٽ جي مد ۾ گهري وئي آهي، جيڪا منظور ٿيڻ جي صورت ۾ ڪي اليڪٽرڪ واهپيدارن تي هڪ ارب رپين کان وڌيڪ جو بار پوندو.نيپرا ڪي اليڪٽرڪ طرفان جولاءِ جي ايف سي اي جو فيصلو اڃا تائين جاري ناهي ڪيو، جنهن ۾ ڪي اليڪٽرڪ جولاءِ مهيني لاءِ 3 رپيا 9 پئسا في يونٽ واڌ گهري هئي. جولاءِ جي ايف سي اي جي درخواست تي نيپرا 29 آگسٽ تي ٻڌڻي ڪئي هئي، جولاءِ جي ايف سي اي جي مد ۾ واهپيدارن تي 6 ارب 20 ڪروڙ 36 لک رپين جو بار پوندو.
