ڪراچي (رپورٽر) دهشتگردي جي انت واري کاتي جي سربراهه راجا عمر خطاب چيو آهي ته پاڪستان خاص ڪري ڪراچي ۾ دهشتگردي ۾ ملوث انتها پسندن جا پيرا ايران ۾ موجود پاڪستان مخالف دهشتگرد گروپن سان ملن ٿا، جيڪي ڀارتي ڳجهي ايجنسي را کان آپريٽ ٿين ٿا. ڪائونٽر ٽيررازم ڊپارٽمينٽ جي انچارج راجا عمر خطاب موجب ماضي ۾ گرفتار ٿيل دهشتگردن جا پيرا ايران ۾ موجود پاڪستان مخالف دهشتگرد جماعتن سان ملن ٿا ۽ ايران ۾ پاڪستان مخالف بي ايل اي بلوچ عليدگي پسند جماعت، لياري گينگ وار ۽ را جا ايجنٽ موجود آهن. هن دعويٰ ڪئي ته پاڪستان جا انتهائي گهربل دهشتگرد هن وقت ايران ۾ لڪيل آهن. هن چيو ته ڪراچي ۾ اسلامي ملڪ جي سفارتڪار جي قتل ۾ ملوث دهشتگرد 12 سالن کان ايران ۾ آهن، جڏهن ته چيني قونصليٽ تي حملي ۾ مارجي ويل دهشتگردن وٽان هٿ آيل موبائيل فونن جي جاچ دوران انڪشاف ٿيو ته دهشتگردن آخري رابطو ايران سميت ٻن ملڪن ۾ پنهنجي ساٿين سان رابطو ڪيو. راجا عمر خطاب جو وڌيڪ چوڻ هو ته ڪراچي اسٽاڪ ايڪسچينج تي حملي ۾ ملوث دهشتگرد 2 سالن کان ايران ۾ لڪيل هو ۽ اتان ئي حملو ڪرڻ آيو هو، جڏهن ته ڪراچي يونيورسٽي تي آپگهاتي حملي ۾ ملوث دهشتگرد داد بخش پاڪستان مان ايرن ۾ روپوش ٿيو، ۽ ايراني انٽيليجنس ايجنسين جي مدد سان افغانستان ۾ بشير زيب سان ملاقات ڪئي.
