اسلام آباد (م ڊ) نگران وزيراعظم انوارالحق ڪاڪڙ چيو آهي ته پاڪستان جو عوام پاڪستان تحريڪ انصاف سميت ڪنهن به پارٽي کي ووٽ ڏيندو ۽ سندن حڪومت قائم ٿي ته کين اقتدار منتقل ڪرڻو پوندو، ٻيو ڪو آپشن ناهي. خاني ٽي وي جي پروگرام ۾ ڳالهائيندي نگران وزيراعظم پنهنجي منصب جي حوالي سان هڪ سوال جي جواب ۾ چيو ته روايتي جواب اهو آهي ته قائد ايوان ۽ مخالف ڌر جي اڳواڻ منهنجي نالي تي اتفاق ڪيو پر اهو سچ آهي. اها سفارش آسمان مان آئي. هن چيو ته مختلف ادارن مان منهنجي نالي بابت راءِ ورتي وئي هوندي، پر مون کي راجا رياض نه پر شهباز شريف اطلاع ڪيو هو. هن چيو ته 9 مئي جي واقعي ۾ ملوث عنصرن کي سزا ملڻ گهرجي، منهنجي خيال ۾ سموري پارٽي بدران رڳو ذميوارن کي سزا ملڻ گهرجي ۽ پوري پي ٽي آءِ کي دشمن سمجهڻ جو ڪو به ارادو ناهي پر ذميوارن کي سزا ملڻ گهرجي، اسان کي ڪنهن سان به ڪو مسئلو ناهي، مون 2013 ۽ 2018 ۾ پي ٽي آءِ کي ووٽ ڏنو. نگران وزير اعظم کان پڇيو ويو ته ڇا نگران حڪومت اڳ ۾ ئي نواز شريف کي اقتدار ۾ آڻڻ جو فيصلو ڪري چڪي آهي؟ جنهن جي جواب ۾ هن چيو ته منهنجي ڄاڻ ۾ اهڙو ڪو به فيصلو ناهي ٿيو ۽ نه ئي مون وٽ اهڙي ڪا به ڳالهه ٻولهه سامهون آئي آهي جنهن ۾ ڪنهن اهڙي راءِ جو اظهار ڪيو هجي. اليڪشن ٿيڻي آهي ۽ 8 فيبروري جي شام يا 9 فيبروري جي صبح تائين عوام کي خبر پئجي ويندي ته هنن فيصلو ڪنهن جي حق ۾ ڪيو آهي.
