کنئور بابت ته سڀ ڪنهن کي خبر هوندي ته اهو ڇا آهي، هتي اسان ان کنئور جي ڳالهه نٿا ڪيون جيڪو ننڍي شيشي ۾ وڍل بُڪ اسٽورز ۽ ٻين دڪانن تان عام طور تي ملي ويندو آهي جنهن کي مختلف ڪاغذن کي هڪٻئي ۽ ٻين شين سان چمبڙائڻ جي لاءِ استعمال ڪيو ويندو آهي پر هتي اسان ڀوري کنئور جي ڳالهه ڪري رهيا آهن.
هونئن ته مختلف وڻن مان نڪرندڙ کنئور به چمبڙائڻ جو ڪم ڪندو آهي پر اهو ڪيترن ئي حڪيمي نسخن ۾ پڻ شامل ٿيندو آهي ۽ ان جا صحت لاءِ حيرت جوڳا فائدا آهن جن بابت توهان شايد ئي ڪڏهن ٻڌو هجي.
ماهرن ڀوري کنئور سان ڪيترين ئي بيمارين جو علاج پڻ ڪري سگهجي ٿو جنهن بابت اڄ اسان اوهان کي ٻڌائينداسين.
کنئور جا حيرت جوڳا فائدا
کنئور گوگل نالي هڪ وڻ مان نڪرندڙ عرق مان ٺهندو آهي جنهن جا صحت لاءِ اڻ ڳڻيا فائدا آهن. صحت جي ماهرن جو چوڻ آهي ته کنئور کي ٻين جڙي ٻوٽين سان گڏائي استعمال ڪجي ته اهو تمام گهڻو فائديمند ثابت ٿي سگهي ٿو. کنئور ۾ اينٽي آڪسائڊنٽ، اينٽي بيڪٽيريل ۽ اينٽي سوڄ خاصيتون موجود هونديون آهن. کنئور جا مختلف فائدا هيٺ ڏجن ٿا.
دل جون بيماريون
ماهرن اهو مڃن ٿا ته جيڪي ماڻهو ڪوليسٽرول جي بيماري جو شڪار آهن اهي کنئور جو استعمال ڪري پنهنجو وڌيل ڪوليسٽرول گهٽائي سگهن ٿا ۽ ڇو ته هاءِ ڪوليسٽرول جو تعلق دل جي بيمارين ۾ مبتلا ڪرڻ جو سبب بڻبو آهي انڪري کنئور جو استعمال نه رڳو ڪوليسٽرول ليول ۾ گهٽتائي پر دل جي بيمارين کان به بچائي سگهي ٿو. کنئور جو استعمال فالج ۽ دل جي دوري جهڙين خطرناڪ بيمارين کان محفوظ رکندو آهي.
چمڙي لاءِ بهترين
جيئن جيئن عمر ۾ واڌ ٿيندي آهي ته چهري سميت جسم جي چمڙي تي گهنج پوڻ لڳندا آهن جن جي لاءِ کنئور جادوئي اثرن وارو نسخو ثابت ٿي سگهي ٿو. چهري تي کنئور جو استعمال ڪرڻ سان گهنج ۽ داغ، موهيڙا وغيره ختم ٿي ويندا آهن ۽ چهرو قدرتي طور پرڪشش ۽ خوبصورت بڻبو آهي.
ڪمزوري جو خاتمو
کنئور جو استعمال انهن ماڻهن لاءِ تمام فائديمند هوندو آهي جيڪي جسماني توڙي مختلف ڪمزورين جو شڪار هوندا آهن، جسم ۾ مختلف بيمارين کانپوءِ ٿيندڙ ڪمزورين کان بچڻ لاءِ به کنئور جو استعمال تمام ڪارائتو ثابت ٿيندو آهي. کنئور کائجي ته ڪمزوري ختم ڪري طاقت ماڻي سگهجي ٿي.
شگر جي مريضن لاءِ قدرت جو تحفو
پراڻا ماهر ۽ حڪيم ته کنئور جا ڪيترائي فائدا ٻڌائيندا آهن پر اڄڪلهه صحت جا ماهر شگر جي مرض ۾ مبتلا مريضن کي کنئور کائڻ جو زور ڀريندا آهن ڇو ته ان جو استعمال شگر جي مريضن لاءِ انتهائي فائديمند آهي. کنئور جو ڪم رت ۾ شگر ليول کي وڌائڻ کان روڪيندو آهي ۽ شگر ليول کي ڪنٽرول ۾ رکندو آهي.
ويم دوران فائدا
ويم کانپوءِ گهڻي قدر مائرون جسماني طور تي ڪمزور ٿي وينديون آهن آڳاٽي دور ۾ ڪراڙا ماڻهو اميدواري سان ٿيندڙ عورتن ۽ ٻار ڄڻيندڙ عورتن کي ڪمزورين کان بچڻ لاءِ کنئور سميت مختلف شين سان گڏائي پنجيري ٺاهي ڏيندا هئا جيڪا انهن جي ڪمزوري جي خاتمي لاءِ انتهائي فائديمند ثابت ٿيندي هئي. ويم کانپوءِ عورتن کي کنئور جي خوراڪ ٺاهي کارائجي ته تمام فائديمند ثابت ٿيندي.
وزن ۾ گهٽتائي
کنئور جي استعمال سان ميٽابولزم تيز ٿيندو آهي ۽ اهو ئي سبب آهي ته جيڪڏهن کنئور جو استعمال ڪيو وڃي ته جسم جي واڌو چرٻي ختم ٿي ويندي آهي جنهن جي ڪري وزن ۾ وڏي حد تائين گهٽتائي اچي ويندي آهي.
