محترم سائين،! ا
سين سچل ڳوٺ، ڪراچي جا رهواسي، اوهان جي خدمت ۾ نهايت ادب ۽ احترام سان هيءَ درخواست پيش ڪريون ٿا ته اسان جي علائقي ۾ ڪي اليڪٽرڪ طرفان گذريل ڪيترن ئي مهينن کان روزانو لڳ ڀڳ 14 ڪلاڪ ڊگهي ۽ بنا اعلان جي لوڊشيڊنگ ڪئي پئي وڃي، جنهن سبب علائقي جا هزارين شهري سخت تڪليفن، ذهني پريشانين ۽ معاشي نقصان کي منهن ڏئي رهيا آهن.
سچل ڳوٺ ڪراچي جو هڪ گهاٽي آبادي وارو علائقو آهي، جتي هزارين خاندان آباد آهن. سخت گرمي ۽ ٻوسٽ واري موسم ۾ ايتري ڊگهي بجلي بندش عوام جي زندگي عذاب بڻائي ڇڏي آهي. گهرن ۾ پاڻي جي فراهمي سخت متاثر ٿي رهي آهي، روزاني زندگيءَ جا معمول درهم برهم ٿي ويا آهن، جڏهن ته عورتون، بزرگ، ٻار ۽ بيمار ماڻهو سخت تڪليف ۾ مبتلا آهن.
مسلسل لوڊشيڊنگ سبب علائقي جي دڪاندارن، ننڍن واپارين، ورڪشاپ مالڪن، درزين، اليڪٽريشنن، ملازمت پيشه ماڻهن ۽ ٻين پورهيت طبقن جو روزگار سخت متاثر ٿي رهيو آهي. بجلي نه هئڻ سبب ڪاروباري سرگرميون معطل ٿي وڃن ٿيون، جنهن ڪري ماڻهن کي روزانو مالي نقصان برداشت ڪرڻو پوي ٿو. اڳ ئي مهانگائي، بيروزگاري ۽ وڌندڙ خرچن سبب پريشان عوام لاءِ اها صورتحال هاڻي ناقابلِ برداشت بڻجي چڪي آهي.
اسان جي ٻارن جي تعليم پڻ هن ڊگهي لوڊشيڊنگ سبب سخت متاثر ٿي رهي آهي. بجلي نه هئڻ ڪري شاگرد ۽ شاگردياڻيون نه سڪون سان پڙهي سگهن ٿا ۽ نه ئي پنهنجو تعليمي ڪم وقت سر مڪمل ڪري سگهن ٿا. امتحانن جي تياري ڪندڙ شاگرد سخت ذهني دٻاءَ جو شڪار آهن، جڏهن ته آن لائين تعليم، ڪمپيوٽر ۽ انٽرنيٽ سان لاڳاپيل تعليمي سرگرميون به شديد متاثر ٿي رهيون آهن. ان کان علاوه، بجلي جي ڊگهي بندش سبب پاڻي جي کوٽ، پيئڻ جي صاف پاڻي جي فراهمي ۾ رڪاوٽ، گهرن ۾ استعمال ٿيندڙ برقي اوزارن جي خرابي، موبائل ۽ مواصلاتي سهولتن ۾ خلل، ۽ سخت گرمي سبب صحت جا مسئلا پڻ وڌي رهيا آهن. اهڙي صورتحال شهرين جي روزاني زندگي ۽ زندگي جي معيار تي انتهائي ناڪاري اثر وجهي رهي آهي.
اسان کي ان ڳالهه تي پڻ سخت ڳڻتي آهي ته سچل ڳوٺ جا رهواسي باقاعدگي سان بجلي جا بل ادا ڪن ٿا، تنهن هوندي به کين انتهائي غيرمنصفاڻِي ۽ ڊگهي لوڊشيڊنگ کي منهن ڏيڻو پوي ٿو، جيڪا شهرين جي بنيادي حقن جي ڀڃڪڙي ۽ عوام سان سراسر ناانصافي آهي.
تنهن ڪري اسان اوهان کي پُرزور اپيل ڪريون ٿا ته هن سنگين عوامي مسئلي جو فوري نوٽيس وٺندي ڪي اليڪٽرڪ جي انتظاميا کي هدايتون جاري ڪيون وڃن ته سچل ڳوٺ ۾ جاري بنا اعلان جي ڊگهي لوڊشيڊنگ جو ترت خاتمو ڪيو وڃي، بجلي جي بنا رڪاوٽ ۽ منصفاڻي فراهمي کي يقيني بڻايو وڃي، ۽ هن مسئلي جي مستقل حل لاءِ اثرائتا قدم کنيا وڃن، جيئن علائقي جي عوام کي هن مسلسل اذيت مان نجات ملي سگهي. اسان کي پورو يقين آهي ته اوهان عوامي ڀلائي کي نظر ۾ رکندي هن اهم مسئلي تي فوري توجهه ڏيندا ۽ لاڳاپيل ادارن کي ضروري هدايتون جاري ڪندا، جيئن سچل ڳوٺ جا هزارين رهواسي سک جو ساهه کڻي سگهن.
حريف چانڊيو
سچل ڳوٺ ڪراچي
