اسلام آباد(ع آ نيوز) نئين وفاقي بجيٽ کان اڳ، هڪ ڀيرو ٻيهر سوال اٿاريو پيو وڃي ته پاڪستان ۾ سڀ کان وڌيڪ ٽيڪس ڪير ادا ڪري ٿو ۽ ٽيڪس دائري کان ٻاهر رهندڙ طاقتور طبقن کي ڇو نشانو نه بڻايو پيو وڃي. پگهاردارن جو ادا ڪيل ٽئڪس ريئل اسٽيٽ ۽ ٻين شعبن کان مٿي آهي. ملڪ ۾ لکين پگهاردار ملازم پنهنجي ماهوار آمدني مان سڌو سنئون آمدني ٽيڪس ادا ڪن ٿا، پر ان جي باوجود، انهن کي پنهنجي روزاني زندگي ۾ مختلف اڻ سڌي ٽيڪسن کي منهن ڏيڻو پوي ٿو. پيٽرول خريد ڪرڻ کان وٺي موبائل فون استعمال ڪرڻ ۽ کاڌي پيتي جون شيون خريد ڪرڻ تائين، تقريبن هر مرحلي تي عوام کان ٽيڪس گڏ ڪيو ويندو آهي.اسلام آباد جي هڪ خانگي تعليمي اداري ۾ پڙهائڻ واري هڪ عورت جو چوڻ آهي ته سندس ماهوار پگهار مان ٽيڪس ڪٽڻ کان پوءِ به، هوءَ پيٽرول، موبائل ۽ ٻين ضروري شين تي الڳ الڳ ٽيڪس ادا ڪري ٿي.سرڪاري انگن اکرن موجب، پاڪستان ۾ ٽيڪس وصولي جو هڪ وڏو حصو اڻ سڌي ٽيڪسن مان ايندو آهي. اهو ئي سبب آهي ته گهٽ آمدني ۽ وڌيڪ آمدني وارا ماڻهو ڪيترن ئي ڪيسن ۾ ساڳئي شرح تي ٽيڪس ادا ڪندا آهن.معاشي ماهرن جو چوڻ آهي ته هن نظام مان سڀ کان وڌيڪ نقصان عام شهري ۽ گهٽ آمدني واري طبقي کي ٿيندو آهي.حڪومت هلندڙ مالي سال دوران پيٽروليم ليوي ۾ 1,200 ارب رپين کان وڌيڪ گڏ ڪيو. ڪجهه سال اڳ، هي آمدني ان جي مقابلي ۾ تمام گهٽ هئي، جڏهن ته، ليوي جي شرح ۾ مسلسل واڌ جي ڪري، وصولي ڪيترائي ڀيرا وڌي وئي آهي.نقادن جي مطابق، ان جو سڌو سنئون اثر ٽرانسپورٽ، ضروري شين ۽ مجموعي مهانگائي تي پوي ٿو. ايف بي آر جي انگن اکرن موجب، پگهاردار طبقي گذريل مالي سال ۾ 605 ارب رپين کان وڌيڪ آمدني ٽيڪس ادا ڪيو. ماهرن جو چوڻ آهي ته هن سال به هن شعبي پاران ادا ڪيل ٽيڪس جي رقم ڪيترن ئي وڏن ڪاروباري شعبن ۽ ريئل اسٽيٽ شعبي کان وڌيڪ رهي آهي.
