اسلام آباد(عوامي آواز نيوز) نئين بجيٽ ۾ ٽيڪسن جي واڌ سبب سولر پينل، اليڪٽرڪ ۽ هائبرڊ گاڏيون مهانگيون ٿيڻ جو خدشو پيدا ٿي ويو آهي جڏهن ته عالمي مالياتي فنڊ يعني آءِ ايم ايف پاران ڪنهن به قسم جي ٽيڪس ڇوٽ ڏيڻ کان انڪار ڪيو ويو آهي. ايندڙ مالي سال ٻه هزار ڇهويهه اٺاويهه جي بجيٽ حوالي سان مختلف ٽيڪس تجويزن تي ڪم جاري آهي جنهن تحت سولر پينلن، اليڪٽرڪ ۽ هائبرڊ گاڏين جي قيمتن ۾ وڏي اضافي جو امڪان آهي. ذريعن موجب آءِ ايم ايف ٽيڪس ڇوٽ ختم ڪندي اي ويهڪلز تي جنرل سيلز ٽيڪس هڪ سيڪڙو مان وڌائي ارڙهن سيڪڙو ڪرڻ جي تجويز ڏني آهي جڏهن ته هائبرڊ گاڏين تي به ٽيڪس اٺ سيڪڙو مان وڌائي ارڙهن سيڪڙو ڪرڻ جي سفارش سامهون آئي آهي.تجويز ڪيل پلان تحت سولر پينلن تي جي ايس ٽي ڏهه سيڪڙو مان وڌائي ارڙهن سيڪڙو ڪرڻ جي تجويز ڏني وئي آهي جنهن جي نتيجي ۾ اليڪٽرڪ ڪارن، موٽرسائيڪلن، رڪشائن، ٽرڪن ۽ بسن سميت ٻين اي ويهڪلز جي قيمتن ۾ نمايان اضافو متوقع آهي جڏهن ته اليڪٽرڪ پڪ اپ، ٽريڪٽر ۽ ڊبل ڪيبن گاڏين تي به ٽيڪس وڌائڻ جي تجويز زيرِ غور آهي. ٻئي طرف ٽيڪسٽائل سيڪٽر حڪومت کان ٽي سئو ستاويهه ارب رپين جا ريفنڊز فوري طور جاري ڪرڻ جو مطالبو ڪيو آهي ۽ صنعتڪارن ٽيڪس، بجلي ۽ گئس جي اگهن ۾ گهٽتائي جي اپيل پڻ ڪئي آهي. ان ممڪنه قدم سان برآمد ڪندڙن کي هڪ سئو ارب رپين تائين ريليف ملڻ جو امڪان آهي پر برآمدي شعبي لاءِ ڪنهن وڏي ريليف پيڪيج جا امڪان اڃا تائين محدود ڏيکارجي رهيا آهن.
