حيدرآباد(رپورٽر) شاگردياڻين ۽ ملازمت پيشه عورتن ۾ مفت پنڪ اسڪوٽيز ورھائڻ واري تقريب حيدرآباد جي هڪ مقامي هوٽل ۾ منعقد ٿي، جنهن دوران مجموعي طور 200 عورتن کي مفت پنڪ اليڪٽرڪ اسڪوٽيز فراهم ڪيون ويون، سينيئر صوبائي وزير شرجيل انعام ميمڻ خصوصي مهمان طور شرڪت ڪندي پاڻ عورتن ۾ اسڪوٽيز ورهايون. تقريب کي خطاب ڪندي شرجيل انعام ميمڻ چيو ته سنڌ حڪومت حيدرآباد ۾ عورتن کي بنا معاوضي پنڪ اسڪوٽيز فراهم ڪري رهي آهي ۽ اها سهولت خاص طور شاگردياڻين، ملازمت پيشه ۽ ڪاروبار سان لاڳاپيل عورتن لاءِ آهي، انهن اسڪوٽيز جي ورڇ ۾ ڪنهن به سياسي وابستگي، جماعت يا لساني سڃاڻپ کي نظر ۾ نه رکيو پيو وڃي ۽ نه ئي ڪنهن کان ووٽ جي گهر ڪئي پئي وڃي، ڇو ته ووٽ ڏيڻ هر شهري جو بنيادي ۽ جمهوري حق آهي، سنڌ حڪومت صحت جي شعبي ۾ پڻ اهم اڳڀرائي ڪري رهي آهي، جتي سائبر نائف جهڙيون جديد ۽ مهانگيون سهولتون عوام کي مفت فراهم ڪيون پيون وڃن، جيڪي دنيا جي چند ملڪن ۽ محدود اسپتالن ۾ موجود آهن، عورتن کي بااختيار بڻائڻ لاءِ سنڌ حڪومت ڪيترائي قدم کنيا آهن، جن ۾ بينظير انڪم سپورٽ پروگرام ذريعي مالي سهائتا، گهرن جي مالڪي عورتن جي نالن منتقل ڪرڻ ۽ پنڪ بس سروس جو آغاز شامل آهي، اسڪوٽيز صرف عورتن جي استعمال لاءِ آهن، جيڪڏهن ڪو مرد انهن کي هلائيندي ڏٺو ويو ته ان خلاف سخت قانوني ڪارروائي ڪئي ويندي.
