اسلام آباد(بيورو)وزيراعظم شهبازشريف چين جي صدر شي جن پنگ جي قيادت ۾ چين جي ترقي ۽ خوشحالي لاءِ کنيل قدمن کي ساراهيندي چيو آهي ته دنيا چين کان سواءِ ترقي نٿي ڪري سگهي، ۽ اها ڳالهه اسان سڀني لاءِ اطمينان ۽ فخر جو باعث آهي۔پاڪ چين سفارتي لاڳاپن جي 75هين سالگرهه جي تقريب کي خطاب ڪندي وزيراعظم شهباز شريف چيو ته پاڪستان جي حڪومت ۽ عوام جي طرفان چيني قيادت، صدر شي جن پنگ، وزيراعظم لي ۽ چيني ڀائرن ۽ ڀينرن کي دل جي گهراين سان مبارڪباد پيش ڪريان ٿو۔ هن چيو ته 75 سال اڳ ٻنهي ملڪن جي باني اڳواڻن سفارتي لاڳاپن جو بنياد رکيو هو۔هن چيو ته پاڪستان کي اهو اعزاز حاصل آهي ته اهو پهريون اسلامي ملڪ هو جنهن چين کي تسليم ڪيو، ۽ دنيا جي شروعاتي ملڪن مان هڪ هو جنهن چين سان لاڳاپا قائم ڪيا۔ ان کان پوءِ ٻنهي ملڪن ڪڏهن به پوئتي نهاريو، ۽ گڏيل جدوجهد، ڪوششن ۽ خلوص وسيلي اهڙا لاڳاپا قائم ڪيا جيڪي دنيا ۾ بي مثال آهن۔وزيراعظم چيو ته گذريل 75 سالن دوران چيني قيادت ۽ عوام پاڪستان سان مضبوط پهاڙ وانگر گڏ بيٺا رهيا آهن۔ زلزلا هجن، ٻوڏون هجن، امن جو وقت هجي يا ڏکيائيون، چين هميشه پاڪستان جي بي لوث ۽ اڻٿڪ مدد ڪئي آهي، جيڪا تاريخ ۾ هڪ منفرد مثال آهي۔هن وڌيڪ چيو ته 1960ع واري ڏهاڪي ۾ بيجنگ ايئرپورٽ تي لهندڙ پهرين پرواز پاڪستان جي هئي، جڏهن ته پاڪستان هينري ڪسنجر جي بيجنگ دوري جو به بندوبست ڪيو هو۔ پاڪستان هميشه بنا ڪنهن هٻڪ جي ون چائنا پاليسي جي حمايت ڪئي آهي ۽ مستقبل ۾ به ڪندو رهندو۔شهباز شريف چيو ته صدر شي جن پنگ جي بيلٽ اينڊ روڊ ويزن تحت سي پيڪ ٻنهي ملڪن جي تعاون جو بهترين مثال آهي، جيڪو پاڪستان جي معيشت، روزگار ۽ ترقي لاءِ اهم ڪردار ادا ڪري رهيو آهي۔ سي پيڪ پاڪستان جي هر ڪنڊ تائين خوشحالي پهچائڻ لاءِ چين جي عزم جو وڏو مظهر آهي۔هن ياد ڏياريو ته 2010ع جي تباهه ڪندڙ ٻوڏ دوران چين انهن پهرين ملڪن مان هو، جيڪو هيليڪاپٽرن، دوائن، ڊاڪٽرن ۽ ماهرن سان پاڪستان جي مدد لاءِ پهتو۔ پاڪستاني قوم چيني عوام جي ان سخاوت ۽ همدردي کي ڪڏهن به وساري نٿي سگهي۔وزيراعظم چيو ته صدر شي جن پنگ جي پاليسي صحيح آهي، جيڪا گهڻ رخي تعاون، سفارتڪاري ۽ پرامن ڳالهين ذريعي تڪرارن جي حل تي يقين رکي ٿي۔ هن چيو ته آمريڪا ۽ ايران وچ ۾ تازو علائقائي ڇڪتاڻ دوران پاڪستان امن لاءِ اهم ڪردار ادا ڪيو، جڏهن ته چين سميت ٻين ملڪن پاڪستان جي امن ڪوششن جي مڪمل حمايت ڪئي۔هن چيو ته سمنڊن جي کوٽائي کان وٺي هماليه جي بلند چوٽين تائين، پاور پلانٽن ۽ ڊيمن کان وٺي ڏکين وقتن ۾ مدد تائين، چين پاڪستان جو سڀ کان مضبوط ۽ قابل اعتماد دوست رهيو آهي۔وزيراعظم چيو ته جڏهن به هو بيجنگ، گوانگ زو يا چين جي ٻين شهرن جو دورو ڪندو آهي ته هر دفعي نوان شهر، نيون صنعتون ۽ ترقي جا نوان منظر ڏسڻ ۾ ايندا آهن۔ لکين چيني سخت محنت سان پنهنجي زندگين کي خوشحال بڻائي رهيا آهن۔هن چيو ته اڄ اقتصادي ترقي ۽ فوجي طاقت جي لحاظ کان چين دنيا جي اڳواڻ ملڪن مان آهي، ۽ دنيا چين کان سواءِ ترقي نٿي ڪري سگهي۔ملڪ ۾ رهندڙ چيني شهرين بابت وزيراعظم چيو ته پاڪستان چيني ڀائرن لاءِ اعليٰ معيار جي سيڪيورٽي فراهم ڪرڻ ۾ ڪا به ڪسر نه ڇڏيندو۔ جيڪا سيڪيورٽي مون يا صدرِ مملڪت کي حاصل آهي، ساڳي هر چيني شهري کي به حاصل هئڻ گهرجي۔هن وڌيڪ چيو ته پاڪستان دهشتگردي خلاف تعاون کي وڌيڪ مضبوط بڻائيندو ۽ سيڪيورٽي قدمن کي وڌيڪ بهتر ڪرڻ تي ڌيان ڏيندو۔وزيراعظم اميد ظاهر ڪئي ته پاڪ چين دوستي جي جشن جون تقريبون سڄو سال جاري رهنديون، ۽ جلد صدر شي جن پنگ پاڪستان جو دورو ڪري اهڙين تقريبن ۾ شرڪت ڪندا۔صدرِ مملڪت آصف زرداري چيو آهي ته پاڪستان ۽ چين جو 75 سال اڳ شروع ٿيل سفر هاڻي هر موسم واري اسٽريٽجڪ سهڪاري ڀائيواري ۾ تبديل ٿي چڪو آهي، پاڪستان چين جي بنيادي قومي مفادن ۽ ون چائنا پاليسي جي حمايت ڪري ٿو، جڏهن ته گوادر بندرگاهه جي تعمير پاڪستان لاءِ چين جو هڪ عظيم تحفو آهي۔اسلام آباد ۾ پاڪ چين سفارتي لاڳاپن جي 75هين سالگرهه جي حوالي سان ٿيل تقريب کي خطاب ڪندي صدر آصف علي زرداري چيو ته 75 سال اڳ شروع ٿيل سفر هاڻي هر موسم واري اسٽريٽجڪ سهڪاري ڀائيواري ۾ بدلجي چڪو آهي۔ پاڪستان ۽ چين هميشه هڪ ٻئي جي بنيادي مفادن جو دفاع ڪيو آهي، جڏهن ته چين سان دوستي پاڪستان جي پرڏيهي پاليسي جو بنيادي ٿنڀو آهي۔هن چيو ته ترقي حاصل ڪرڻ پاڪستان ۽ چين جو گڏيل خواب آهي، ٻنهي ملڪن جي لاڳاپن کي عوامي، سياسي ۽ اداري واري سطح تي مڪمل حمايت حاصل آهي، ۽ انهن لاڳاپن کي چيني صدر شي جن پنگ جي قيادت ۾ نون بلندين تائين پهچايو ويو آهي۔ پاڪستان چين جي بنيادي قومي مفادن ۽ ون چائنا پاليسي جي مڪمل حمايت جاري رکندو۔صدر زرداري وڌيڪ چيو ته گوادر بندرگاهه جي تعمير پاڪستان لاءِ چين جو هڪ وڏو تحفو آهي، جڏهن ته عالمي ترقي، سلامتي ۽ حڪمراني بابت چين جو ڪردار ساراهه جوڳو آهي۔ هن چيو ته هن گذريل سال ٻيهر چين جو دورو ڪيو، جتي صوبائي قيادت ۽ ڪاروباري ادارن سان فائديمند ڳالهيون ٿيون۔هن پنهنجي خطاب جي پڄاڻيءَ تي امن، ترقي ۽ خوشحالي لاءِ نيڪ خواهشن جو اظهار ڪيو۔
