اسلام آباد(ع آ نيوز) بين الاقوامي مالياتي فنڊ (آءِ ايم ايف) پاڪستان حڪومت کان سيلز ٽيڪس ۾ سڀ ڇوٽ ختم ڪرڻ جو مطالبو ڪيو آهي. ذريعن موجب، آءِ ايم ايف مشن جي ايف بي آر سان بجيٽ تي ڳالهين جو هي آخري ڏينهن آهي ۽ آءِ ايم ايف مشن ايف بي آر سان ڪل 3 ملاقاتون ڪندو.ذريعن جو چوڻ آهي ته آءِ ايم ايف ايندڙ مالي سال لاءِ وصولين جو هدف 15264 ارب رکڻ تي اصرار ڪري ٿو، جڏهن ته ايف بي آر پاران وصولين جو هدف گهٽائڻ لاءِ ڪوششون جاري آهن. ذريعن موجب، آءِ ايم ايف مطالبو ڪري ٿو ته ايندڙ مالي سال ۾ لاڳو ڪرڻ لاءِ  778 ارب رکيا وڃن ۽ 430 ارب جا نوان ٽيڪس لاڳو ڪيا وڃن. نوان ٽيڪس ڪٿي لاڳو ڪيا ويندا؟ ايف بي آر جا عملدار آءِ ايم ايف مشن کي ان حوالي سان بريفنگ ڏيندا.ذريعن جو چوڻ آهي ته ايف بي آر آءِ ايم ايف سان جي ڊي پي جو 11.2 سيڪڙو وصولين جو هدف مقرر ڪرڻ تي اتفاق ڪيو آهي، پر سيلز ٽيڪس بابت تفصيلي ڳالهيون ٿينديون. ذريعن جو چوڻ آهي ته آءِ ايم ايف سيلز ٽيڪس ۾ هر قسم جي ڇوٽ ختم ڪرڻ ۽ سيلز ٽيڪس جي شرح ۾ گهٽتائي ۽ ان کي سڀني لاءِ هڪجهڙو لاڳو ڪرڻ جو مطالبو ڪيو آهي. آءِ ايم ايف سيلز ٽيڪس جي شرح کي 22.8 سيڪڙو کان گهٽائي 18 سيڪڙو ڪرڻ جي تجويز ڏني آهي. بين الاقوامي مالي فنڊ (آءِ ايم ايف) بينظير انڪم سپورٽ پروگرام جي رقم ۾ 5,500 رپيا واڌ جو مطالبو ڪيو آهي. ذريعن موجب، آءِ ايم ايف رقم 14,500 رپين کان وڌائي 20,000 رپيا ڪرڻ جي تجويز پيش ڪئي آهي. بينظير انڪم سپورٽ پروگرام تي آءِ ايم ايف مشن سان ڳالهيون جاري آهن. مشن کي بينظير انڪم سپورٽ پروگرام جي سڀني ڪمن بابت بريفنگ ڏني پئي وڃي. ڳالهين ۾ بي آءِ ايس پي سماجي تحفظ جي نظام جو جائزو ورتو پيو وڃي. بي آءِ ايس پي عملدارن اسپانسرشپ پروگرام ۾ رجسٽرڊ ڊيٽا تي مشن کي بريفنگ ڏني آهي. ان کان علاوه، خاندانن جي رجسٽريشن، ٽه ماهي رقم ۽ ايندڙ مالي سال جي گهرجن بابت بريفنگ ڏني وئي آهي.ذريعن جو چوڻ آهي ته ايندڙ مالي سال ۾ اسپانسرشپ پروگرام جي ٽه ماهي رقم وڌائي ويندي. آءِ ايم ايف مشن سان ڪل 4 ملاقاتون شيڊول آهن. مشن جي بي آءِ ايس پي ۽ ايف بي آر جي ٽن عملدارن سان هڪ ملاقات ٿيندي.

بجلي واهپيدارن کان لڳ ڀڳ 9 رپيا في يونٽ تائين اضافي ٽيڪس وصولي

اسلام آباد (بيورو) بجلي واهپيدارن کان لڳ ڀڳ 9 رپيا في يونٽ تائين اضافي ٽيڪس وصولي جو انڪشاف ٿيو، بجلي بلن ۾ مختلف مدن تحت 6 قسمن جا ٽيڪس شامل ڪيا ويا، صارفين تي بار وڌي ويو، ان سلسلي ۾ رپورٽن ۾ ٻڌايو ويو ته بجلي صارفين کان لڳ ڀڳ 9 رپيا في يونٽ تائين اضافي ٽيڪس وصولي جو انڪشاف سامهون آيو آهي، رپورٽن موجب فيڊرل بورڊ آف ريوينيو (ايف بي آر) توانائي شعبي کي ٽيڪس وصولي جو اضافي ذريعو بڻائي ڇڏيو آهي، جنهن سبب بجلي بلن ۾ مختلف مدن تحت وڌيڪ ٽيڪس شامل ڪيا پيا وڃن، بجلي  جي بلن ۾ مجموعي طور 6 مختلف قسمن جا ٽيڪس شامل آهن، جن ۾ 18 سيڪڙو جنرل سيلز ٽيڪس، انڪم ٽيڪس ۽ ايڊوانس ٽيڪس پڻ شامل آهن، رپورٽ موجب صارفين کان بجلي جي بلن ۾ لڳ ڀڳ 9 رپيا في يونٽ تائين اضافي ٽيڪس وصول ڪيو پيو وڃي، ان صورتحال سبب گهريلو ۽ صنعتي ٻنهي شعبي تي مالي دٻاءُ وڌي ويو آهي.

بجلي هڪ رپيو 93 پئسا في يونٽ سستي ٿيڻ جو امڪان

اسلام آباد (بيورو) ٽي ماهي ايڊجسٽمينٽ ۾ بجلي هڪ رپيو 93 پئسا في يونٽ سستي ٿيڻ جو امڪان ظاهر ڪيو ويو، رپورٽن موجب اپريل جي ماهوار  ايڊجسٽمينٽ ۾ بجلي هڪ رپيو 73 پئسا في يونٽ مهانگي ٿيڻ جو امڪان آهي، جون ۾ ٽي ماهي گهٽتائي ۽ ماهوار ايڊجسٽمينٽ کي گڏ ڪرڻ بعد خالص رليف 20 پئسا في يونٽ رهڻ جو امڪان آهي، حتمي فيصلو نيپرا طرفان ٽي ماهي ۽ ماهوار ايڊجسٽمينٽ جي ٻڌڻين بعد ڪيو ويندو، پاور ڊويزن موجب اپريل 2026ع جي ماهوار ايڊجسٽمينٽ ۾ بجلي جي قيمت ۾ هڪ رپيو 73 پئسا واڌ بڻجي ٿي، پاور ڊويزن موجب ٽي ماهي ايڊجسٽمينٽ ۾ بجلي جي اگهه ۾ هڪ رپيو 93 پئسا في يونٽ گهٽتائي بڻجي ٿي، ترجمان پاور ڊويزن چيو آهي ته بروقت ۽ اثرائتن قدمن سبب جون ۾ بجلي جي قيمت ۾ ڪو اضافو نه ٿيندو، ترجمان موجب بجلي واهپيدارن کي 5 کان 6 رپيا في يونٽ ماهوار ايڊجسٽمينٽ جي بار کان بچايو ويو، ايل اين جي جي بندش ۽ مهانگي فرنس آئل جي استعمال باوجود صارفين تي اضافي بار نه وڌو ويندو.

حافظ نعيم طرفان پيٽروليم ليوي خلاف آئيني  عدالت ۾ پٽيشن داخل

اسلام آباد (بيورو) جماعت اسلامي جي امير حافظ نعيم الرحمان پاران ملڪ ۾ لاڳو پيٽروليم ليوي نظام خلاف وفاقي آئيني عدالت ۾ درخواست داخل ڪئي وئي، درخواست ۾ نئين متعارف ڪرايل ”ڪلايميٽ سپورٽ ليوي“ کي به چئلينج ڪيو ويو، درخواست ايڊووڪيٽ عمران شفيق  ذريعي داخل ڪئي وئي، جنهن ۾ موقف اختيار ڪيو ويو آهي ته پيٽروليم ليوي آئين، پارلياماني بالادستي، وفاقي نظام ۽ بنيادي حقن جي خلاف آهي، درخواست موجب پيٽروليم ليوي هاڻي صرف ريگيوليٽري سرچارج نه رهي آهي، پر وفاقي حڪومت جو وڏو آمدني ذريعو بڻجي چڪي آهي، درخواست ۾ چيو ويو آهي ته ليوي پارليامينٽ بدران ايگزيڪيوٽو نوٽيفڪيشنز ۽ ايس آر اوز ذريعي لاڳو ڪئي پئي وڃي، درخواست ۾ موقف اختيار ڪيو ويو ته هن وقت پيٽرول تي پيٽروليم ليوي تقريبن 117 رپيا في ليٽر تائين پهچي چڪي آهي، جيڪا تاريخ جي بلند ترين سطح آهي، درخواست ۾ چيو ويو آهي ته ليوي جي مد ۾ گڏ ٿيندڙ رقم پيٽرول جي بنيادي قيمت جو وڏو حصو بڻجي چڪي آهي، جڏهن ته ان سان گڏ ٻيا ٽيڪس به وصول ڪيا پيا وڃن، عدالت ۾ مالي سال 2025-26 جا انگ اکر پڻ پيش ڪيا ويا آهن، جن موجب پيٽروليم ليوي مان تقريباً 1.47 ٽريلين رپيا آمدني جو اندازو آهي، درخواست ۾ چيو ويو آهي ته حڪومت فنانس ايڪٽ 2025 ذريعي پيٽروليم ليوي تي اڳ واري قانوني حد ختم ڪري ڇڏي آهي، موقف موجب ان عمل سان ايگزيڪيوٽو کي غير محدود مالي اختيار ملي ويا آهن، جيڪو آئيني اصولن جي خلاف آهي، ليوي کي ٽيڪس جي صورت ۾ استعمال ڪيو پيو وڃي پر ان جي بدلي عوام کي ڪا سڌي سهولت نه ڏني پئي وڃي، درخواستگذار موجب هن طريقي سان عوام تي وڏو مالي بار وڌو ويو آهي، جيڪو بنيادي حقن ۽ وفاقي توازن جي خلاف آهي، استدعا ڪئي وئي آهي ته عدالت پيٽروليم ليوي تي پارلياماني نگراني بحال ڪري ۽ غير محدود ايگزيڪيوٽو اختيار ختم ڪري.