فطرت جون نشانيون ڪڏهن به خاموش نه هونديون آهن، اهي ڪڏهن ڪڏهن اسان کي سخت سردي جي صورت ۾ ته ڪڏهن شديد گرمي جي صورت ۾ پاڻ ڏانهن متوجهه ڪنديون آهن. پاڪستان هن وقت جنهن موسمي صورتحال مان گذري رهيو آهي اها صرف گرمي جي شدت ناهي پر هڪ مڪمل آزمائش جو منظر پيش ڪري رهي آهي. ڪجهه علائقن ۾ گرمي پد 40 ڊگريء کي پار ڪرڻ ۽ 47 کان 50 ڊگري سينٽي گريڊ تائين پهچڻ جي اڳڪٿي ڪئي وئي آهي. هن وقت، رستا باهه جو ڏيک ڏئي رهيا آهن، سخت هوائون انسان کي ساڙي رهيون آهن ۽ هر عام ماڻهو ته پريشان آهي، پر خاص طور تي مزدور طبقو، هن سخت آزمائش ۽ مصيبت ۾ مبتلا ٿي ويو آهي. هي منظر نه رڳو موسم جي شدت کي ظاهر ڪري ٿو، پر اسان جي اجتماعي بي حسي ۽ دور انديشي جي کوٽ کي به ظاهر ڪري ٿو. جڏهن ڪو مزدور سرن جي گرم بٺي تان سرون کڻندو آهي يا ڪو رڪشا ڊرائيور ٻرندڙ سج هيٺان بيهي روزي ڪندو آهي، ته محنت جي عظمت جو اصل مطلب ظاهر ٿي ويندو آهي. پر حقيقت اها آهي ته هي اهو طبقو آهي جيڪو سڀ کان وڌيڪ متاثر ۽ گهٽ ۾ گهٽ محفوظ آهي. اهڙي صورتحال ۾، سماج جي زميوار طبقي کي عملي ڪردار ادا ڪرڻ گهرجي، گذريل سالن جي ڀيٽ ۾، هن سال بي وقت برساتون، ڊگهي خشڪ سالي، غير معمولي گرمي موسمياتي تبديلي ڏانهن اشارو ڪري ٿي ڇو ته موسمياتي تبديلي هاڻي صرف هڪ بيانيو نه پر هڪ تلخ حقيقت بڻجي ويئي آهي. گرمي جي لهرن ۽ گرمي جي شعلن جي ڦاٽڻ جهڙا واقعا خراب ٿيندڙ قدرتي نظام جون خطرناڪ علامتون آهن جيڪي انساني صحت، معيشت ۽ ماحول تي اثر انداز ٿي رهيون آهن.
گذريل ڏينهن پاڪستان ميٽرولاجيڪل ڊپارٽمينٽ آگاهه ڪيو ته صوبي جي اڪثر حصن ۾ موسم گرم يا سخت گرم ۽ خشڪ رهڻ جو امڪان آهي. جڏهن ته، 03 مئي تائين صوبي جي وچين ۽ مٿانهين علائقن ۾ هيٽ ويو (گرمي جي لهر) واري صورتحال پيدا ٿيڻ جو امڪان آهي. ممڪن اثرات ڄامشورو، دادو، شهيد بينظير آباد، ڪشمور، گھوٽڪي، سانگھڙ، خيرپور، نوشهروفيروز، جيڪب آباد، لاڙڪاڻو ۽ سکر جي ضلعن ۾ ڏينهن جو وڌ ۾ وڌ گرمي پد معمول کان 4 کان 6 ڊگري سينٽي گريڊ وڌيڪ رهڻ جو امڪان آهي. ممڪن اثر ۽ مشورو ڏنو ويو ته ملڪ ۾ هيٽ ويو جي صورتحال سبب عام ماڻهن، خاص طور تي ٻارن، عورتن ۽ بزرگ شهرين کي احتياطي تدبيرون اختيار ڪرڻ جو مشورو ڏنو وڃي ٿو. ڏينهن جي وقت سڌو سنئون سج جي روشنيءَ ۾ نڪرڻ کان پاسو ڪيو وڃي ۽ پاڻي جو وڌيڪ استعمال ڪيو وڃي. آبادگارن کي مشورو ڏنو وڃي ٿو ته هو موسمي حالتن کي نظر ۾ رکندي پنهنجي فصلن جي سرگرمين (ڪڻڪ جي لاهي) جو انتظام ڪن ۽ پنهنجي چوپائي مال جو به خيال رکن. آنڌي يا مٽي جي طوفان جي صورت ۾ ڪمزور اڏاوتن، بجلي جي ٿنڀن، وڻن، گاڏين ۽ سولر پينلز کي نقصان پهچي سگهي ٿو. ان سڄي صورتحال کي نظر ۾ رکندي، لاڳاپيل ڊپٽي ڪمشنرز، لائين ڊپارٽمينٽس ۽ ٻين اختيارين کي گذارش ڪئي وئي ته هو هيٽ ويو بابت اڳواٽ موڪليل SOPs جي روشنيءَ ۾ سمورا ضروري احتياطي ۽ تدارڪي اپاءَ وٺن.
اهو ياد رکڻ گهرجي ته انتهائي گرمي جو اثر سڌو سنئون انساني جسم تي ٿيندو آهي. هيٽ اسٽروڪ، پاڻي جي سخت کوٽ، دل جي بي ترتيب ڌڙڪڻ ۽ بيهوشي جهڙا خطرا لمحا ڪنهن به وقت موتمار ٿي سگهن ٿا. ٻار، بزرگ ۽ مزدور هن خطري جي سڀ کان وڌيڪ متاثر ٿيندا آهن. هتي هڪ افسوسناڪ پاسو اهو به آهي ته اسان هڪ قوم جي حيثيت سان احتياطي اپاءَ کي سنجيدگي سان نه ٿا وٺون، جيتوڻيڪ ٿوري احتياط اسان کي وڏي نقصان کان بچائي سگهي ٿو. اهڙين حالتن ۾، انفرادي ۽ اجتماعي ذميوارين جو احساس ناگزير ٿي ويندو آهي. جيڪڏهن هر پاڙي ۾ ڪجهه ڄاڻ رکندڙ ماڻهن تي مشتمل هڪ فلاحي ٽيم ٺاهي وڃي ته ڪيترائي مسئلا حل ٿي سگهن ٿا. نوجوانن جي هن ٽيم ذريعي، اهڙن گهرن جي نشاندهي ڪري سگهجي ٿي جتي پنکا، ڪولر يا ٿڌي پاڻي جون سهولتون موجود نه آهن، هن کوٽ کي باهمي تعاون سان پورو ڪري سگهجي ٿو. روڊ جي ڪناري تي ڪم ڪندڙن، ڪار ڊرائيورن ۽ مسافرن لاءِ ڇانو، ٿڌو پاڻي ۽ مختصر آرام جو انتظام ڪري سگهجي ٿو. بس اسٽينڊ، ريلوي اسٽيشن ۽ ٻين عوامي هنڌن تي واٽر ڪولر، ڇانوَ ڪرڻ ۽ وڻ لڳائڻ جهڙا قدم نه رڳو فوري امداد مهيا ڪن ٿا پر هڪ ڊگهي مدت جي خيرات پڻ ٿي سگهي ٿي. جيڪڏهن نوجوان منظم ٿين ۽ مسافرن کي ٿڌو پاڻي فراهم ڪن ته هي خدمت انسانيت جي هڪ چمڪندڙ مثال بڻجي سگهي ٿي. اهو پڻ ذهن ۾ رکڻ گهرجي ته گرمي جي شدت صرف انسانن تائين محدود ناهي پر جانورن ۽ پکين تي به اثر انداز ٿي سگهي ٿي. گهرن، گهٽين ۽ ڇتين تي پاڻي جا ڪنٽينر رکڻ ۽ روڊن جي ڪنارن تي وڻ لڳائڻ بظاهر غير اهم پر اثر جي لحاظ کان تمام اهم عمل آهن. ضرورت صرف مرضي ۽ جذبي جي ناهي پر گڏوگڏ اجتماعي ڀلائي جي ذهنيت جي به آهي. ٻئي طرف، حڪومتي سطح تي به فوري ۽ اثرائتي قدمن کڻڻ جي سخت ضرورت آهي. پاڻي جي بي ترتيب فراهمي، بجلي جي مسلسل دستيابي، اسپتالن ۾ هنگامي سهولتن جي فراهمي ۽ عوامي آگاهي مهم وقت جون سڀ کان اهم ضرورتون آهن. خاص طور تي ڳوٺاڻن ۽ پٺتي پيل علائقن ۾، اهي قدم زندگي ۽ موت جي وچ ۾ فرق پيدا ڪري سگهن ٿا. بهرحال ان حقيقت کي وساري نه ٿو سگهجي ۽ نه صرف سرڪاري قدم ڪافي آهن پر هڪ زنده ۽ باشعور قوم اها آهي جيڪا مشڪل حالتن ۾ به پنهنجي ذميواري ڏيکاري ٿي. اسان کي سادگي، احتياط ۽ پنهنجي طرز زندگي ۾ ٻين لاءِ آساني پيدا ڪرڻ جي عادت اختيار ڪرڻي پوندي. سخت گرمي جي هيءَ موسم اصل ۾ اسان جي اخلاقي، سماجي ۽ انساني روين جو امتحان آهي. اهو اسان کي ياد ڏياري ٿو ته انسانيت صرف لفظن جو مجموعو ناهي پر عمل جي ضرورت آهي. هڪ پياسي کي پاڻي پيارڻ، هڪ مزدور کي ڇانو فراهم ڪرڻ يا هڪ ضرورتمند کي پنکو فراهم ڪرڻ، اهي ننڍا عمل آهن پر اهي سماجن کي زنده رکن ٿا. جيڪڏهن اسان هن موقعي کي نظرانداز ڪيو ته ايندڙ ڏينهن اڃا به وڌيڪ سخت هوندا،پر جيڪڏهن اسان رحم، تعاون ۽ ذميواري کي پنهنجو نعرو بڻايو ته پوءِ هي سخت گرمي اسان لاءِ رحم جو پيغام به بڻجي سگهي ٿي
ياد رکو! فطرت جا رنگ هميشه مٽبا رهبا آهن پر اسانکي سنجيدگي اختيار ڪرڻ جو سبق ڏيندا آهن، گڏوگڏ اهي اسانجو امتحان وٺندا آهن ته اسان ٻين لاء جيئڻ جو ڪهڙو سامان گڏ ڪيو آهي۔انڪري هن موسم ۾ ڏينهن جي سخت گرمي ۾ ٻاهر وڃڻ کان پاسو ڪريو۔ گهڻو پاڻي پيئو ۽ پاڻ کي Hydrated رکو، هلڪا ۽ هلڪي رنگ جا ڪپڙا پائڻ، وڻ لڳايو ۽ ماحول کي بچايو، گهرن ۾ ٿڌو ماحول رکڻ جي ڪوشش ڪريو۔ جيڪڏهن اسان اڄ کان ماحول جي حفاظت نه ڪنداسين، ته ايندڙ نسلن لاءِ حالتون وڌيڪ خراب ٿي سگهن ٿيون. وڻ پوکڻ، پاڻي بچائڻ ۽ گدلاڻ گهٽائڻ اسان جي ذميواري ۾ شامل آهي. ڇوته هيٽ ويو صرف موسم ناهي، پر هڪ سنجيده خطرو آهي. انڪري احتياط ڪريو ۽ ٻين کي به ان بابت گاهي ڏيو۔
