ڪوئيٽا(م ڊ) بلوچستان جي علائقي پشين ۾ سي ٽي ڊي جي فائرنگ ۾ جنگ بندي لاءِ ويل ٽياڪڙ مارجڻ جي دعويٰ ڪئي آهي. سيد عبدالرحيم شاهه ۽ سيد عبدالقديم شاهه جي قتل ۾ سي ٽي ڊي جي ڪارروائي تڪرار کي جنم ڏنو آهي ڇاڪاڻ ته انهن جي مائٽن ۽ مقامي رهواسين موجب، اهي ٻئي ماڻهو انهن ڇهن ٽياڪڙن ۾ شامل هئا جيڪي لاڳاپيل اختيارين جي اجازت سان جوابدارن سان ڳالهه ٻولهه ڪرڻ لاءِ ويا هئا ته جيئن انهن کي هٿيار ڦٽا ڪرڻ لاءِ قائل ڪري سگهجي. بلوچستان پوليس ۽ سي ٽي ڊي عملدارن جو چوڻ آهي ته آپريشن علائقي ۾ سنگين واقعن ۾ گهربل جوابدار سيد ثناءُ الله آغا ۽ سندس ساٿين خلاف ڪيو ويو، جنهن ۾ ثناءُ الله آغا جي ٻن ڀائرن سميت ڇهه ماڻهو مارجي ويا جڏهن ته فائرنگ جي ڏي وٺ ۾ سي ٽي ڊي جا 10 اهلڪار پڻ زخمي ٿيا.واقعي جي حوالي سان هڪ پريس ڪانفرنس ۾، سي ٽي ڊي بلوچستان جي سربراهه اعتزاز گورايا ان دعويٰ کي رد ڪري ڇڏيو ته عبدالقديم شاهه ۽ عبدالرحيم شاهه ٽياڪڙن ۾ شامل هئا. هن چيو ته مارجي ويلن خلاف قتل، قتل جي ڪوشش، ڀتا خوري ۽ ٻين سنگين ڏوهن جا 15 کان وڌيڪ ڪيس داخل ڪيا ويا آهن. بلوچستان جي وڏي وزير مير سرفراز بگٽي هڪ بيان ۾ پشين ضلعي ۾ سي ٽي ڊي آپريشن جي تعريف ڪئي ۽ چيو ته قانون لاڳو ڪندڙ ادارا بلوچستان ۾ امن امان برقرار رکڻ لاءِ مڪمل پيشه ورانه ۽ عزم سان پنهنجا فرض سرانجام ڏئي رهيا آهن. پشين جي ڪلي ڪربلا علائقي ۾ سي ٽي ڊي آپريشن ۾ مارجي ويل 70 سالن جي رحيم شاهه ۽ 68 سالن جي قديم شاهه جو تعلق پشين ضلعي جي ڪلي ڪربلا علائقي سان هو. ٻئي ماڻهو پشتو ڳالهائيندڙ سيد قبيلي سان تعلق رکن ٿا، جن مان رحيم شاهه قادر شاهه جو ڀائٽيو هو. فون تي رابطو ڪرڻ تي سندس ويجهي مائٽ سيد طفيل شاهه بي بي سي کي ٻڌايو ته قديم شاهه جا 11 ٻار آهن، جن ۾ پنج پٽ شامل آهن. هن چيو ته قديم شاهه ڪراچي ۾ ڪارن جو ننڍو ڪاروبار ڪندو هو. هو ڪراچي ۾ رهائش پذير هو ۽ ڪجهه ڏينهن اڳ هڪ ويجهي مائٽ جي وفات سبب پنهنجي اباڻي علائقي ۾ آيو هو.
