پشاور (حماد حسن) مينا خان آفريدي شروع کان ئي جارحاڻي ٻولي ۽ سخت لهجي سبب سڃاتو وڃي ٿو. مينا خان آفريدي، شاهد خٽڪ ۽ شفيع جان انهن ماڻهن مان آهن، جيڪي سياسي گفتگو ۾ انتهائي نامناسب ٻولي استعمال ڪندا رهيا آهن. مينا خان جي اوچتي سياسي اهميت پي ٽي آءِ جي مقبوليت سبب وڌي، پر اها اهميت هو پاڻ سنڀالي نه سگهيو، جنهن جو اظهار سندس لهجي ۽ روين مان ٿئي ٿو. تازو بشير بلور شهيد جي ورسي موقعي تي اي اين پي جو جلسو ٿيو، جيڪو صرف مقامي سطح جو هو، پر ان ۾ هزارين ماڻهو شريڪ ٿيا. اهو جلسو پشاور ۽ ويجهن حلقن تائين محدود هئڻ باوجود تمام وڏو هو. ان جي ڀيٽ ۾ پي ٽي آءِ وٽ حڪومت، انتظاميا ۽ اثر رسوخ هئڻ باوجود اهڙو تاثر نظر نه آيو. ان مان ظاهر ٿئي ٿو ته سياسي هوا آهستي آهستي رخ مٽائي رهي آهي. چارسده، مردان، سوات، دير ۽ ٻين علائقن ۾ به اي اين پي ۾ شموليت وڌي رهي آهي. 23 تاريخ تي چارسده ۾ به وڏو جلسو رٿيل آهي، جيڪو ايمل ولي خان جو پنهنجو تڪ آهي. پي ٽي آءِ جي مقبوليت مڪمل طور ختم نه ٿي آهي، پر جيڪا ٻولي ۽ رويو ڪجهه اڳواڻن اختيار ڪيو آهي، ان سبب پختون سماج ۾ بيزاري وڌي رهي آهي. ماڻهن کي اهو احساس ٿيڻ لڳو آهي ته اهڙي ٻولي سندن تهذيب، روايتن ۽ سماجي قدرن جي نمائندگي نٿي ڪري. عورتن بابت گاريون ۽ غيراخلاقي لهجو پوري قوم لاءِ بدنامي جو سبب بڻجي رهيو آهي.
