ڀارت ۾ وڌندڙ انتهاپسند لاڙن سبب مسلمانن لاءِ حالتون ايتريون خراب ٿي وينديون، اهو ڪنهن جي به وهم و گمان ۾ نه هو۔ جن مسلمانن ننڊي کنڊ جي ورهاڱي وقت ٻه قومي نظريي جي مخالفت ڪري ڀارت ۾ رهڻ کي ترجيح ڏني، سي هن وقت عجيب ڪشمڪش ۾ مبتلا آهن۔ نام نهاد سيڪيولرزم جي چادر ۾ ويڙهيل هي قوم مسلمانن کي چوراهن تي بيهاري ڇڏيندي پئي وڃي، جتي يا ته سرينڊر آهي يا پوءِ پنهنجي حقن، تحفظ ۽ عزتِ نفس لاءِ اڳتي وڌڻ جو وقت۔ سياسياتي ماهرن موجب سيڪيولرزم جي نالي تي مسلمانن کي 1947ع ۾ ورهائڻ ڪافي نه هو، هاڻي سندن ساهه به تنگ ڪيو پيو وڃي ۽ جانورن جهڙو ورتاءُ ڪيو پيو وڃي۔ ان جو تازي مثال بهار جي وزيراعليٰ نيتش ڪمار آهي، جنهن پنهنجي آفيس ۾ نوڪريءَ جو حڪم نامو وٺڻ ايندڙ باحجاب مسلمان عورت جو نقاب هٽائي ان جي بي عزتي ڪئي۔ توهان به اها خبر ٻڌي هوندي ته ميڊيڪل ڊگري رکندڙ مسلمان باپردہ عورت نوڪريءَ جو حڪم وٺڻ آئي ته 74 ورهينه وزيراعليٰ ان جي چهري تان نقاب سرڪائي ڇڏيو، ڄڻ چئي رهيو هجي ته پنهنجو سڄو چهرو ڏيکارو۔ ڀرسان بيٺل بي جي پي جو نائب وزيراعليٰ کيس روڪڻ جي ڪوشش ڪئي، پر صحت وارو وزير کلندو رهيو۔
ڇا نيتش ڪمار واقعي ذهني طور ڪمزور ٿي چڪا آهن؟ يا هندو انتهاپسنديءَ جو اثر گهرو ٿي ويو آهي؟ يا پوءِ پردي پويان ڪو اهڙو هٿ آهي جيڪو هن جي اقتدار ۾ رهڻ کان خوش نه آهي؟ بي جي پي جي اندر به ڪيترن کي سندس ٻيهر وزيراعليٰ ٿيڻ سٺو نه لڳو، پر ساڳئي وقت "پلٽو ڪمار” سڏجندڙ هن تجرباڪار سياستدان کان ڊپ به آهي، ته ڪنهن به وقت فيصلا پلٽي نه ڇڏي۔ نيتش ڪمار هڪ مسلمان عورت نه، پر ڀارت جي اڌ آباديءَ جي بي عزتي ڪئي آهي، جيڪا اڳ جي ڀيٽ ۾ پاڻ کي وڌيڪ غيرمحفوظ محسوس ڪرڻ لڳي آهي۔ ڳالهه صرف هڪ مسلمان عورت جي نه پر هر ان عورت جي آهي، جيڪا هاڻي قانون جي نگهبانن کان به ڊڄڻ لڳي آهي۔ نيتش ڪمار ڪو معمولي ماڻهو نه، بلڪه وڏي رياست جا ڏهين ڀيرا وزيراعليٰ آهن، جن بابت چيو ويندو آهي ته انهن غريبن ۽ اقليتن لاءِ ڪيترائي سکيا ڏيندڙ قدم کنيا۔ پر ڪجهه سالن کان سندن غير مناسب حرڪتن تي شديد تنقيد ٿيندي رهي آهي۔ سندن حامي چون ٿا ته عمر وڌڻ سبب هو گهڻو ڪجهه وساري ويهندا آهن ۽ حالتن جي سنجيدگي سمجهي ناهن سگهندا۔ پر پوءِ سوال آهي ته جيڪڏهن هو ذهني طور ايترا ڪمزور آهن ته اهڙي وڏي ۽ مسئلن سان ڀريل رياست جو بار کين ڇو ڏنو ويو؟ ڇا سندن پارٽي ۾ ڪو به متبادل ناهي؟
جيڪڏهن مخالف ڌر آر جي ڊي هي معاملو نه کڻي اچي ها ته شايد هن تي به پردو وجهي ڇڏيو وڃي ها، ڇو ته اتحادي جماعتن جي ڪنٽرول سبب ميڊيا گهڻو ڪجهه ٻڌائي ئي نٿي سگهي۔ نيتش ڪمار جي بي ادبي واري وڊيو سوشل ميڊيا تي وائڙل ٿيڻ باوجود به انهن طرفان ڪا معافي نه آئي۔ بي جي پي وري پراڻا وڊيو آڻي حساب برابر ڪرڻ جي ڪوشش ڪئي۔ هي عورت نوڪري وٺڻ کان انڪار ڪري ڇڏيو ۽ خبرن موجب سخت ذهني دٻاءُ جو شڪار ٿي وئي آهي۔ انتها پسند هندن کي نه صرف مذهبي جنون سوار آهي پر مسلمانن جي تحقير ڪرڻ مان به لذت ملندي آهي، ۽ اسلام خلاف ڳالهائڻ تي انعام به ملي ٿو۔ جتي بلقيس بانو جي زيادتي ڪندڙن کي گلن سان نوازيو وڃي ٿو، اتي نيتش ڪمار جهڙن کان ڇا اميد رکي سگهجي ٿي؟ڀارت ۾ هر ڪجهه منٽن بعد جنسي تشدد جو واقعو پيش اچي ٿو۔ عورتون پاڻ کي غير محفوظ سمجهن ٿيون، پر ماڻهو وري به انهن ئي سياستدانن کي ووٽ ڏين ٿا۔ بهار ۾ عورتن کي بئنڪ اڪائونٽس ۾ رقم وجهي ووٽ خريد ڪيو ويو، پر عزت ڏيڻ جي تميز نه آئي ۽ نتيجو سامهون آهي۔ حيرانگي اها آهي ته عورتن جي حقن جي تنظيمن ۽ قومي عورت ڪميشن به خاموش رهيو۔ ڇا سياست ايتري پست ٿي سگهي ٿي؟ جيڪڏهن اڄ مسلمان عورت جي بي حرمتي تي آواز نه اٿاربو ته سڀاڻي ڪنهن هندو عورت جو گهونگهٽ هٽايو ويندو ته شايد ماتم ڪرڻ وارو به نه بچندو۔
