پوني (ويب ڊيسڪ)سيد مشتاق علي ٽرافي جي فائنل ۾ جهارکنڊ هرياڻا کي 69 رنسن تان شڪست ڏئي پهريون ڀيرو ٽائٽل پنهنجي نالي ڪري ورتو.
پوني جي مهاراشٽر ڪرڪيٽ ايسوسيئيشن اسٽيڊيم ۾ کيڏيل فائنل ۾ هرياڻا جي ڪپتان انڪيت ڪمار ٽاس کٽي پهريان فيلڊنگ جو فيصلو ڪيو.
جهارکنڊ پهريان بيٽنگ ڪندي مقرر 20 اوورن ۾ ٽن وڪيٽن جي نقصان تي 262 رنسون ٺاهيون. ڪپتان ايشان ڪشن شاندار 101 رنسن جي اننگز کيڏي، جنهن ۾ 10 ڇڪا ۽ 6 چوڪا شامل هئا.
ان کانسواءِ ڪوشگرا 81 ۽ انڪول راءِ 40 رنسون ٺاهي نمايان رهيا، هرياڻا طرفان انڪول ڪمبوج، سميت ڪمار ۽ سمانت جکر هڪ، هڪ وڪيٽ ورتي.
جهار کنڊ 263 رنسن جي هدف جي جواب ۾ هرياڻا جي ٽيم 19هين اوور ۾ 193 رنسن تي آل آئوٽ ٿي وئي، يَشويندر دلال 53، نشانت سندھو 31 ۽ سمانت جکر 38 رنسون ٺاهي ٽاپ اسڪورر رهيا.
جهارکنڊ جي بال ڪرشنا ۽ سشانت مشرا ٽي، ٽي وڪيٽون ورتيون، جڏهن ته وڪاش سنگهه ۽ انڪول راءِ ٻه، ٻه وڪيٽون حاصل ڪيون.
شاندار ڪارڪردگيءَ جي بنياد تي ايشان ڪشن کي فائنل جڏهن ته انڪول راءِ کي ٽورنامينٽ جو بهترين رانديگر قرار ڏنو ويو.
