اسلام آباد (مطيع الله جان) حڪمران جماعت نون ليگ طرفان اڳوڻي آرمي چيف جنرل رٽائرڊ قمر جاويد باجوا تي لڳاتار حملا ڪيا پيا وڃن، ۽ خاص طور تي اڳوڻي جنرل ۽ اڳوڻي آءِ ايس آءِ سربراهه فيض /حميد کي 14 سال قيدِ با مشقت جي سزا ملڻ کان پوءِ نون ليگ ۽ حڪمران ڌر خوشيون ملهائي رهي آهي ۽ اطمينان جو اظهار ڪري رهي آهي. هڪ لحاظ کان اهو جشن ٺهي ٿو. پر سوال اهو آهي ته چودهه سال قيدِ با مشقت ڪهڙن الزامَن تي ٻڌائي وئي، ڪهڙي عدالت طرفان ٻڌائي وئي، ۽ ان مان اسان کي ڪهڙو سبق ملڻ گهرجي، انهن ڳالهين تي نه ڪو بحث ٿي رهيو آهي ۽ نه ئي ڪا سنجيده ڳالهه ٻولهه. ان جي ابتڙ، خواجا آصف، راڻا ثناءُ الله ۽ ڪجهه ميڊيا جا دوست جنرل فيض جي ماضي جي ڪردار بابت پنهنجي اندر جي باهه ڪڍي رهيا آهن، پر اهو ٻڌائڻ کان قاصر آهن ته جنرل فيض کي جن ڏوهن تي سزا ملي آهي، انهن جو انهن ڳالهين سان ڪو سڌو واسطو ناهي. حڪمران جماعت جا وزير، هجن يا صلاحڪار، هاڻي اهڙو تاثر ڏيڻ جي ڪوشش ڪري رهيا آهن ڄڻ جنرل فيض کي سزا سندس سياسي ڪردار، عمران خان کي اقتدار ۾ آڻڻ ۽ مبينا سازشن سبب ملي آهي. خواجا آصف ۽ راڻا ثناءُ الله بار بار ميڊيا تي اچي چون ٿا ته جنرل باجوا به جنرل فيض سان گڏ ملوث هو، پر اهي اهو ٻڌائڻ کان پاسو ڪن ٿا ته 14 سال قيد جي سزا انهن الزامن تي ناهي، جن جو هو ذڪر ڪري رهيا آهن. اهي سڀ ڳالهيون پنهنجي جاءِ تي ٿي سگهن ٿيون، پر قوم کي اهو به ڄاڻڻ جو حق آهي ته اصل ۾ جنرل فيض کي ڪهڙي ڏوهه تي سزا ملي آهي، ۽ ڇا ان سزا کان پوءِ اهو يقين ڏياريو وڃي ٿو ته آئيندي ڪو آءِ ايس آءِ يا فوجي سربراهه سياست ۾ مداخلت نه ڪندو. اها ڳالهه نه خواجا آصف ڪري سگهي ٿو ۽ نه راڻا ثناءُ الله. حقيقت اها آهي ته نون ليگ جا سياستدان پنهنجين غلطن کي تسليم ڪرڻ لاءِ تيار ناهن. اهو به نٿو ٻڌايو وڃي ٿو ته جنرل قمر جاويد باجوا کي نواز شريف جي حڪومت کي ڪمزور ڪرڻ جو موقعو آخر ڪنهن ڏنو، ۽ پوءِ ساڳئي جنرل کي ايڪسٽينشن ڪنهن ڏني. پارليامينٽ ۾ فخر سان اعلان به ڪيو ويو ته نواز شريف جو پيغام آهي ته ايڪسٽينشن جي حق ۾ ووٽ ڏنو وڃي. اڄ جڏهن اهي ئي ماڻهو جنرل باجوا ۽ جنرل فيض تي الزام هڻي رهيا آهن، ته کين اهو به ٻڌائڻ گهرجي ته جيڪڏهن هو 2018ع ۾ قومي ڏوهي هو ته پوءِ ايڪسٽينشن ڇو ڏني وئي. قوم کان معافي گهرڻ بدران ماڻهن کي بيوقوف بڻايو پيو وڃي. جنرل فيض بابت ذاتي تجربن جا حوالا به ڏنا وڃن ٿا، پر هاڻي انهن ڳالهين جو ڪو خاص فائدو ناهي. صحافين کي به اڳتي سوچڻ گهرجي، ڇو ته رڳو پوائنٽ اسڪورنگ سان مسئلا حل ناهن ٿيندا. هاڻي صورتحال اها نظر اچي رهي آهي ته عمران خان ۽ پي ٽي آءِ کي سياسي طور تي ڌار ڪرڻ جي ڪوشش ٿي رهي آهي. نيون سياسي ڪميٽيون ٺهي رهيون آهن، اوورسيز اڳواڻن کي پري ڪيو پيو وڃي جن ۾ شهباز گل ۽ ٻيا شامل آهن، انهن کي واٽس ايپ گروپ مان ڪڍيو ويو آهي ۽ سوشل ميڊيا جي سرگرمين کي به محدود ڪيو پيو وڃي. ملاقاتن تي پابنديون، ڪيسن جو دٻاءُ، ۽ جيل منتقلي بابت بحث اهو ظاهر ڪري ٿو ته هڪ ڊگهي مدي واري حڪمت عملي تي عمل ٿي رهيو آهي. نتيجي طور پي ٽي آءِ کي آهستي آهستي پنهنجي باني عمران خان کان پري ڪيو پيو وڃي، ۽ سياسي طاقت کي ڪمزور ڪيو پيو وڃي. تاريخ ٻڌائي ٿي ته اهڙا تجربا اڳ به ٿي چڪا آهن، ۽ سندن انجام به سڀني جي سامهون آهي. اهڙي صورتحال ۾ ضروري آهي ته سياسي جماعتون رڳو جذبات بدران سنجيده حڪمت عملي اختيار ڪن، ۽ قوم کي صاف ٻڌائن ته سندن مستقبل جي حڪمت عملي ڇا آهي.
