ڪراچي (ويب ڊيسڪ)پنهنجي لاءِ جيون ساٿي چونڊڻ جو موقعو ڏيندڙ ريئلٽي شو ”لازوال عشق“ يوٽيوب تان هٽايو ويو آهي.
ان شو جو فارميٽ شروع کان ئي تڪراري رهيو ۽ يوٽيوب تي نشر ٿيڻ کانپوءِ ميڊيا ۽ سوشل ميڊيا تي شو تي ڇتي تنقيد ٿيندي رهي.
شو جي ميزباني اداڪارا عائشه عمر ڪري رهي هئي، جڏهن ته پروگرام کي اسلامي قدرن ۽ پاڪستاني ثقافت جي ابتڙ قرار ڏنو ويو.
سوشل ميڊيا واهپيدارن شو کي يوٽيوب تان هٽائڻ لاءِ باظابطا مهم پڻ هلائي ۽ هاڻي پاڪستان ۾ پروگرام کي يوٽيوب تان هٽايو ويو آهي.
شو انتظاميا پنهنجي انسٽاگرام اڪائونٽ تي لکيو ته ”ڪجهه سياسي سببن جي ڪري اسان جو پروگرام پاڪستان ۾ نه ڏيکاريو ويندو.“
ياد رهي ته”لازوال عشق“ ۾ پاڪستان سان واسطو رکندڙ اٺ نوجوان جوڙا شامل آهن، جيڪي استنبول جي هڪ بنگلي ۾ زندگي جو ساٿي چونڊڻ لاءِ ترسيل آهن.
هي پروگرام بين الاقوامي ريئلٽي ڊيٽنگ شو “لو آءِ لينڊ“ جي طرز تي ٺاهيو ويو آهي ۽ ترڪي جي ريئلٽي شو ”آشڪ آداسي“ مان متاثر لڳي ٿو.
