ڪراچي (رپورٽر) سنڌ هاءِ ڪورٽ جي جسٽس محمد اقبال ڪلهوڙي ۽ جسٽس فيض شاهه تي ٻڌل 2 رڪني بئنچ ۾ پي ايم ڊي سي جي رجسٽريشن ۽ لائسنس جاري نه ڪرڻ خلاف پاڪستان جي پهرين ٽرانس جينڊر ڊاڪٽر سارا گل جي درخواست جي ٻڌڻي ٿي. جناح ميڊيڪل ڪاليج پاران وڪيل پيش ٿيو ۽ پاور آف اٽارني جمع ڪرائڻ لاءِ وقت گهريو. عدالت پاور آف اٽارني ۽ دليل داخل ڪرڻ لاءِ 30 نومبر تائين وقت ڏنو. پي ايم ڊي سي جي فوڪل پرسن جواب داخل ڪيو . درخواست گذار جي وڪيل چيو ته درخواست گذار جناح ڪاليج، سهيل ميڊيڪل يونيورسٽي ۽ ڪراچي يونيورسٽي جي وچ ۾ گردش ڪري رهيو آهي. درخواست گذار 2021 ۾ جناح ميڊيڪل اينڊ ڊينٽل ڪاليج مان ايم بي بي ايس مڪمل ڪيو، ۽ جي ايم ڊي سي هاڻي سهيل يونيورسٽي بڻجي چڪو آهي. سهيل يونيورسٽي مطابق، اڳ ۾ يونيورسٽي ڪراچي يونيورسٽي سان لاڳاپيل هئي، جڏهن ته يونيورسٽي جو چوڻ آهي ته هاڻي اها هڪ الڳ يونيورسٽي بڻجي وئي آهي، جنهن سبب پي ايم ڊي سي پورٽل تائين ڪا به رسائي ناهي. جسٽس محمد اقبال ڪلهوڙي چيو ته پورٽل جي بندش بابت پي ايم ڊي سي خلاف ڪيتريون ئي درخواستون آيون آهن. عدالت چيو ته لڳي ٿو ته پي ايم ڊي سي جا ماڻهو ڪم نٿا ڪن، ۽ مسئلا حل ڪرڻ بدران پورٽل بند ڪري ڇڏيندا آهن. وڪيل چيو ته ادارن جي وچ ۾ ذميواري جي تڪرار جي ڪري درخواست گذار کي لائسنس جاري ناهي ٿي رهيو.
