ڪراچي (رپورٽر) سنڌ جي وڏي وزير سيد مراد علي شاهه اين ايف سي ايوارڊ ۽ 18هين ترميم کي رول بيڪ ڪرڻ جي ڪنهن به ڪوشش جي سخت مخالفت جو اعلان ڪيو آهي. مراد علي شاهه سنڌ ۾ شاگردن جي حاضري کي مانيٽر ڪرڻ لاءِ ڊجيٽل نظام جو افتتاح ڪري ڇڏيو. تقريب کي خطاب ڪندي مراد علي شاهه چيو ته حاضري سسٽم صوبي جي اسڪولن کان پوءِ ڪاليجن ۽ يونيورسٽين ۾ به لاڳو ڪنداسين، اسان کي ڄاڻ هجڻ گهرجي ته ٻار ڪاڏي وڃي رهيا آهن. ان کان پوءِ ميڊيا سان ڳالهائيندي وڏي وزير چيو ته اين ايف سي ايوارڊ ۽ ارڙهين ترميم کي رول بيڪ ڪرڻ واري ڪنهن به ڪوشش جي مخالفت ڪنداسين. هن وڌيڪ چيو ته اين ايف سي ۽ ارڙهين ترميم کي ڪنهن به صورت ۾ رول بيڪ ٿيڻ نه ڏينداسين، ڇو ته ارڙهين ترميم ۾ ٻيا به ڪيترائي اهم معاملا ۽ شيون شامل آهن. سنڌ جي وڏي وزير اهو چئي نتيجو ڪڍيو ته جيڪڏهن اسان پنهنجي نئين نسل کي تعليم نه ڏني ته اسان جي معدنيات، هٿيار ۽ سڀئي وسيلا ڪا به قيمت نٿا رکن.
