ڪراچي (رپورٽر) سنڌ هاءِ ڪورٽ جي چيف جسٽس جنيد غفار چيو آهي ته ڊجيٽل اثاثن جو معاملو فوري ڌيان طلب آهي، ڇو ته ڪرپٽو ڪرنسي ۽ ورچوئل اثاثا ماڻهن لاءِ هڪ نئون موضوع آهن. هن ٻڌايو ته ايف آءِ اي آن لائين بزنس جي حوالي سان ڪيترائي ڪيس داخل ڪيا آهن، جڏهن ته عدالتن ۾ به غيرقانوني طريقي سان منتقل ٿيندڙ اثاثن جا ڪيس اچي رهيا آهن، تنهنڪري ججن جي جديد ٽريننگ لازمي آهي. سنڌ جڊيشل اڪيڊمي ۾ ڪانفرنس کي خطاب ڪندي چيف جسٽس چيو ته ڪرپٽو ڪرنسي ۽ بلاڪ چين بابت قانون سازي باوجود حڪومت کي خدشا آهن. اسٽيٽ بئنڪ ڪرپٽو ۽ ڊيجيٽل ڪرنسي تي پابندي برقرار رکي آهي ۽ حڪومت هن پابندي ختم ڪرڻ بابت اڃا به خدشن جو شڪار آهي.
