پشاور (ويب ڊيسڪ) نيشنل ڊيزاسٽر مئنيجمينٽ اٿارٽي (اين ڊي ايم اي) خيبر پختونخوا گذريل 48 ڪلاڪن دوران برساتن ۽ ٻوڏ سبب ٿيندڙ جاني ۽ مالي نقصان جا تفصيل جاري ڪري ڇڏيا .
اين ڊي ايم اي جي ترجمان موجب، خيبر پختونخوا ۾ برساتن، ٻوڏ، لينڊ سلائيڊنگ ۽ آسماني کنوڻ ڪِرڻ سبب 321 ماڻهو فوت ۽ 28 زخمي ٿيا آهن.
ترجمان جو چوڻ آهي ته اين ڊي ايم اي خيبر پختونخوا حڪومت ۽ پي ڊي ايم اي سان مڪمل سهڪار ڪري رهيو آهي، جڏهن ته متاثر علائقن ۾ پي ڊي ايم اي، پاڪ فوج ۽ ضلعي انتظاميا امدادي ڪاررواين ۾ مصروف آهن، هنگامي صورتحال کي منهن ڏيڻ لاءِ سڀئي ادارا سرگرم آهن.
ترجمان موجب، اترين علائقن ۾ امڪاني برساتن جي صورت ۾ لينڊ سلائيڊنگ جا واقعا وڌيڪ وڌڻ جو انديشو آهي،
ترجمان ماڻهن کي اپيل ڪئي ته برساتن ۽ ٻوڏ دوران محتاط رهن ۽ حفاظتي اپاءَ وٺن، جڏهن ته سياحن کي صلاح ڏني وئي آهي ته ايندڙ 5 کان 6 ڏينهن تائين اترين علائقن جو سفر نه ڪن.
ٻئي پاسي صوبائي ڊيزاسٽر مئنيجمينٽ اٿارٽي (پي ڊي ايم اي) موجب، برسات ۽ ٻوڏ سبب مختلف حادثن ۾ هنيئر تائين 307 ماڻهو فوت ٿيا، جن ۾ 279 مرد، 15 عورتون ۽ 13 ٻار شامل آهن، حادثن ۾ 23 ماڻهو زخمي ٿيا، جن ۾ 17 مرد، 4 عورتون ۽ 2 ٻار شامل آهن.
پي ڊي ايم اي موجب، برساتن ۽ ٻوڏ سبب مجموعي طور تي 74 گهر متاثر ٿيا، جن مان 63 جزوي ۽ 11 مڪمل طور تباهه ٿيا، حادثا سوات، بونير، باجوڙ، تورغر، مانسهرا، شانگلا ۽ بٽگرام ۾ پيش آيا.
صوبائي اختيارين جو چوڻ آهي ته متاثر ضلعن لاءِ 50 ڪروڙ رپيا جاري ڪيا ويا آهن، جن مان بونير لاءِ 15 ڪروڙ، جڏهن ته باجوڙ، بٽگرام ۽ مانسهرا لاءِ 10، 10 ڪروڙ ۽ سوات لاءِ 5 ڪروڙ رپيا جاري ڪيا ويا آهن.
خيبر پختونخوا جي سڌ سماءُ بابت صلاحڪار بئريسٽر محمد علي سيف موجب، صوبي جا 11 ضلعا ڪڪر ڦاٽڻ ۽ ٻوڏ سبب متاثر ٿيا آهن ۽ مجموعي طور متاثر ماڻهن جو انگ 3 هزار 817 تائين پهچي ويو آهي.
هن چيو ته متاثر علائقن ۾ 32 ماڻهو اڃا تائين گم آهن، جن جي ڳولا جاري آهي، جڏهن ته 545 ريسڪيو اهلڪار ۽ 90 گاڏيون ۽ ٻيڙيون امدادي سرگرمين ۾ حصو وٺي رهيون آهن.
بئريسٽر سيف وڌيڪ چيو ته رڳو بونير ۾ 159 ماڻهو فوت ٿيا، جڏهن ته 100 ماڻهن کي بچايو ويو آهي، باجوڙ ۾ 20 ماڻهو فوت ٿيا ۽ هڪ گم آهي، جڏهن ته بٽگرام مان 11 لاش مليا آهن ۽ 10 ماڻهو لاپتا آهن.
