ايڪس (اڳوڻي ٽوئٽر) کي ٽڪر ڏيڻ لاءِ ميٽا طرفان اٽڪل ٻه سال اڳ جولاءِ 2023ع ۾ متعارف ڪرايل ايپ ٿريڊز هاڻي هڪ نئون فيچر متعارف ڪرائي ڇڏيو آهي، جنهن تحت واهپيدار هڪ ٻئي سان ڊائريڪٽ ميسيجز (ڊي ايم) ذريعي چيٽ ڪري سگهندا.
فيچر بابت پهريون ڀيرو جون 2025 ۾ ميٽا جي سي اي او مارڪ زڪربرگ اشارو ڏيندي چيو ته ”ٿريڊز ۾ ڊي ايم فيچر جي آزمائش بيٽا ورزن طور تي ڪئي پئي وڃي.“
ان موقعي تي زڪربرگ جو چوڻ هو ته جيڪڏهن توهان کي فيچر تائين پهچ حاصل آهي ته ان کي ضرور آزمائي ڏسو.
هاڻ ميٽا اعلان ڪيو آهي ته اِهو فيچر عالمي سطح تي 18 سالن يا ان کان وڏي عمر وارن واهپيدارن لاءِ متعارف ڪرايو پيو وڃي.
جيڪڏهن توهان وٽ في الحال هي فيچر موجود ناهي ته به پريشاني جي ڳالهه ناهي، جلد ئي اِهو توهان لاءِ به دستياب هوندو.
ٿريڊز ايپ استعمال ڪندڙ نئون ڊي ايم فيچر ايپ جي هيٺئين حصي ۾ لفافي جي شڪل واري آئڪون ذريعي ڏسي سگھندا.
هن وقت ان جاءِ تي سرچ آئڪون موجود آهي، جنهن کي جلد ئي ڊي ايم آئڪون ۾ بدلائي سرچ آئڪون کي ايپ جي مٿئين حصي تي منتقل ڪيو ويندو.
ان کانسواءِ ڪنهن کي پيغام موڪلڻ جي اجازت ڏيڻي ان جو اختيار واهپيدار وٽ هوندو.
ان سان گڏ ٿريڊز طرفان هڪ نئون فيچر ”هاءِ لائٽس“به متعارف ڪرايو پيو وڃي، جنهن ذريعي ماڻهن کي خبر پوندي ته هن وقت ڪهڙو موضوع ٽرينڊ ڪري رهيو آهي.
ڪمپني جو چوڻ آهي ته هي فيچر واهپيدارن جي مسلسل درخواستن کانپوءِ متعارف ڪرايو ويو آهي ته جيئن هو پاڻ ۾ لاڳيتو رابطي ۾ رهي سگهن.
