اسلام آباد(ع آ نيوز) پاڪستان ۽ آءِ ايم ايف ۾ پگهاردار طبقي لاءِ ٽئڪس گهٽائڻ تي اتفاق راءِ جو امڪان آهي. معلوم ٿيو آهي ته پاڪستان ۽ آءِ ايم ايف وچ ۾ مالي سال 2025-26 جي بجيٽ لاءِ پگهاردار طبقن جي ٽيڪس جي شرح ۾ تجويز ڪيل گهٽتائي بابت اتفاق راءِ وڌي رهيو آهي. تنهن هوندي به، ايندڙ بجيٽ ۾ 14.22 ٽريلين رپين جي آمدنيءَ جو هدف حاصل ڪرڻ بجيٽ ٺاهيندڙن لاءِ وڏو چئلينج هوندو، ڇو ته هي هدف غير يقيني حالتن تي ٻڌل آهي—خاص طور تي جڏهن موجوده مالي سال لاءِ 12.33 ٽريلين رپين جي گهٽ ڪيل ٽئڪس هدف به پورو ڪرڻ ۾ مشڪلاتون درپيش آهن. آءِ ايم ايف ۽ ايف بي آر جي وچ ۾ سخت ڳالهه ٻولهه ٿي، جتي فنڊ جي ٽيم اصولي طور تي پگهاردار طبقن جي مختلف درجن (سليب) ۾ ٽيڪس گهٽائڻ لاءِ رضامندي ظاهر ڪئي. آءِ ايم ايف جو اندازو آهي ته هن تجويز ڪيل گهٽتائي سان ايندڙ مالي سال ۾ 56 کان 60 ارب رپين جو رليف ملندو، تنهنڪري ايف بي آر کي هي خال پورو ڪرڻ لاءِ نون انڪم ٽيڪس قدمن جي تجويز ڏيڻي پوندي.مذاڪراتي ٽيم جي هڪ سينئر عملدار تصديق ڪئي ته:”اسان آءِ ايم ايف کي 10 جون تي پيش ٿيندڙ بجيٽ ۾ پگهاردار طبقن کي رليف ڏيڻ لاءِ ڪجهه ٽيڪس سڌارا تجويز ڪري مطمئن ڪرڻ جي ڪوشش ڪئي آهي.”اعليٰ اختيارين ٻڌايو ته پگهاردار طبقن لاءِ تجويز ڪيل نوان ٽيڪس درجا (سليب) اڃا مڪمل طور تي طئي نه ٿيا آهن، پر ايف بي آر پهرين سليب (جيڪو سالياني 6 لک کان 12 لک رپين جي آمدني تي مشتمل آهي) لاءِ صرف 1٪ ٽيڪس لاڳو ڪرڻ جي تجويز ڏني آهي، جيڪا موجوده 5٪ شرح کان گھٽ آهي. آءِ ايم ايف، هن سليب تي 1.5٪ ٽيڪس جي وصولي تي زور ڏئي رهيو آهي، جنهن جو مطلب ٿيندو ته ان آمدني تي ماڻهو سالياني 9000 رپيا قومي ناڻي ۾ جمع ڪرائيندا. باقي سليبز لاءِ پگهاردار طبقن تي ٽيڪس ۾ 2.5٪ گهٽتائي جي تجويز آهي، ۽ سڀ کان وڌيڪ سليب جي شرح کي 35٪ مان گهٽائي 32.5٪ ڪرڻ جو امڪان آهي. تنهن هوندي به، اڃا تائين آءِ ايم ايف ۽ ايف بي آر جي اعليٰ عملدارن وچ ۾ مڪمل مالي اثرن جو حساب ڪتاب نه ٿي سگهيو آهي ۽ نه ئي ان تي مڪمل اتفاق ٿيو آهي.
