راولپنڊي(م ڊ) پاڪ فوج جي سربراهه جنرل عاصم منير چيو آهي ته پاڪستاني عوام خاص ڪري نوجوانن جو پاڪ فوج سان تمام گهرو رشتو آهي. ملڪ دشمن عنصرن جي فوج ۽ عوام ۾ خال پيدا ڪرڻ جي ڪوشش هميشه ناڪام ٿيندي. پاڪ فوج جي عام لاڳاپن واري شعبي (آءِ ايس پي آر) طرفان جاري ڪيل بيان موجب آرمي چيف جنرل عاصم منير مختلف يونيورسٽين ۽ ڪاليجن جي شاگردن کي خطاب ڪندي نوجوانن جي توانائي، تخليقي صلاحيتن ۽ جدت جي واکاڻ ڪئي. پاڪ فوج جي ترجمان موجب آرمي چيف شاگردن کي خطاب ڪندي ٻاهرين ماحول جي پاڪستان تي اثرن خاص طور تي سرحد پار کان دهشتگردي جي خطرن تي به خيالن جي ڏي وٺ ڪئي. پاڪ فوج جي سربراهه نوجوانن کي پاڪستانيت جو جذبو اختيار ڪرڻ تي زور ڏيندي چيو ته نوجوان پنهنجي تعليم تي خاص ڌيان ڏين ۽ ملڪ جي ترقي ۾ ڪردار ادا ڪن. پاڪ فوج جي ترجمان موجب جنرل عاصم منير نوجوانن جي توانائي، تخليقي صلاحيتن ۽ جدت جي واکاڻ ڪندي چيو ته اسان جا نوجوان پاڪستان جا مستقبل جا ليڊر آهن. آءِ ايس پي آر موجب آرمي چيف پنهنجي خطاب ۾ ملڪ جي خودمختياري ۽ جاگرافيائي سالميت جي تحفظ ۾ پاڪ فوج جي ڪردار کي اجاگر ڪيو. جنرل عاصم منير چيو ته کيس پنهنجي مذهب، تهذيب ۽ روايتن تي فخر آهي، هو فتنا خوارج کي ملڪ تي فرسوده سوچ مسلط ڪرڻ نه ڏيندا.
هن وڌيڪ چيو ته خيبرپختونخواهه ۽ بلوچستان جا پرجوش عوام دهشتگردن خلاف لوهي ديوار وانگر بيٺا آهن.
