حيدرآباد(رپورٽر) سنڌو درياهه تي نوان ڪينال ٺاهي سنڌ جي پاڻي تي ڌاڙو هڻڻ خلاف جيئي سنڌ قومي محاذ (آريسر) جو 28 جنوري تي سکر کان شروع ٿيل پيادل لانگ مارچ اڄ 11 فيبروري تي هٽڙي بائي پاس ھالاناڪه سٽي گيٽ وٽان تلڪ چاڙهي کان ٿيندو 4 بجي حيدرآباد پريس ڪلب تي پهچندو. جتي اڳواڻ خطاب ڪندا، مارچ جي اڳواڻي جسقم چيئرمين اسلم خيرپوري. جنرل سيڪريٽري عبدالفتاح چنا،جوائينٽ سيڪريٽري وحيد سنڌي،مالياتي سيڪريٽري امير باغي ۽ جساف جو مرڪزي صدر اسد سنڌيار، جيئي سنڌ ناري تحريڪ جي آرگنائيزر ڪرن نظاماڻي ۽ علي عمراڻي سرمد ميراڻي. خالد سنڌي ڪندا.
-
آرمي چيف کي ٽيون خط لکندس، قوم چيف جسٽس ڏانهن پئي ڏسي: عمران خان
راولپنڊي(م ڊ) پي ٽي آءِ باني عمران خان چيو ته آرمي چيف کي ٻه خط انڪري لکيا جو جيڪي به جمهوري رستا هئا، اهي سمورا ختم ٿي ويا، اڳ ئي سينسرشپ هئي، مٿان وري پيڪا ايڪٽ به اچي ويو آهي ۽ سوشل ميڊيا کي به بلاڪ ڪيو ويو آهي، اڊيالا جيل ۾ صحافين سان غير رسمي ڳالهه ٻولهه ڪندي هن چيو ته پارليامينٽ فنڪشنل ناهي، هي فراڊ پارليامينٽ آهي، وزيراعظم، صدر ۽ وزير جعلي آهن، پارليامينٽ مان ڪا اميد ناهي، مون کي پڪ هئي ته حڪومت سان ڳالهيون ڪامياب نه ٿينديون، اسان 8 فيبروري لاءِ نه، رڳو 9 مئي ۽ 26 نومبر واقعن جي جاچ لاءِ جڊيشل ڪميشن جوڙڻ جو چيو هو، پر انهن جا ٻه مقصد آهن، هڪ 8 فيبروري واري ڌانڌلي نه کلي ۽ ٻيو مقصد پي ٽي آءِ کي جيلن ۾ رکڻ آهي، حڪومت سان ڳالهائڻ جو ڪو به فائدو ناهي، 26 هين آئيني ترميم کانپوءِ عدليه جو قتل عام ڪيو ويو آهي، هن وڌيڪ چيو ته مان جسٽس يحيٰ آفريدي کي ٻڌائڻ چاهيان ٿو ته قوم توهان ڏانهن ڏسي رهي آهي، توهان کي قانون ۽ انصاف سان گڏ بيهڻ جي ضرورت آهي، ٻي پاسي عليما خان چيو ته عمران خان ايندڙ هفتي آرمي چيف کي ٽيون خط لکي رهيو آهي، هو چاهي ٿو ته اسٽيبلشمينٽ ۽ چيف جسٽس عوام سان گڏ بيهن.
-
جسٽس بابر ستار ۽ جسٽس اعجاز کان قانوني معاملن بابت ذميواري واپس
اسلام آباد(م ڊ) اسلام آباد هاءِ ڪورٽ چيف جسٽس عامر فاورق هڪ ٻيو فيصلو ڪندي ايڊيشنل جج جسٽس راجا انعام امين منهاس کي اسلام آباد هاءِ ڪورٽ جي قانوني معاملن جو جج مقرر ڪري ڇڏيو، جڏهن ته جسٽس بابر ستار ۽ جسٽس سردار اعجاز اسحاق خان کان قانوني معاملن بابت ذميواري واپس ورتي وئي، واضح رهي ته 2022 ۾ جسٽس بابر ستار ۽ جسٽس سردار اعجاز اسحاق کي قانوني ونگ سپروائز ڪرڻ جي ذميواري ڏني وئي هئي.
