نوابشاهه(پ ر) جيئي سنڌ قومي محاذ(شھيد بشير خان) جي مرڪزي باڊي جو پھريون دستوري اجلاس مرڪزي چيف آرگنائيزر ڊاڪٽر نياز ڪالاڻي جي صدارت ۾ ٿيو، اجلاس ۾ مرڪزي باڊي جي ڊپٽي آرگنائيزر سرفراز ميمڻ، آرگنائيزر پنھل ساريو، نصرالله ڪالادي، اڪبر مڪول شرڪت ڪئي. اجلاس ۾ حنان عباسي، سيد ناصر شاھه، شاذ خادم خصوصي شرڪت ڪئي. جاري ڪيل بيان موجب اجلاس ۾ فيصلو ڪيو ويو ته سنڌو درياهه مٿان اڏجندڙ ڪئنالن خلاف ۽ سنڌ جون زمينون ھڙپ ڪرڻ واري سرڪاري فيصلي خلاف جدوجھد کي وڌيڪ تيز ۽ منظم ڪرڻ لاءِ عالمي مالياتي ادارن سان رابطي ۽ لکپڙھه لاءِ مختلف دانشورن تي ڪاميٽي جوڙي ويندي جيڪا عالمي ادارن کي ليٽر لکي سنڌ جي خدشن ۽ ڳڻتين کان واقف ڪندي، 17 جنوري رھبر سنڌ سائين جي ايم سيد جي 121 ھين سالگرھه تي احتجاج جي ايندڙ مرحلي جو اعلان ڪيو ويندو. جيئي سنڌ رھبر ڪاميٽي طرفان جسقم شھيد بشير خان کي سائين جي ايم سيد جي سالگرھه تي ٿيندڙ جلسي جي ملندڙ دعوت تي اھو طئه ڪيو ويو ته جسقم شھيد بشير خان جيئي سنڌ رھبر ڪاميٽي جي دعوت کي قبول ڪندي جلسي ۾ ڀرپور شرڪت ڪندي.
