مرتضيٰ کوسي تي تشدد جي الزام ۾ ڊاڪٽرياڻي تي ڪيس داخل

سرحد (رپورٽ: عبدالحميد ابڙو) ميڊيا ۾ خبرون ھلڻ بعد گهوٽڪي پوليس نيٺ گوڏا کوڙي ڇڏيا، 15ڏينهن اڳ ڪاروگهٽ اسٽاپ وٽ زبان ڪٽيل حالت ۾ هٿ آيل نوجوان مرتضيٰ کوسو واري واقعي جو سرحد ٿاڻي تي مرتضيٰ کوسو جي فرياد تي ليڊي ڊاڪٽرياڻي سحر آفتاب نائچ، نرس سلامت ڪلوڙ، مختياران شيخ، نادر مڱڻهار سميت 7 ماڻهن  مٿان ڪيس داخل ڪيو ويو آھي، فريادي مرتضيٰ کوسو ڪيس ۾ ڄاڻايو آھي ته جوابدار ليڊي ڊاڪٽر سحرآفتاب نشه آور انجيڪشن هڻي بيهوش ڪيو جنهن بعد زبان ڪٽي اکين کي جهير ڏنا ويا واقعي جو ڪيس داخل ٿيڻ جي باوجود سرحد پوليس جوابدارن جي گرفتاري لاءِ ڪو به قدم ناهي کڻي سگهي جڏهن ته زبان ڪٽي زخمي ڪيل نوجوان مرتضيٰ کوسو اکين جو نور وڃائڻ بعد سندس جي حالت بدستور خراب آھي، جڏهن ته الزام هيٺ آيل ليڊي ڊاڪٽر سحر آفتاب سان رابطو ڪرڻ جي ڪوشش ڪئي وئي پر ساڻس رابطو نه ٿي سگهيو.

1. ڊاڪٽر سحر پاران وڊيو بيان جاري، مرتضيٰ کوسو جا لڳايل الزام رد

سرحد/ميرپورماٿيلو (رپورٽ:خالد وسير/عبدالحميد ابڙو) نوجوان مرتضيٰ کوسو مٿان تشدد جي الزام هيٺ آيل ڊاڪٽر سحر آفتاب پنهنجو ويڊيو بيان جاري ڪري مرتضيٰ کوسو جا الزام رد ڪري ڇڏيا، منهنجو بئنڪ ۾  اڪائونٽ هو، لنڪ نه پئي هلي، بئنڪ انتظاميا کي ڪال ڪئي جن هڪ شخص کي مون وٽ موڪليو جنهن پنهنجو تعارف مرتضيٰ کوسو طور ڪرايو، ڊاڪٽر سحر آفتاب وڌيڪ ٻڌايو ته مرتضيٰ کوسو منهنجو مسئلو حل ڪرڻ لاءِ اي ٽي ايم ۽ موبائيل فون کڻي هليو ويو، جنهن موبائيل مان ڊيٽا چوري ڪئي ۽ اي ٽي ايم مان رقم به چوري ڪري مختلف ماڻهن ڏانهن ٽرانسفر ڪئي، هن چيو ته مون اهڙي شڪايت پنهنجي بابا سان ڪئي ۽ بئنڪ انتظاميا سان ڪئي، بئنڪ انتظاميا مرتضيٰ کوسو کي سکر بدلي ڪيو، ايس ايس پي گهوٽڪي ۽ ٻين وس وارن کان معاملي جي صاف شفاف جاچ جو مطالبو ڪريان ٿي.